ဗေကျေန်၊ ဨပရဴ (၂၅)
ပရေၚ်ဆက်ဆောံကြုက် ကုယူရောပ်ကီု သီုကဵုဍုၚ်တၞဟ်ဟ်တံဂှ်ဝွံ ညံၚ်ရဴဍုၚ်ရုယှာကီု ဒဒှ်ရဗၞတ်တွဵုဟွံမွဲဂှ်ကီု၊ ပရေၚ်ပံၚ်တောဲရေၚ်တၠုၚ်ဂှ်လေဝ် အိုတ်အာဟွံလေပ်ပုဟ်ဂှ် ကလုတ်တမာန်ကြုက် စပ်ကဵုသမဂ္ဂယူရောပ် ဟီုဂးလဝ် ပ္ဍဲဂိတုဨပရဴ (၂၄) တေံရ။
သ္အာၚ်နူဂှ်ပၠန် စပ်ကဵုပရေၚ်ယူကရုၚ်−ရုယှာတုဲ နကဵုကြုက် ဒဒှ်ရကဵုတၚ်ဒုၚ်လျိုၚ် ပွမမံၚ်လဒေါဝ်ဂှ် ဟီုစုတ်လဝ်ကီုရ။ ၜိုန်ဂှ်ကီုလေဝ် ဟိုတ်နူအရေဝ် သ္ဇက်ဒးကယျာန်ဓဝါတ် ကလုတ်တမာန်ဂှ် မပ္တိတ်လဝ်သၟာန် လ္တူဍုၚ်ပြၚ်သေတ် စပ်ကဵုအဝဵုအပိုၚ်အခြာ ဍုၚ်ယူကရုၚ်ကီု သီုကဵုဍုၚ်သဵုဗဳယေတ်ယူနဳယာန်ကၠာတေံဂှ်တုဲ ဒးဆေၚ်လဝ်မုက် ကုပရေၚ်ပါ်ပါဲဂမၠိုၚ်ရ။
ဟိုတ်နူဂယျာန်ပါဲကၠေံ သွက်ဂွံထ္မံက်ထ္ၜးကဵု နဒဒှ်ပွအာတ်မိက် သွက်ရုယှာဂွံနုက်တိတ် ဟွံသေၚ်မ္ဂး သွက်ပရေၚ်ၜက်ၜေတ်ရုယှာ လ္တူယူကရုၚ်ဂှ်တုဲ ကလုတ်တမာန်အဳယူဂမၠိုၚ်ဝွံ ဟီုပ္တိုန်လဝ်ဒုဟ် ကုအလဵုအသဳဗေကျေန်ရ။ ကၠာမဝ်သကိုဝ် ဟွံဂွံဗလး ဒပ်ရုယှာတံ ၜါပိတ္ၚဲဂှ် ဗေကျေန် ကေုာံ မဝ်သကိုဝ်တံ လလောၚ်တြးလဝ် နဒဒှ်ပရေၚ်ဆက်ဆောံမိတ်ဂှ်လေဝ် အဳယူဂှ် သ္ပဒၟံၚ်သတိရ။
“လ္ပာ်ယူရောပ်ဂှ်တှ်ေ တၚ်စၞောန် ဗၞတ်တွဵုဟွံမွဲပုဟ်ဟီုဂှ် ဒးကၠိုဟ်လဝ်ထေက်ရ” သာ်ဝွံ ကလုတ်တမာန်ကြုက် စပ်ကဵုသမဂ္ဂယူရောပ် ဟီုဂးလဝ်ကဵု လိက်ပရိုၚ်တံရ။
“ပရေၚ်ပံၚ်တောဲရေၚ်တၠုၚ် ကေုာံ ပရေၚ်ဍုက်ကေဝ်ဒဒှ်ေဒယှ် အကြာဍုၚ်ဂမၠိုၚ်ဂှ်ဝွံ အိုတ်အာဟွံမာန်တုဲ ပိုၚ်ကၞာတ်လဝ် ပ္တောံဂှ် ဟွံဂပ်ဝ်ပုဟ်။ ပရေၚ်ပံၚ်တောဲရေၚ်တၠုၚ် ကြုက်−ရုယှာဂှ်ဝွံ ဗၞတ်တွဵုဟွံမွဲတုဲ ကြုက် ကေုာံ ယူရောပ်တံလေဝ် လအာတုပ်သာ်ဂှ်ကီုရ” သာ်ဝွံ ညးဟီုဂးလဝ်ရ။
ရပ်စပ် ပရေၚ်ဆက်ဆောံ ကြုက်−ရုယှာတုဲ ပွမဂ္စါန်ပ္တိတ်ဇြဟတ် ညံၚ်အကြာယူရောပ် ကေုာံ ဍုၚ်ကြုက်တံ လညာတ်ဂွံပါ်ထ္ကးဂှ် ဖူ ဟီုဂးကဵုလဝ်သတိတုဲ စပ်ကဵုပဋိပက္ခယူကရုၚ်တုဲ ကြုက် ဒစးဒုၚ်တီလဝ်တုဲ ထံက်ပၚ်ကဵုဒၟံၚ်လွဟ်လက်နက်ရောၚ် ပရေၚ်မဟီုဂးဒၟံၚ်တံဂှ်လေဝ် တးပါဲလဝ်ရ။
သွဟ်ပရေၚ်ဍုၚ်ကွာန်မွဲ မဒုၚ်သ္ဇိုၚ် လ္တူရုယှာမနုက်တိတ် နူကဵုတွဵုဒၞက်ယူကရုၚ်ပိုၚ်ဂှ် ယဝ်ရဍုၚ်ကြုက် ဟွံထံက်ဂလာန်မ္ဂး သွက်အဳယူ ဂွံထိၚ်ဒဝ်အာ ပရေၚ်ဆက်ဆောံဓဝ်ပတှ်ေ ကုကြုက်ဂှ် ဇြိုၚ်သန်လောန်ရောၚ် ဇၞော်သ္ကိုပ်မူဝါဒကာဍုၚ်သ္အာၚ် အဳယူ ဂျဵုဇြက်ဗိုဝ်ရဴ ဟီုဂးလဝ် ပ္ဍဲဂိတုတုဲကၠုၚ်တေံရ။
“ပ္ဍဲကဵုပရူဒဒှ် ဖံက်ပ္ကဝ်သၞောဝ်ဍုၚ်သ္အာၚ်ဂှ် ပွမမံၚ်လဒေါဝ်ဂှ်ဝွံ သ္ဇက်ဂွံပတှ်ေ ဟွံမွဲပုဟ်” ဂှ် ဂျဵုဇြက်ဗိုဝ်ရဴ ဟီုဂးလဝ် နူဂိတုဏံစ အခိၚ်ပြဟ်ဟ်တေံရ။
ပ္ဍဲကဵုမွဲဒမြိပ်တ္ကအ်ထိုၚ်ဝါန် မအုပ်ဓုပ်ဒၟံၚ် နကဵုသၞောတ်ဒဳမဝ်ကရေဇြဳဂှ်ကဵု ကလိုဟ်ၜဳထိုၚ်ဝါန်တံဂှ် ဟိုတ်နူပရေၚ်ပ္ကတ်ပ္ကေၚ်ပရေၚ်ပၞာန် ဒပ်ကျာ ကေုာံ ဒပ်ဍာ်ကြုက်တံဂှ်တုဲ ပရေၚ်ပါ်ပါဲ နူဥရဝ်ပတံလေဝ် မံက်တိတ်ကၠုၚ်လဝ်ကီုရ။
တုဲကၠုၚ် ပ္ဍဲတ္ၚဲအဒိုတ်တေံ ပ္ဍဲကဵုတၚ်ထ္မံက်ထ္ၜး လိက်ပရိုၚ်ပြၚ်သေတ်မွဲဂှ် ဗိုဝ်ရဴဝွံ သွက်ဒပ်ဍာ်ဥရဝ်ပတံ ဂွံဂေတ်ကၚ် ကုကလိုဟ်ၜဳထိုၚ်ဝါန်ဂှ် အာတ်မိက်လဝ်ရ။
Ref; CNA