ဒဳမအ်ဇြော – ဨဗြဴ(၂၅)
တွဵုရးကရေၚ်ဍာဲ၊ ပ္ဍဲဒဳမအ်ဇြောသ္ကုတ်ဗၟံက် ကွာန်လုပ်လၟိဟ်ဂကောံကွာန်ဒဝ်တမ (၃)ကွာန်ဂှ် သ္ပတမ်နူဂိတုအိုတ်တုဲကၠုၚ်ဏံ ကံၚ်ဇြဳပၞာန် စံၚ်ပၞာန်စံၚ်ပလီုဒၟံၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
နူဂိတုဨမာတ်ချ်အိုတ်တုဲကၠုၚ်တေံတုဲ စဵုကဵုဂိတုဨဗြဴမံက်ဏံ ကံၚ်ဇြဳပၞာန်ဂြာတ်ထောံဖျေံလဝ်ဗုမ် ကဵုက္ၜၚ်ကျာကီု၊ ပန်ဖျေံနကဵုလွဟ်ဇၞော်ကီု သီုကဵုအလဵုကောန်ဒပ်ကံၚ်ဇြဳပၞာန်တအ် လုပ်စိုပ်ကၠုၚ်အလဵုဇကုတုဲ စံၚ်ပလီုပလာ်ဒၟံၚ် ကွာန်(၃)ကွာန်ဏံရ။
ဟိုတ်နူကရောၚ်ပၞာန်ကံၚ်ဇြဳတုဲ ညးဍုၚ်ကွာန်တအ် ဂြိပ်ဒဴပါဲဓလေတ်ဒၟံၚ် ကွာန်ဒဝ်တမဂျဳ၊ ဒဝ်ညေခူ၊ ကေုာံ ကွာန်တၞဟ်မွဲကွာန်တအ်ဂှ် စံၚ်ပလီုဒၟံၚ် ကပေါတ်ညးဍုၚ်ကွာန်ဂမၠိုၚ် ပိုၚ်ပြဳလဝ်တအ်ဂှ်ရ။
ကောန်ဒပ်ကံၚ်ဇြဳပၞာန်ဂှ် ကေတ်ဏာလဝ်ဇွောံမစၞစညးဒေသတအ်တုဲ ကပေါတ်ယိုက်ကေတ်ဏာ ဟွံမာန်တအ်ဂှ် စဵုကဵုစံၚ်ပလီုထောံ နွံဒၟံၚ်ရဂှ် ဥက္ကဋ္ဌကဝ်မတဳအခေါၚ်အရာမၞိဟ် KSCC ဥူဗညာ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
“အတိုၚ်တၚ်ဂၞၚ်ပရိုၚ်ပိုဲဂွံလဝ်ဂှ်တှ်ေ ဒၞာဲပါဲဓလေတ်ဒၟံၚ်ပၞာန် ဗွဲတၟေၚ်တှ်ေ အလန်ဏံမွဲအလန်ဂှ် လ္ပာ်ဗၟံက်ဒဳမအ်ဇြောရလေဝ်။ သွက်ဂွံလုပ်စိုပ်ပလီုပလာ်ဗဒိုပ်ပါဲပၞာန် မၞုံလ္ပာ်ဗၟံက်ဒဳမအ်ဇြောဂှ်ဂးတုဲတှ်ေ ပိုဲဂွံမိၚ်လဝ်နွံရ။ ဂွံမွဲၝောံတဲ သီမွဲၝောံတဲဟီုဂှ် နွံဒၟံၚ်။ ပလီုယန္တရာဏောၚ်။ ပလီုပလာ်ပိုန်ဂြပ်ညးဍုၚ်ကွာန်ဏောၚ်။ ပလီုပလာ်ဇွောံမဏောၚ်။ သီုကဵုမၞိဟ်တအ်လေဝ် ပလီုပလာ်ဏောၚ် ကၠောန်ဒၟံၚ်ဗီုပြၚ်ဏံ ဟီုစဂွံရ။ မုဒှ်ရောတှ်ေ ဇွောံမစၞစလ္ၚဵုဂှ် ဍေံတအ်ကလေၚ်ယိုက်ကေတ်ဏာလဝ်နွံရ ၝယိုက်ကေတ်ဏာဟွံဂွံ ယိုက်ဟွံမာန်ဂှ်တှ်ေ ဖံက်ဖျေံတုဲ ဗက်ပက်ဂြာတ်ပရးလဝ် ပ္ဍဲဇိုၚ်ဂၠံၚ်ရ။ လ္ၚဴတအ်၊ ၜဲတိတအ်၊ သြောံတအ်ဂှ်တှ်ေ ညံၚ်ဂွံလီုအာဂးတုဲ ဗက်ကြုဲလဝ်ကီု၊ စဝ်စုတ်ကၠေၚ်ဓာတ်တုဲ စံၚ်ထောံကီု၊ ပိုဲဂွံညာတ်ကေတ်လဝ်ရ”ဂှ် ဥူဗညာ ဟီုသ္ဂးလဝ်ရ။
ပလီုပလာ်ဒၟံၚ် ပိုန်ဒြပ်ညးဍုၚ်ကွာန်တအ် ဗီုလၟုဟ်ဏံဂှ် ခ.မ.ရ – ၅၁၆၊ ခ.မ.ရ – ၅၁၅ ကေုာံ ခ.ရ.လ – ၁၂ တအ်ကၠောန်သ္ပလဝ်ရဂှ် ညးဟီုသ္ဂးလဝ်ရ။
ကြဴနူဒပ်ပၞာန်သီအဝဵုတုဲ ပ္ဍဲတွဵုရးကရေၚ်ဍာဲ လၟိဟ်မၞိဟ် မၞုံၜိုတ်(၃)ကိုတ်ဂှ် ညးဒေသ(၂)ကိုတ်ပြၚ် ဒးပါဲဒဴဒၟံၚ်ဘဲပၞာန်တုဲ သွက်ညးပါဲဘဲပၞာန်တအ်ဂှ် နွံဒၟံၚ်ပၟိက်ကဵုအရီုဗၚ်ရဂှ် ဓမံက်ထ္ၜးလဝ် ပ္ဍဲပရိုၚ်ဒေသဂှ်ရ။
ပ္ဍဲတွဵုရးကရေၚ်ဍာဲဂှ် ပ္ဍဲဂိတုမာတ်ချ်မွဲဂိတု ဟိုတ်နူကံၚ်ဇြဳပၞာန်တုဲ သ္ၚိဌာန်ညးဍုၚ်ကွာန်တအ်(၂၂၈)မ ဒးတူပၟတ် လီုလာ်ကၠုၚ်လဝ်ကီု။ ဘာလကျာ် (၂)ဘာ၊ ဘာဗ္တောန်လိက် (၃)ဘာ ကေုာံရုၚ်ဂဥုဲပွိုၚ်တိုက် ဒဝ်တမဂျဳ ဒးလီုလာ်လဝ်ရဂှ် KNDF လလောၚ်တြးလဝ်ရ။
သ္အာၚ်နူဏံပၠန် ပ္ဍဲတွဵုရးကရေၚ်ဍာဲဂှ် ဟိုတ်နူကံၚ်ဇြဳပၞာန်တုဲ ညးဍုၚ်ကွာန်(၁၀၅)တၠ ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် AAPP ရ။
ပရိုၚ်- သြၚ်လောန်တိုၚ်(မ်)
ဗီုရုပ် – CJ