မေန်တာတ်-ဨဗြဴ(၂၅)
ပ္ဍဲမွဲကာလရပ်လွဟ်ပၠန်ဂတး ဗတိုက်ကဵုဒပ်ပၞာန်သီအဝဵု ပွိုၚ်(၂)သၞာံဏံ ဟိုတ်နူ CDF Mindat တုဲ ကောန်ဒပ်ကံၚ်ဇြဳပၞာန်(၄၅၄)တၠ ဒးချိုတ်လဝ်ရဂှ် ဒပ်စဵုဒၞာချေၚ် CDF Mindat လလောၚ်တြးလဝ် ပရိုၚ်ရ။
ပ္ဍဲတၚ်လလောၚ်တြး တ္ၚဲစၟတ်သမ္တီပၠန်ဂတးရပ်လွဟ်ချေၚ် ပေၚ်(၂)သၞာံ ကၠုၚ်စိုပ် ပ္ဍဲဂိတုဨဗြဴ စၟတ်တ္ၚဲ(၂၄) တ္ၚဲဏံဂှ် ကဵုလဝ်သမ္တီသာ်ဏံရ။
နူဂိတုဨဗြဴ စၟတ်တ္ၚဲ(၂၄) သၞာံ ၂၀၂၁ တုဲကၠုၚ်တေံဂှ် ကြဴနူကံၚ်ဇြဳပၞာန်ရပ်ကေတ်လဝ် ညးဍုၚ်ကွာန်(၇) တၠ ချူဒၟံၚ်မအက္ခရ် “NUG” ဗကပ်ဗဗေၚ်မသက္ကုမၞိဟ် ပ္ဍဲဂတမုက်ရုပ်ဓရိုတ် သ္ကိုပ်ဗိုလ်၊ ပ္ဍဲဍုၚ်မေန်တာတ်တုဲဂှ် ညးဒေသတအ် ကလေၚ်ပၠန်ဂတးကၠုၚ် နကဵုလွဟ် ၜိုတ်ဒှ်ကဵုဒှ်ရဂှ် ကဵုလဝ်သမ္တီ ပ္ဍဲတၚ်လလောၚ်တြး CDF Mindat ရ။
ပ္ဍဲမွဲကာလ ကၠောန်ကၠုၚ်ပရေၚ်ပၠန်ဂတးရပ်လွဟ် ပွိုၚ်(၂)သၞာံဏံ အကြာဒပ်ကံၚ်ဇြဳပၞာန်ကဵု CDF Mindat တအ် ပေါဲဗတိုက်ဆေၚ်မုက် (၂၁၈) ဝါ က္တဵုဒှ်လဝ်ရဂှ် ဂွံတီကေတ်ရ။
ပ္ဍဲပေါဲဗတိုက်တအ်ဂှ် ဟိုတ်နူကံၚ်ဇြဳပၞာန်တုဲ ကောန်ဒပ်စဵုဒၞာကောန်ဂကူချေၚ် (၅၅)တၠ ဒးသၠးပူဇဴဏာလမျီု သွက်ဍုၚ် သွက်ညးဍုၚ်ကွာန်တအ်ရဂှ် ဟီုသ္ဂးလဝ်ရ။
ကြဴနူဒပ်ပၞာန်သီအဝဵု ပ္ဍဲကၟိန်ဍုၚ်ဗၟာတုဲ ဟိုတ်နူကံၚ်ဇြဳပၞာန် ဗတိုက်ကဵုက္ၜၚ်ကျာကီု၊ ပန်ဖျေံလဝ်လွဟ်ဇၞော်ကီု သီုကဵုဟိုတ်နူကရောၚ်ပၞာန်ဗလးမုက်တိတုဲ ညးဒေသချေၚ်ဂမၠိုၚ် (၁၀၁)တၠ ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲ AAPP ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CDF Mindat