လ္ဂုၚ်၊ ဨပရဴ (၂၆)
ဂကောံညးစၞး မေဿတာဗာန်ကဳမန် ညးအုပ်ကာနာနာကုလသမဂ္ဂတြေံ မသ္ကိုပ်သ္ကဂှ်ဝွံ ကၠုၚ်ဍုၚ်ဗၟာတုဲ ဒဒှ်မဆဵုဂဗလဝ်ကဵု က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်ဝွံ ပ္တိတ်ထ္ၜးစ မၞိဟ်ပရံရောၚ်ဂှ် သမ္မတယာယဳ NUG ဒူဝါလယှဳလ ပါ်ပါဲလဝ်ရ။
ပ္ဍဲကဵုကောံဓရီုအလဵုအသဳ အလဵုအသဳညဳသၟဟ်ဂကူ (NUG) မရနုက်ကဵု (၁၆) ဝါ မကၠောန်ဗဒှ်လဝ် ပ္ဍဲဂိတုဨပရဴ (၂၅) ဂှ် သမ္မတယာယဳ NUG ပါ်ပါဲလဝ် လ္တူလၟေၚ်တရဴဍုၚ်ဗၟာ မေဿတာဗာန်ကဳမန် သာ်ဏံရ။
သမ္မတယာယဳဂှ် လၟေၚ်တရဴမေဿတာဗာန်ကဳမန်ဝွံ ပ္တိတ်ထ္ၜးစ ကံၚ်ဇြဳပၞာန် မဂစိုတ်ဂယိုၚ်ပျဲပျာံဒၟံၚ် လမျီုဒြပ်ရတ်ညးဍုၚ်ကွာန်တံ ကြာန်န် ပ္ဍဲကဵုစၚ်ဂၠးတိတုဲ နကဵုဒ္ဂေတ်ဝတ်မ္ဂးလေဝ် ဟွံဒးရးစှ်ေကဵုသၞောတ်ဗ္ၜတ်ပုဟ်ဂှ် ပါ်ပါဲလဝ်ရ။
သ္အာၚ်နူဂှ်ပၠန် ညးစၞး ဂကောံဍုၚ်နာနာဂမၠိုၚ်ဝွံ ဗီုပြၚ်ဂ္စါန်ဒၟံၚ် သွက်ဂွံသၠေံသၠန် ညံၚ်ကံၚ်ဇြဳပၞာန် ဂွံယေန်သၞာၚ်ဂှ် နွံတုဲ ပ္ဍဲအလဵုအသဳကၠာတေံ အဆက်က်ဂှ်လေဝ် ဟိုတ်နူကၠောန်လဝ်သာ်ဏံဂှ်ရ သ္ကဵုတၠအဝဵုပၞာန် အာယုက်ဂၠိၚ်ကၠုၚ်လဝ်ဂှ် ဒးစွံသတိရောၚ် သာ်ဝွံ ဖ္တိုက်ဖ္အောဝ်လဝ်ရ။
နကဵုကောန်ဂကောံ အလဵုအသဳ NUG ညံၚ်ကံၚ်ဇြဳပၞာန် ၜေတ်လုပ်ပ္ဍဲဂၠးတိဏံ ဟွံမာန် သုၚ်စောဲအစောံစရာဲကလုတ်တမာန်တံတုဲ သွက်ဂွံဆက်ဂ္စါန်အာဂှ်ကီု၊ ဘဝညးဍုၚ်ကွာန် မ္ဒးဒုၚ်ဂစိုတ်ဂယိုၚ်၊ ဒးဒုၚ်ပျဲပျာံဒၟံၚ်လၟေၚ်တ္ၚဲတံဂှ် ဂွံသတိဗှ်သၞာတုဲ ညံၚ်ညးဂၠးတံ ဂွံကၠိုဟ်ဂှ် ဒးကၠောန်သ္ပဏောၚ် သာ်ဝွံ သမ္မတယာယဳ ဒူဝါလယှဳလ ဖ္တိုက်ဖ္အောဝ်လဝ်ရ။
မေဿတာဗာန်ကဳမန်ဂှ် လၟေၚ်တရဴဍုၚ်ဗၟာညးဝွံ သွက်ဂွံဖအိုတ်ကၠေံ ပွပကီုပရာပ်တံမာန်ဂှ်ကဵု သွက်ဂွံဂၠါဲကဵုဂၠံၚ်တရဴ မပ္တန်ပ္တူ အလဵုအသဳဒဳမဝ်ကရေဇြဳမလုပ်သၞောဝ် သီုညးဖအိုတ် မဒုၚ်တဲမာန်တံဂှ်ကီု ပ္ဍဲအရာသောၚ်ကလး ပြသၞာဍုၚ်ဗၟာဂှ် သွက်ဂွံကၠောန်သ္ပဆဵုဂဗသဳကၠဳ ကုအလဵုအသဳညဳသၟဟ်ဂကူ NUG ဂှ် ဖ္တိုက်ဖ္အောဝ်လဝ်ရောၚ် သ္ဂးရ။
ပ္ဍဲလၟေၚ်တရဴ မေဿတာဗာန်ကဳမန် မကၠုၚ်စိုပ်လဝ် ဍုၚ်ဗၟာ နူဂိတုဨပရဴ (၂၃) စဵုကဵု (၂၄) ပွိုၚ် (၂) တ္ၚဲဂှ် ဆဵုဂဗလဝ်ကဵု သမ္မတတြေံ ဥူတိၚ်ဇြုၚ်၊ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်တံရောၚ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−NUG