ညးအုပ်ဓုပ်ကွာန်အစေန် ပွိုၚ်ဍုၚ်ရေဝ် ကေုာံ ကောန်ဂကောံပၞာန်ညးဍုၚ်ကွာန်တံ ဒးဒုၚ်

ဗ္တိုက်ဗ္တိုဟ်မာၚ်ရေဝ်၊ ဨပရဴ (၂၇)

ပ္ဍဲတွဵုရးဍုၚ်မန်၊ ပွိုၚ်ဍုၚ်ရေဝ် ပ္ဍဲပွဳပွူဗ္ဒါဲကွာန်အစေန်ဂှ် ဗ္တိုဟ်မာၚ်ဗ္တိုက်လဝ် ညးအုပ်ဓုပ်ကွာန်အစေန် မဂေတ်ဒၟံၚ်ကၚ်အခိၚ်ဗ္တံဂှ်ကဵု ကောန်ဂကောံပၞာန်ညးဍုၚ်ကွာန်တံရောၚ်ဂှ် ဂကောံဒပ်ဒမၠုက်ရေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဨပရဴ (၂၅) ၜိုတ်အခိၚ်ဗ္တံ (၉) နာဍဳဂှ် ဗ္တိုဟ်မာၚ်ဗ္တိုက်လဝ် သီုသ္ကိုပ်အုပ်ဓုပ်ကွာန်အစေန် မဂေတ်ကၠုၚ်ကၚ် နကဵုကွဳလိုန်ဓာတ်ပိဖ္ဍိုက်ဂှ်ကဵု ကောန်ဂကောံပၞာန်ညးဍုၚ်ကွာန် (၇) တၠတံ လ္တူဂၠံၚ်ကွဳစက် အကြာကွာန် အစေန်ကဵု ကွာန်ပါၚ်ၜဳရ။

ဟိုတ်နူဒးဒုၚ်ဗ္တိုက်လဝ်မာၚ်ဂှ်ရ ညးအုပ်ဓုပ်ကွာန်အစေန် ဥူမာၚ်ဥုံဝွံ ကလိဂွံလဝ်ဝပ်ဒးအာကဝေက်မာၚ် ပ္ဍဲထာၚ်ဒဳတုဲ ဂကောံပၞာန်ညးဍုၚ်ကွာန်မသၟေဟ်တံဂှ် ဇီုကပိုက်ကလိဂွံဝပ်ဟွံမွဲမွဲသာ် ဗလးအာလဝ်ရောၚ်ဂှ် ညးမၞုံတာလျိုၚ် ဂကောံဒပ်ဒမၠုက်ရေဝ် ဗိုလ်ကျာန်ယျေတ် ဟီုဂးလဝ်ရ။

ဥူမာၚ်ဥုံ သ္ကိုပ်အုပ်ဓုပ်ကွာန်အစေန် မကလိဂွံလဝ်ဝပ်ဒးကဝေက်မာၚ်ဂှ် ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ရေဝ်ရောၚ် ညးသ္ဂးရ။

အတိုၚ်ဂလာန်ညးဒေသတံဂှ်မ္ဂး ညးအုပ်ဓုပ်ကွာန်အစေန် ကေုာံ ကောန်ဂကောံပၞာန်ညးဍုၚ်ကွာန်တံ ဒးဒုၚ်ဗ္တိုဟ်မာၚ်ဂှ်ဝွံ ဒဒှ်ရဍာံပြဂှ်ကဵု ဟိုတ်နူဒှ်အခိၚ်ဗ္တံဂှ်ရ အကာဲအရာကလိဂွံဝပ် နွံ၊ ဟွံမွဲဂှ် ဟွံဂွံတီကေတ်ပုဟ်ရောၚ် သ္ဂးအိုတ်ရ။

ကြဴနူလၟေၚ်ဒဒှ်ဏံတုဲ ပ္ဍဲဂိတုဨပရဴ (၂၆) အခိၚ်နူဂယးဂှ် ဒပ်ကံၚ်ဇြဳပၞာန် ဇြဟတ်ဒပ် ဗ္ဒါဲ (၁၀၀) ပါဂှ်ဝွံ နကဵုကွဳစက်ဇက်တိ (၅) ဖ္ဍိုက် တတ်အာကွာန်အစေန်တုဲ စှ်ေအာ လ္ပာ်ကွာန်ပါၚ်ၜဳရောၚ်ဂှ် ဂွံတီကေတ် ဇရေၚ်ညးဒေသတံရ။

တုဲကၠုၚ် ပ္ဍဲဂိတုဨပရဴ (၁၃) တေံဂှ်လေဝ် ကောန်ဂကောံပၞာန်ညးဍုၚ်ကွာန် မၞုံဒၟံၚ်ပ္ဍဲရုၚ်သ္ကိုပ်အုပ်ဓုပ်ကွာန်ပါၚ်ၜဳတံ ဒးဒုၚ်ဗ္တိုက်လဝ်တုဲ ကရောံပၞာန်ညးဍုၚ်ကွာန် (၂) တၠဂှ် ညးသၟတ်ဒေသ (၁) တၠပါလုပ်လဝ်ကီု အပံၚ်ဖအိုတ် (၃) တၠ ချိုတ်အာလဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Social Media