သ္ၚိဒၟံၚ်၊ စမြိုၚ် အလုံမွဲကၟိန်ဍုၚ် ဒးဒုၚ်ကၟာတ်ဒၞာလဝ် စဵုကဵု ၇၅၀ မပြၚ်နွံကၠုၚ်

မတ်မလီု၊ ဨဗြဴ(၂၆)

ပ္ဍဲကၟိန်ဍုၚ်ဗၟာဂှ် နူသၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ (၁) ဒပ်ပၞာန်သီအဝဵုတုဲ စဵုကဵုဂိတုမာတ်ချ် စၟတ်တ္ၚဲ (၃၁)သၞာံဏံ သ္ၚိဒၟံၚ်၊ စမြိုၚ် ဒးဒုၚ်ကၟာတ်ဒၞာလဝ် စဵုကဵု (၇၅၀) မပြၚ် နွံကၠုၚ်ရဂှ် ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP) လလောၚ်တြးလဝ် ပ္ဍဲဂိတုဨဗြဴ စၟတ်တ္ၚဲ (၂၅)ဏံရ။

အတိုၚ် AAPP ဟီုသ္ဂးလဝ်မ္ဂး အပံၚ်လၟိဟ် ပရေၚ်ပိုၚ်ပြဳကပေါတ်အဇာဇၞော် ပါလုပ် သီုသ္ၚိဒၟံၚ်၊ စမြိုၚ် ဒးဒုၚ်ကၟာတ်ဒၞာလဝ် အောန်အိုတ် ၇၅၀ မတအ်ဂှ် ကံၚ်ဇြဳပၞာန် ပ္တဝ်လဝ်ကဵု ညးချဳဒရာၚ်ကတိုၚ်ကၟဟ်ပရေၚ်ဒဳမဝ်ကရေဇြဳတအ် အဓိကရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

သ္ၚိဌာန်၊ စမြိုၚ် ဒးဒုၚ်ကၟာတ်ဒၞာသီကေတ်လဝ်ကီု သီုကဵုပရေၚ်ပိုၚ်ပြဳဂမၠိုၚ်တအ်ဂှ် ဒှ်ပရေၚ်ပိုၚ်ပြဳ ညးချဳဒရာၚ်ကတိုၚ်ကၟဟ် ပရေၚ်ဒဳမဝ်ကရေဇြဳ ကေုာံ ကောန်အရာပ်တအ် ၆၃၆ တၠတအ်တုဲ ပ္ဍဲကဵုဂှ် မၞိဟ်(၃၀၀)တၠဂှ်မ္ဂး ဒှ်အမာတ်ကၠတ်ထဝ်၊ ဒှ်ကောန်ဗော်ဒဳမဝ်ကရေဇြဳကောန်ဂကူ ကေုာံ ဒှ်ညးထံက်ဂလာန်ကဵု ဗော်ဒဳမဝ်ကရေဇြဳကောန်ဂကူ ပါလုပ်ဒၟံၚ်ရ။

ပရေၚ်ကၟာတ်ဒၞာသီကေတ်လဝ်တအ်ဂှ် ဟိုတ်နူထံက်ဂလာန်ကဵု ဇြဟတ်ကဵု ပရေၚ်ချဳဒရာၚ်ကၟဟ် ဒဳမဝ်ကရေဇြဳတုဲ ညံၚ်ဂွံရပ်ကေတ် ညးပိုၚ်ပြဳလဝ်ပိုန်ဂြပ်တအ် ရန်လဝ်တုဲ ဆက်စပ်ကဵုပရေၚ်ရပ်ကေတ်နတဲဂမၠိုၚ် က္တဵုဒှ်ဒၟံၚ် မွဲခနမွဲခနရဂှ် AAPP ဟီုသ္ဂးလဝ်ရ။

ပရေၚ်ကံၚ်ဇြဳပၞာန်သီကေတ်လဝ် ၄၇ တၟံကၠံတအ်ဂှ် ဒှ်ပရေၚ်ပိုၚ်ပြဳ ညးဆေၚ်ဆက်ကဵုဗော်ဒဳမဝ်ကရေဇြဳကောန်ဂကူ NLD ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး AAPP ရ။

ပ္ဍဲကၟိန်ဍုၚ်ဗၟာဂှ်မ္ဂး မွဲကာလဒပ်ပၞာန်သီအဝဵုဏံ ကံၚ်ဇြဳပၞာန်ပြိုက်ဂစိုတ်လဝ် ညးဍုၚ်ကွာန် (၃၀၀၀)ပြၚ်တုဲ ရပ်ကေတ်လဝ်မၞိဟ် (၂၀,၀၀၀)ပြၚ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံမၚ်မၚ်ရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP) ရ။

ပရိုၚ်- သြၚ်လောန်တိုၚ်(မ်)

ဗီုရုပ် -CJ