မတ်မလီု၊ ဨပရဴ (၂၇)
ပ္ဍဲတွဵုရးဍုၚ်မန် ပ္ဍဲထံၚ်စာတ်ဗဟဵုကျာ်မြဟ်ဂှ် ဟိုတ်နူဗ္ၜတ်ဂမ္တဴသ္ကာတ်မြဟ် မက္တဵုဒှ်ဒၟံၚ်အခိၚ်လၟုဟ်ဂှ်တုဲ ကောန်ထံၚ်ပရေၚ်ဍုၚ်ကွာန်ဗွဲမဂၠိုၚ် ၜိုန်ရဂမ္တဴလုပ် ဒှ်ဒၟံၚ်ယဲတံနွံကီုလေဝ် ဟွံဂွံအခေါၚ်လွဳလွတ်အိုတ်ပုဟ်ဂှ် ညးမစုက်လုက်ကဵု ထံၚ်စာတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူဂမ္တဴလုပ်တုဲ ကောန်ထံၚ်ပရေၚ်ဍုၚ်ကွာန် ဟွံအောန်နူကဵု (၇၀) တၠ က္တဵုဒှ်ဒၟံၚ်ယဲတုဲ ဟိုတ်နူဟွံဂွံပရေၚ်မၚ်မွဲရံၚ်စံၚ် ပရေၚ်ထတ်ယုက်တံဂှ်ရ ဒးဆေၚ်ဒၟံၚ်မုက် ကုအကာဲအရာပရေံပရေံတံရောၚ်ဂှ် ညးမစုက်လုက်ကဵု ထံၚ်စာတ်မွဲတၠ ဟီုရ။
“ဗ္ဒမ်လ္ပာ်အပ္ဍဲဂှ် ကၟဳသောတ်ဂှ် မုမှဖ္ဍာန်လဝ်ဟွံမွဲပုဟ်။ က္တဴကွေံကွေံဏောၚ်။ ပက်ဍာ်လၟုဟ် ကအ်လၟုဟ်ရ။ အေ ဂှ်တှ်ေ ပိုယ်တံဂှ် (၁၁) နာဍဳ (၁၅) မိနေတ်တှ်ေ စကၟာတ် ဒဵုကဵု (၂) နာဍဳ။ အခိၚ်ဏံဟီုတှ်ေ ပ္ဍဲကဵုဗ္ဒမ်ဂှ် ဗီုလဵုဂွံဟီုရောဟီုတှ်ေ ညံၚ်စုတ်လဝ်ပ္ဍဲခရိုၚ်တုဲ ဒးဒုၚ်ဒၟံၚ်ဘဲဒဏ်ဂမ္တဴရ။ လၟုဟ် အေဒၞါဲဂှ် မၞိဟ်လ္ၚဵုတံဂှ် ဟိုတ်နူဂမ္တဴလောန်အာတုဲ ဂမ္တဴလုပ်ဂွံတုဲ မၞိဟ်ဒှ်အာယဲဂှ်ဂၠိုၚ်ဒၟံၚ်ဏောၚ်။ မၞိဟ်မံၚ်စပရေံအာ ဟိုတ်နူအသိၚ်ဂမ္တဴဂှ် ပ္ဍဲကဵုကောန်ထံၚ်ပရေၚ်ဍုၚ်ကွာန်ဂှ်တှ်ေ မၞိဟ်မံၚ်စပရေံသၟးဂှ် ၜိုတ် (၇၀) နွံဏောၚ်။ ပရေၚ်မၚ်မွဲပရေၚ်ထတ်ယုက်ဂှ် ပ္ဍဲကဵုညးတံတှ်ေ မုမှဟွံကဵုပုဟ်။ ပရေံဒၟံၚ်အိုတ်ဍာ်ရ။ အခိၚ်လၟုဟ်ဂှ် ဂအုပ်ရုၚ်ဂဥုဲထံၚ်ဂှ်လေဝ် ဒှ်မၞိဟ်ပြံၚ်ကၠုၚ် နူကဵုဒပ်ပၞာန်ဟီုတှ်ေ သာပရေံရ” သာ်ဝွံ သ္ဂးရ။
ကောန်ထံၚ်ပရေၚ်ဍုၚ်ကွာန် ဒှ်ဒၟံၚ်ယဲတံဂှ် ကံၚ်ဇြဳပၞာန် ဟွံကဵုအခေါၚ်လွဳလွတ်တုဲ နူကဵုသ္ၚိကၟိန်ဂမၠိုၚ် ယဝ်ရပလံၚ်နၚ် ဂဥုဲဇဗ သွက်ပရေၚ်ထတ်ယုက်မ္ဂးလေဝ် ဟိုတ်နူဟွံကဵုအခေါၚ်ပၠောပ် အပ္ဍဲထံၚ်ဂှ်ရ ဒးဒုၚ်ဍဵုဍိုက်ဒၟံၚ် ပရေံပရေံရောၚ် မဒှ်ရ။
ကောန်ထံၚ်ပရေၚ်ဍုၚ်ကွာန်တြေံမွဲတၠဂှ်လေဝ် ပ္ဍဲကဵုထံၚ်စာတ်တံဂှ် ပွမမၚ်မွဲရံၚ်စံၚ်ပရေၚ်ထတ်ယုက်တံဂှ် ဟွံကဵုလးလးတုဲ ဇၟာပ်ပ်ယဲဘဲက္တဵုဒှ်ဂှ် ကဵုဒၟံၚ် ပါရာသဳတမဝ် ကေုာံ ဘာမဳတောန်တံသၟးဂှ်ရ နကဵုကောန်ထံၚ်ပရေၚ်ဍုၚ်ကွာန်ဂမၠိုၚ် ပရေၚ်ထတ်ယုက်ဟွံခိုဟ်မ္ဂး ဇကုရေၚ်သ္ကအ်ရဟေၚ် ဒးရီုဗၚ်ဒၟံၚ်ဂှ် ဟီုရ။
“ပရေၚ်မၚ်မွဲရံၚ်စံၚ်ပရေၚ်ထတ်ယုက်တံဂှ် ဇြဳရိုဝ်ရဏောၚ်။ မုမှဟွံကၠောန်ကဵုပုဟ်။ ကောန်ထံၚ်ပရေၚ်ဍုၚ်ကွာန်တံဟီုတှ်ေ သာပရေံရ။ ဒှ်ယဲပဿဴဍာတ်လေဝ် ပါရာသဳတမဝ်၊ ဘာမဳတောန်ရဏောၚ်။ ဆီၜေတ်တှ်ေလေဝ် ပါရောသဳတမဝ်၊ ဗာမဳတောန်ရဏောၚ်။ ဇကုဂမ္တဴလေဝ် ပါရာသဳတမဝ်၊ ဘာမဳတောန်ရဏောၚ်။ ဗုၚ်ဂိလေဝ် ပါရာသဳတမဝ်၊ ဘာမဳတောန်ရဏောၚ်။ ယဲဘဲသီုဖအိုတ်ဂှ် ကဵုဂဥုဲၜါဂကူဏံဓဝ် ယဝ်ရဗၠးမံၚ်တှ်ေ ဆေၚ်ဂဥုဲဂမၠိုၚ် ဟွံဒးပံက်ညးသ္ကအ်အိုတ်ရ။ ကောန်ထံၚ်ပရေၚ်ဍုၚ်ကွာန်ဂှ်တှ်ေ မုဒှ်ဒှ် ဟွံဂတးကျောဝ်ပုဟ်။ ပ္ဍဲကဵုကောန်ထံၚ်ပရေၚ်ဍုၚ်ကွာန်တံ ယဲဒှ်ဒှ်၊ ဂိဒှ်ဒှ်၊ မုကၠောန်န် မၞိဟ်ဇကုကဵုဇကု မနွံဒၟံၚ်အပ္ဍဲတေံရေၚ်သ္ကအ်ဂှ် အ္စာဂဥုဲလ္ၚဵုဂှ်နွံဒၟံၚ်။ နူကဵုအ္စာဂဥုဲ မဒးလဝ်ထံၚ်တံဂှ် ၜိုတ်သ္ပမာန် ဒးရီုဗၚ်ထ္ၜလဘိုက်ဒၟံၚ်ညးသ္ကအ်အိုတ်ရ။ ရုၚ်ဂဥုဲပ္ဍဲထံၚ်ဂှ်တှ်ေ မုမှထံက်ပၚ်ကဵု ပေၚ်ၚ်ဟွံမွဲပုဟ်။ အခိၚ်ရာသဳက္တဴက္တာန်ဏံ သွက်ကောန်ထံၚ် မၞုံအပ္ဍဲထံၚ်တေံဂှ်တှ်ေ ညံၚ်နရက်ဂျိုၚ်ၚ်ရ” သာ်ဝွံ သ္ဂးရ။
ကံၚ်ဇြဳပၞာန်ဝွံ ကုကောန်ထံၚ်ပရေၚ်ဍုၚ်ကွာန်တံဂှ် ပ္ဍဲကဵုထံၚ်စာတ်တေံ ဟွံကဵုပရေၚ်မၚ်မွဲပရေၚ်ထတ်ယုက်တံသၟးဟွံက သီုကဵုကၠောန်သ္ပဝးပ္ကဝ်ဒၟံၚ် အခေါၚ်အရာမၞိဟ် နကဵုနဲကဲစုၚ်ဇဳတုဲ မွဲဏှမွဲဏှဟီုဂွံ ကၠောန်သ္ပဍဵုဍိုက်ပျဲပျာံၜုၚ်တက်ဒၟံၚ်ရ။
သ္အာၚ်နူဂှ်ပၠန် စၞစ၊ ဂဥုဲဇဗ ကေုာံ ကပေါတ်အရပ်အစပ် နူကဵုကောန်သ္ၚိကၟိန် ကောန်ထံၚ်ပရေၚ်ဍုၚ်ကွာန်တံ မပလံၚ်နၚ်တံဂှ်လေဝ် သ္ဇိုၚ်ဝန်ထံၚ် သၟဝ်တဲကံၚ်ဇြဳပၞာန်တံ ဟွံကဵုပေၚ်ၚ်မွဲသာ် ကၠတ်ဂၠံက်ကေတ်အကြာတံလေဝ် နွံဒၟံၚ်ဂှ် ကောန်ထံၚ်ပရေၚ်ဍုၚ်ကွာန်တံ ဟီုရ။
ညးတာလျိုၚ်မွဲတၠ နူဌာနက္ဍိုက်ပ်တွဵုရးဍုၚ်မန် ကံၚ်ဇြဳပၞာန်ဂှ် အပ္ဍဲထံၚ်စာတ်ဂမၠိုၚ် ဒၟါနူဗ္ၜတ်ဂမ္တဴသ္ကာတ်မြဟ်တုဲ ကောန်ထံၚ် ဂမ္တဴလုပ်ဒှ်ယဲတံဟွံမွဲတုဲ ပရေၚ်မၚ်မွဲရံၚ်စံၚ်ပရေၚ်ထတ်ယုက်တံဂှ်လေဝ် ကဵုဒၟံၚ်အတိုၚ်လၟေၚ်ၚ်ရောၚ်ဂှ် သ္ဂးရ။
ပ္ဍဲတွဵုရးဍုၚ်မန်ဂှ် စွံလဝ်ကောန်ထံၚ်ပရေၚ်ဍုၚ်ကွာန်တံ ပ္ဍဲကဵုထံၚ်စာတ်ဗဟဵုကျာ်မြဟ်တုဲ ကောန်ထံၚ်ပရေၚ်ဍုၚ်ကွာန်တြုံ (၂၁၀) ပြၚ် ကေုာံ ကောန်ထံၚ်ပရေၚ်ဍုၚ်ကွာန်ဗြဴ (၉၀) ပြၚ် မဒးဒုၚ်ရပ်လဝ် နကဵုၝောံပိုဒ်ပရေၚ်ဍုၚ်ကွာန် နူကဵုလ္ဂုၚ်၊ မာန္တလေဝ်၊ ဗဂေါ၊ တွဵုရးကရေၚ်၊ တွဵုရးဍုၚ်မန်တံကီု နူကဵုဌာန်ဒေသနာနာတံ နွံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai