စကၠောန်ဗဒှ်ကၠုၚ် ကောံဓရီုသဳကၠဳကောန်ဂရေတ် KNU၊ ပရေၚ်ပြံၚ်သၠာဲ က္ဍိုပ်သ္ကိုပ်ကဆံၚ်လတူ နွံဟွံမာန်

မတ်မလီု၊ ဨဗြဴ(၂၇)

ဟိုတ်နူအကာဲအရာယဲကပ်ဂိုဝ်ဝေတ် ကေုာံ အကာဲအရာပရေၚ်ဍုၚ်ကွာန် ပရေၚ်ပၞာန်တအ်တုဲ ကောံဓရီုသဳကၠဳကောန်ကရေတ် ဗော်သွးကောန်ဂကူကရေၚ် KNU မရနုက်ကဵု (၁၇) ဝါ ဒးဒုၚ်ပဆုဲပြံၚ်ကၠုၚ်လဝ်ဂှ် ဃောကၠောန်ဗဒှ်ဒၟံၚ်ပ္ဍဲဂိတုဨဗြဴ သ္ပတမ်နူစၟတ်တ္ၚဲ(၂၄) ဏံတုဲ အတိုၚ်ဗလးအကာဲအရာလၟုဟ်မ္ဂး ပရေၚ်ပြံၚ်သၠာဲက္ဍိုပ်သ္ကိုပ်ကဆံၚ်လ္တူ နွံဟွံမာန်ရဂှ် တမ်ရိုဟ်တၚ်ဂၞၚ်ပရိုၚ် KNU သ္ၚဳဂၠိပ်ဟီုသ္ဂးလဝ်ရ။

ကောံဓရီုကောန်ကရေတ် KNU မကၠောန်ဗဒှ်လဝ် ပ္ဍဲသၞာံ ၂၀၁၇ အလန်လကြဴအိုတ်ဂှ် (၄)သၞာံမွဲလန် ၜိုန်ရဒးကၠောန်ဗဒှ်ကီုလေဝ် ဟိုတ်နူအကာဲအရာယဲကပ်၊ အကာဲအရာပရေၚ်ဍုၚ်ကွာန်၊ အကာဲအရာပၞာန်တအ်တုဲ ဒးပဆုဲပြံၚ်ကၠုၚ် ပရေၚ်ကၠောန်ဗဒှ်ကောံဓရီု ဂၠိုၚ်ၚ်ကဵုဝါရ။

ကောံဓရီုသဳကၠဳ KNU ကၠောန်ဗဒှ်လၟုဟ်ဏံဂှ် ဟိုတ်နူအကာဲအရာပၞာန်တုဲ နကဵုဗီုပြၚ်ညးစၞး နူခရိုၚ်၊ ဒပ်မဟာသီုဖအိုတ်တအ် ကၠောန်ဗဒှ်ဆေၚ်မုက်ဟွံမာန်တုဲ ကၠောန်ဗဒှ်အာ နကဵုသၞောတ်အောန်လာၚ်ဒှ်တုဲ ပ္ဍဲပေါဲကောံဓရီုသဳကၠဳဏံဂှ် ပွမသ္ၚဳဂၠိပ်သၞောဝ်သ္ဇိုၚ်ဥပဒေ ကေုာံ သဳကၠဳလၟေၚ်ကမၠောန် ပရေၚ်ပၞာန်၊ ပရေၚ်ဍုၚ်ကွာန်၊ ပွမကလေၚ်ရုဲစှ်ပ္တိုန် ပ္ဍဲဒၞာဲသွာၚ်က္ဍိုပ်သ္ကိုပ်ဂမၠိုၚ် နွံဒၟံၚ်ရ။

စပ်ကဵုအကာဲအရာကၠောန်ဗဒှ်ကောံဓရီုသဳကၠဳ ဗော်သွးကောန်ဂကူကရေၚ် KNU မရနုက်ကဵု (၁၇)ဝါတုဲ ၜိုန်ရဆက်စၠောံသၟာန်လဝ်ကဵု သွာၚ်က္ဍိုပ်သ္ကိုပ်လ္ၚဵု ကေုာံညးမၞုံအခေါၚ်ဟီုဂးတအ်ကီုလေဝ် ပြဟ်ဟ်လၟုဟ်ဏံ ဒုၚ်တဲဟီုသွဟ်ကဵုလဝ် ဟၟဲဏီရ။

လၟုဟ်ဏံမ္ဂး ပ္ဍဲဗော်သွးကောန်ဂကူကရေၚ် KNU ဂှ် ဂအုပ်သ္ကိုပ်ဗိုလ်ဇၞော် သဝ်မူတူသေဖိုဝ် နဒဒှ်ဥက္ကဋ္ဌကီု၊ ပဒိုဝ်သဝ်ကွေဝ်ထူဝေန် နဒဒှ်ဒုဥက္ကဋ္ဌကီု၊ ပဒိုဝ်သဝ်တာဒိုဝ်မူ နဒဒှ်ညးအုပ်ကာနာနာကီု၊ ဂအုပ်သ္ကိုပ်ဗိုလ်ဇၞော်ဂျဝ်နဳ နဒဒှ်သ္ကိုပ်က္ဍိုက်က္ဍိုပ်ပၞာန် ညးလုပ်ဂကောံဂမၠိုၚ်

ကေတ်တာလျိုၚ် ရေၚ်တၠုၚ်ဒၟံၚ်ရ။

အခိၚ်လၟုဟ်ဏံ ဃောကၠောန်သ္ပဒၟံၚ် ကောံဓရီုသဳကၠဳ KNU ဂှ် မွဲလ္ပာ်ပၠန်လေဝ် ပ္ဍဲကဵုတိဍာ် မပ္တံကဵုခရိုၚ်ဘာပန် ဒပ်မဟာ(၅)၊ ခရိုၚ်ညံၚ်လေဝ်ပေန် ဒပ်မဟာ(၃) ၊ ခရိုၚ်ဒူပလာယာ ဒပ်မဟာ(၆) မဒှ်တိဍာ်ထိၚ်ဒဝ် KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်သ္ကာတ်မြဟ်ဒၟံၚ်တုဲ ဒပ်ကံၚ်ဇြဳပၞာန် ကၠောန်သ္ပဒၟံၚ် ပရေၚ်ပန်ပှော်လွဟ်ဇၞော်ကီု သီုကဵုပန်ဒၟံၚ်ကဵုက္ၜၚ်ကျာ ကြပ်အရိုဟ်ဒဒှ်တ္ၚဲရ။

ပရိုၚ်- သြၚ်လောန်တိုၚ်(မ်)

ဗီုရုပ် – KNU