ၜဳကလေၚ်၊ ဨဗြဴ(၂၇)
တွဵုရးဍုၚ်မန်၊ ဍုၚ်ၜဳကလေၚ်၊ ရုၚ်ဌာနက္ဍိုက်က္ဍိုပ်အကံက်အခေါန်အပ္ဍဲဍုၚ် မၞုံအရာပ်ကာန်တာယျာဂှ် ဟိုတ်နူဒးဒုၚ်ဗတိုက်လဝ်ကဵုကမ်လှောဝ်တုဲ စမြိုၚ်ဂမၠိုၚ် ဇီုကပိုက်ဒးလီုလာ်လဝ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဨဗြဴ တုဲကၠုၚ် စၟတ်တ္ၚဲ(၂၆) အခိၚ်နူဂယး ၜိုတ်(၁)နာဍဳဂှ် ဒပ်ပံၚ်ကောံ ဒပ်စဵုဒၞာညးဍုၚ်ကွာန်တအ် ကၠုၚ်စိုပ်ဗတိုက်လဝ် ရုၚ်ဌာနက္ဍိုက်က္ဍိုပ်အကံက်အခေါန်အပ္ဍဲဍုၚ် ပွိုၚ်ဍုၚ်ၜဳကလေၚ် နကဵုကမ်လှောဝ်ရ။
ဟိုတ်နူရုၚ်ဌာနက္ဍိုက်က္ဍိုပ်အကံက်အခေါန်အပ္ဍဲဍုၚ် ဒးဒုၚ်ဗတိုက်လဝ်ကဵုကမ်လှောဝ်တ်တုဲ ကၟိုၚ်ဍိုတ်ရုၚ် သၠဖ္ဍာန်ဂတမုက်ကီု သီုကဵုလ္ပာ်ပ္ဍဲစမြိုၚ်လ္ၚဵုဂှ် ၜိုန်ရဒးဇီုကပိုက်လီုလာ်လဝ်ကီုလေဝ် ပရေၚ်မၞိဟ်ဇီုကပိုက် ဒးလဝ်ဟၟဲရ။
ကောန်သ္ဂံၚ်ဒပ်စဵုဒၞာညးဍုၚ်ကွာန်မွဲတၠဂှ်မ္ဂး ရုၚ်အကံက်အခေါန်အပ္ဍဲဍုၚ်ဂှ် ဟိုတ်နူဒှ်ရုၚ်ဂၠာဲကဵုဒၟံၚ်သြန် သွက်ကံၚ်ဇြဳပၞာန်အဓိကဂှ်ရ နဒဒှ်ကဵုသတိ ကၠောန်သ္ပလဝ် ပရေၚ်ဖံက်ခတိုဟ် အခိၚ်ဗ္တံရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴနူရုၚ်အကံက်အခေါန် ဒးဒုၚ်ဗတိုက်လဝ်တုဲဂှ် ဒပ်ကံၚ်ဇြဳပၞာန် ကၠုၚ်စၟဳစၟတ်လဝ်ကီု ဂၠံၚ်လုပ်တိတ်ဍုၚ် ပ္ဍဲဒၞာဲလ္ၚဵုဂှ်မ္ဂး ကၟာတ်ဒၞာစၟဳစၟတ်ဒၟံၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုဖေဖဝ်ဝါရဳ စၟတ်တ္ၚဲ(၁)တုဲကၠုၚ်တေံလေဝ် ဟိုတ်နူရုၚ်အုပ်ဓုပ်ကွာန်ဇြုပ်တုပ်(ဇုတ်သုတ်) ဒးဒုၚ်ဖံက်ခတိုဟ်လဝ်ကဵုမာၚ်တုဲ သီုစမြိုၚ်ရုၚ်မွဲ သီုဖအိုတ် ပရေၚ်ဒးခရိုဟ်လီု ကေၚ်ဒှ်ကၠုၚ်လဝ်ရ။
ပ္ဍဲဍုၚ်ၜဳကလေၚ်ဂှ် ကြဴနူဒပ်ပၞာန်သီအဝဵုတုဲ ဟိုတ်နူကောန်ဒပ်ကံၚ်ဇြဳပၞာန်၊ ဒလာန်ကဵုပရိုၚ်တအ် ဒးဒုၚ်ဗတိုက်ဒၟံၚ် မွဲခနမွဲခနတုဲ ဒှ်ပွိုၚ်ဍုၚ် ကံၚ်ဇြဳပၞာန်လလောၚ်တြးလဝ် မၞိဟ်တြုံၜါတၠ ဍိုက်အာကွဳလိုန်ဓာတ်မွဲစွံဟွံဂွံ မွဲပွိုၚ်ဍုၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – Lin Nay
sanlontai