ရပ်ဂွံလဝ် PDF ခယာန် (၇)တၠ သီုကဵုလွဟ်လက်နက်ရဂှ် ကံၚ်ဇြဳပၞာန်လလောၚ်တြး

လဂိုၚ် – ဨဗြဴ (၂၇)

ရးဒေသလဂုၚ်၊ ရပ်ဂွံလဝ် ကောန်ဒပ် PDF ဖျေံသ္ဇိုၚ်ပွိုၚ်ပွိုၚ်ဍုၚ်ခယာန် (၇)တၠ သီုကဵုလွဟ်လက်နက်မကမ်ရဂှ် ကံၚ်ဇြဳပၞာန် လလောၚ်တြးလဝ် ပရိုၚ်ရ။

ဂိတုဨဗြဴ စၟတ်တ္ၚဲ(၁၉) တုဲကၠုၚ်တေံဂှ် ပွိုၚ်ဍုၚ်သြေၚ်(သန်လျၚ်) ပ္ဍဲဗ္ဒာဲကွာန်ၜိုပ်ထဝ်(ပေါက်တော)ဂှ် စရပ်ကေတ်လဝ် (၁)တၠတုဲ ကြဴနူဂှ် မၞိဟ်သှ်ေဂမၠိုၚ်တအ် ရပ်ကေတ်လဝ် ပ္ဍဲမုဒိတာအိမ်ရာ ပွိုၚ်ဍုၚ်ကုန်မြာၚ်(၃)တၠ ကေုာံ ပွိုၚ်ဍုၚ်ဒဵုပုၚ်(၃)တၠရဂှ် လလောၚ်တြးလဝ်ရ။

သီဂွံလဝ် လွဟ်လက်နက် နူကဵုဂကောံ PDF ခယာန်တအ်ရဂှ် ၜိုန်ရဓမံက်ထ္ၜးလဝ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာဟွံမာန်ဏီရ။

ဂိတုဨဗြဴ စၟတ်တ္ၚဲ(၂၂)ဂှ်မ္ဂး နူလ္ပာ် PDF ခယာန်ဂှ် ဒဒှ်ရကောန်ဒပ် ဒးဒုၚ်ရပ်လဝ် (၆)တၠရဂှ် ၜိုန်ရလလောၚ်တြးလဝ် နဒဒှ်ကာတၟေၚ်ကီုလေဝ် ဒးဒုၚ်ရပ်ဏာသီုလွဟ်လက်နက်ဟီုဂှ် ဟီုသ္ဂးလဝ်ဟၟဲလဝ်ရ။

စပ်ကဵုအကာဲအရာဏံတုဲ နကဵုသြၚ်လောန်တိုၚ်(မ်)ၜိုန်ရပ္တိတ်လဝ်ဇြဟတ် သွက်ဂွံဆက်စၠောံသၟာန် PDF ခယာန်ကီုလေဝ် ဆက်စၠောံဟွံဂွံလဝ်ရ။

ဒပ်ဒၞာ ဂတမုက်ရုၚ် လ.ဝ.က ပွိုၚ်ဍုၚ်ခယာန်ဂှ် ဂိတုဨဗြဴ စၟတ်တ္ၚဲ (၁၄) ပ္ဍဲတ္ၚဲအတးစှ်ေဂှ် ကြဴနူ PDF ခယာန်ဗတိုက်လဝ်တုဲ ဒးဒုၚ်ရပ်ကၠုၚ်ဒၟံၚ် ဗီုလၟုဟ်ဏံ အဆက်က်ရဂှ် ညးဒေသတအ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

ပရိုၚ်-သြၚ်လောန်တိုၚ်(မ်)

ဗီုရုပ် – MRTV