ကဗလူ – ဨဗြဴ(၂၇)
ရးဒေသသေတ်ဂါၚ် ပွိုၚ်ဍုၚ်ကဗလူ ကွာန်လုပ်လၟိဟ် ဂကောံကွာန်ပဇြဳဂျဳ (၃)ကွာန်တအ်ဂှ် ကြဴနူဒပ်ကံၚ်ဇြဳပၞာန် လုပ်စိုပ်စံၚ်ပလီုလဝ်တုဲဂှ် ရပ်ကော်ဏာလဝ် ကောန်ညးဍုၚ်ကွာန်မံၚ်ဒၟံၚ်ပ္ဍဲကွာန်ဂှ် ဟွံအောန်နူ(၁၅)တၠရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကံၚ်ဇြဳပၞာန်ဂှ် ကြဴနူစံၚ်ပလီု ကွာန်ပဇြဳဂျဳ၊ ချောၚ်တာ ကေုာံ လေဝ်တွောန်ဇြေန်တအ်တုဲ ကေတ်ဏာလဝ် ကပေါတ်ကညောတ် ညးဍုၚ်ကွာန်တအ်ရဂှ် ဂွံတီကေတ်ရ။
ဟိုတ်နူဒပ်ကံၚ်ဇြဳပၞာန်စံၚ်ပလီုလဝ်တုဲ သ္ၚိပ္ဍဲကွာန်ဂှ်ဗွဲမဂၠိုၚ် ဒးလီုလာ်အာလဝ်တုဲ ၜိုတ်ဂလိုၚ်လဵု ဇီုကပိုက်ဒးလဝ်ရောဂှ် ဟိုတ်နူအကာဲအရာတိဍာ်တုဲ ဟွံဂွံတီကေတ်ဏီရဂှ် ညးဒေသမွဲတၠ ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲကဵုကောန်ကွာန်လေဝ်တွောန်ဇြေန် ကံၚ်ဇြဳပၞာန်ရပ်ကေတ်ဏာလဝ် (၁၅)တၠတအ် ကလေၚ်ဗၠးတိတ်ကၠုၚ်လဝ် (၃)တၠရဂှ် ဂွံတီကေတ်တုဲ ဟွံဂွံတီကေတ် အကာဲအရာညးသှ်ေၜက်ဒၟံၚ်တအ်ဏီရဂှ် ညးဟီုသ္ဂးလဝ်ရ။
ဟိုတ်နူကရောၚ်ပၞာန်ကံၚ်ဇြဳ ဇြဟတ်ပါလုပ်ဒၟံၚ်(၂၀၀)တၠဂှ်တုဲ ကွာန်ပ္ဍဲပွိုၚ်တိုက်မလေဝ်(မလည်) (၈)ကွာန်ပြၚ် ဒးဂြိပ်ဒဴဒၟံၚ်တုဲ ညးဒေသ(၈၀၀၀)တၠပြၚ် ဒးဂြိပ်ဒဴဒၟံၚ်ကီု နွံဒၟံၚ်ပၟိက်ကဵုအရီုဗၚ်ရဂှ် ညးရီုဗၚ်ကဵုဒၟံၚ် ပရေၚ်ညးပါဲဘဲပၞာန်မွဲတၠ ဟီုသ္ဂးလဝ်ရ။
“ဂြိပ်ဒၟံၚ်ဂှ်တှ်ေ ပ္ဍဲသၠာတ်ရ ကၟဳဗ္ဒၚ်လေဝ်ဟၟဲပုဟ်။ ဥတုရာသဳလေဝ် ကတဴက္တာန်ကွေံကွေံ။ လၟုဟ်တှ်ေ မၞိဟ်ပရေၚ်ထတ်ယိုတ်ဟွံခိုဟ်လေဝ် ဂၠိုၚ်ကၠုၚ်ဒၟံၚ်တုဲ။ ဗွဲမဂၠိုၚ်တှ်ေ ဒၟာနူဓာတ်ဍာ်ကှ်တုဲ ဟွံမိက်ချဳဒရာၚ်ကဵု ဒၟာနူဥတုရာသဳပရာန်ကာတ်တုဲ ကောန်ၚာ်သၟတ်တအ် ဂမ္တဴခ္ဍတ်တိတ် မံၚ်ဟွံမိပ်ဒှ်ဒၟံၚ် ညးသ္ကအ်ရ”ဂှ် ညးကဵုဒၟံၚ်ရီုဗၚ် ညးပါဲပၞာန်မွဲတၠ ဟီုသ္ဂးလဝ်ရ။
သ္အာၚ်နူဂှ်ပၠန် သွက်ညးပါဲဘဲပၞာန်တအ်ဂှ် နွံဒၟံၚ်ပၟိက်ကဵု ဂဥုဲဇဗ ကေုာံကၟဳဗ္ဒၚ်ဗွဲအဓိကတုဲ ဟိုတ်နူပရေၚ်ဝါတ်ဍာ်အှော် ကေုာံဥတုရာသဳက္တဴက္တာန်လောန်တုဲ ဒးဆေၚ်ဒၟံၚ်မုက်ကဵု အခက်ခုဲဍာ်သုၚ်ဍာရပ်စပ် ဗွဲမဂၠိုၚ်ရဂှ်ဂွံတီကေတ်ရ။
ဂိတုဨဗြဴ တုဲကၠုၚ်စၟတ်တ္ၚဲ(၁၁)တေံ ဟိုတ်နူဂြာတ်ထောံဖျေံလဝ် ဗုမ်ပ္ဍဲကွာန်ပဇြဳဂျဳတုဲ ညးဍုၚ်ကွာန် ၁၆၀ ပြၚ်ဒးချိုတ်လဝ်ကီု သ္ပတမ်နူ ဂိတုဨဗြဴ စၟတ်တ္ၚဲ (၁၉)တုဲ ဟိုတ်နူထ္ပက်ကၠုၚ်ကရောၚ်ပၞာန် ပ္ဍဲပွိုၚ်တိုက်မလေဝ်တုဲ ညးဍုၚ်ကွာန်ဂမၠိုၚ် ဒးဂြိပ်ဒဴဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ (အကာဲအရာကွာန်ပဇြဳဂျဳကံၚ်ဇြဳပၞာန်ဂြာတ်ထောံဖျေံလဝ်ဗုမ်တုဲ)
sanlontai