လဂုၚ်၊ ဨဗြဴ (၂၇)
ပ္ဍဲသတ္တာဟဏံ လၟိဟ်မၞိဟ်ယဲ စၟယဲကိုဝ်ဝေတ်မၞုံ ဂၠိုၚ်တိုန်ကၠုၚ်တုဲ လၟိဟ်မၞိဟ်ယဲ သ္ပလဝ်ဒ္တန်ဂမၠိုၚ် ပ္ဍဲဂိတုဨဗြဴ စၟတ်တ္ၚဲ(၂၅)မွဲတ္ၚဲဓဝ်ဂှ် စဵုကဵု (၇၁)တၠ နွံကၠုၚ်ဒၟံၚ်ရဂှ် ဌာနဝန်ဇၞော်ရေၚ်ထတ်ယိုတ် သၟဝ်တဲကံၚ်ဇြဳပၞာန် လလောၚ်တြးလဝ် ပ္ဍဲတ္ၚဲဏံရ။
စရၚ်ညးယဲဂိုဝ်ဝေတ် သ္ပလဝ်ဒ္တန် ပ္ဍဲဂိတုဨဗြဴ စၟတ်တ္ၚဲ(၂၃)ဂှ် (၄၅) တၠ၊ ဨဗြဴ (၂၄)ဂှ် (၅၁)တၠ နူကဵုဂှ် လၟုဟ်လကြဴအိုတ်ဏံ သွဟ်စၟဳစၟတ်လဝ် ပ္ဍဲဂိတုဨဗြဴ စၟတ်တ္ၚဲ(၂၅)ဏံ မၞိဟ်ယဲသ္ပလဝ်ဒ္တန် စဵုကဵု(၇၁)တၠနွံကၠုၚ်ဒၟံၚ်ရ။
ဟိုတ်နူကလေၚ်ဆဵုညာတ်ကေတ်မၞိဟ်ယဲ မၞုံကဵုစၟယဲဂိုဝ်ဝေတ် သိၚ်သိၚ်ကြဳကြဳဗီုလၟုဟ်ဏံဂှ်ရ ဒးပရဟ်ဒုၚ်ပလေဝ်ပလေတ်ဒၟံၚ် သွက်ယဲဂိုဝ်ဝေတ်ရဂှ်လေဝ် ဂကောံပရဟိတရီုဗၚ်ဟံၚ်ပြာ်တအ် ဟီုသ္ဂးကၠုၚ်အိုတ်ရ။
“ကိုဝ်ဝေတ် ဒှ်ဒၟံၚ်ညိညဂှ် လအ်ဒၟံၚ်ယျ။ နူကၠာအတးတေံလေဝ် မၞိဟ်ကၠုၚ်ထ္ၜးယဲ ပ္ဍဲဗ္ဒမ်ဂဥုဲ မၞိဟ်ယဲသံသယဂှ် ဂကောံပိုဲ ပြံၚ်စၠောံကဵုလဝ်ရုၚ်ဂဥုဲ နွံဒၟံၚ်။ ဆ္ဂးဂှ် ဟွံဂွံဒှ်ကၠုၚ်လဝ်ဂၠိုၚ်ၚ်ဏီ။ ပ္ဍဲရာသဳဇွဟ် ကသီုဏံတှ်ေ ဂိုဝ်ဝေတ်ကလေၚ်သ္ကာတ်မြဟ်ကၠုၚ် မွဲအလန်ပၠန်ဏောၚ် ဒးဒှ်ဒၟံၚ်ဓဝိၚ်ရ” ဂှ် သၟာပရဟိတ မၞုံပ္ဍဲဍုၚ်လဂုၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲကဵုတၚ်ဂၞၚ် ဌာနဝန်ဇၞော်ပရေၚ်ထတ်ယိုတ်ကံၚ်ဇြဳပၞာန် လလောၚ်တြးလဝ်ဂှ်မ္ဂး စဵုကဵုလၟုဟ်ဏံ မၞိဟ်ယဲပါ်ဓာတ်စမ်ၜတ်လဝ်ဂိုဝ်ဝေတ် ပံၚ်သီုဖအိုတ် (၆၂၃၄၄၇၆၁)နွံဒၟံၚ်တုဲ တၟံကၠံဆဵုဂဗလဝ်စၟယဲဂှ် နွံဆအယာံမာတ် (၀.၄၇)တၟံကၠံရဂှ် ဟီုသ္ဂးလဝ်ရ။
နကဵုညးဍုၚ်ကွာန်တအ်ညးဂမၠိုၚ် ပ္ကာန်ကဵုယဲဂိုဝ်ဝေတ်မွဲစွံတုဲ(Living with COVID) ပ္ဍဲအရာမံၚ်စံၚ်ဂှ် ဒးဒ္ဂေတ်ဗက်နဲကဲဗီုပြၚ်မံၚ်စံၚ် ဗီုပြၚ်တၟိရောၚ်ဂှ် ဟီုသ္ဂးလဝ်ရ။
သ္အာၚ်နူဂှ်ပၠန် အတိုၚ်တၚ်ဆဵုဂဗသုတေသနမ္ဂး ပ္ဍဲညးထ္ပက်လဝ်ဂဥုဲစဵုဒၞာဂိုဝ်ဝေတ်-၁၉ တအ်ဂှ် ဖ္အောန်ယှအ်ဖျေံကဵု ပွယဲသ္ကာတ်မြဟ်၊ ပွမဒးတိုန်လွဳလွတ် ပ္ဍဲရုၚ်ဂဥုဲ ကေုာံ ပွမဒးချိုတ်တအ်မာန်တုဲ နပွမထပ်ထ္ပက်ဗက်ဂဥုဲဗွက်လကြဴဂှ် သာတုဲ ဖ္အောန်ယှအ်ဖျေံကဵု ပွယဲသ္ကာတ်မြဟ်၊ ပွမဒးဒုၚ်လွဳလွတ်ပ္ဍဲရုၚ်ဂဥုဲ ကေုာံပွမဒးချိုတ်မာန်ရောၚ် ဂွံဆဵုကေတ်လဝ်ရဂှ် ဟီုလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- Reuters
sanlontai