ညံၚ်ဟွံဂွံသုၚ်စောဲဂၠံၚ် ဒဒန်ထီုမၠဵုကျာ်မြဟ်−ကျုံကွယ်−နွတ်အံက်ဂှ် KNDO လလောၚ်ပ္တိတ်

ကျာ်မြဟ်၊ ဨပရဴ (၂၇)

ဟိုတ်နူဒပ်ကံၚ်ဇြဳပၞာန် ဗပေၚ်ကၠုၚ်ဇြဟတ် အပ္ဍဲတိဍာ် တမ်ဒပ် (၆) ဂကောံဒပ်စဵုဒၞါကောန်ဂကူကရေၚ် KNDO ဂှ်တုဲ နကဵုညးဍုၚ်ကွာန်တံ လ္ပသုၚ်စောဲသ္ကုတ်ဂၠံၚ် ဒဒန်ထီုမၠဵုကျာ်မြဟ်−ကျုံကွယ်−နွတ်အံက် တံအိုတ်ဂှ် လ္ပာ်တမ်ဒပ် KNDO တမ်ဒပ် (၆) လလောၚ်ပ္တိတ်ကဵုလဝ်သမ္တီရ။

ကောန်ဂကောံဒပ်ကံၚ်ဇြဳပၞာန်တံဝွံ ကေတ်စဵုဒၞါကဵုညးဍုၚ်ကွာန်တံတုဲ နူကဵုဂၠံၚ်ဒဒန်ထီုမၠဵု−ကျုံကွယ်−နွတ်အံက်တံဂှ်မွဲကဆံၚ် ဆက်ဗပေၚ်ဒၟံၚ် ဇြဟတ်ဒပ် အပ္ဍဲကဵုတိဍာ် တမ်ဒပ် (၆) တံရောၚ်ဂှ် သ္ဂးရ။

ဟိုတ်ဂှ်ရ နကဵုညးဍုၚ်ကွာန်တံ ပပ္တံနူဂိတုဨပရဴ (၂၃) တုဲ နူကဵုဗ္တံ (၇) နာဍဳ စဵုကဵု နူဂယး (၆) နာဍဳ ညံၚ်ဟွံဂွံသုၚ်စောဲ သ္ကုတ်ဂၠံၚ်ဒဒန်ထီုမၠဵုကျာ်မြဟ်−ကျုံကွယ်−နွတ်အံက်တံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂမၠိုၚ်ရ။

ဒပ်ကံၚ်ဇြဳပၞာန်ဝွံ ကွဳသၠာ ၁၂ ဂှ်ပလီုရုပ်တုဲ လုပ်စိုပ်ကၠုၚ် အပ္ဍဲတိဍာ် KNDO တုဲ လဆောဝ်လဆောဝ် သုၚ်စောဲကွဳစက်သ္ၚိတံတုဲ လုပ်စိုပ်ကၠုၚ်နွံဒၟံၚ်ဂှ်ရ နကဵုညးဍုၚ်ကွာန်တံ ပ္ဍဲအရာဒဳကွဳစက်တံဂှ်လေဝ် ဖျေံဒ္ၚေါဝ်တုဲ သွက်ဂွံဒဳကဵုအိုတ်ဂှ် ပရိုၚ်တမ်ရိုဟ် တမ်ဒပ် (၆) KNDO တံ ဟီုရ။

လုကဴဟွံဂွံလလောၚ်ပ္တိတ် တၚ်လလောၚ်တြး မကလေၚ်ရုပ်သီဂှ်မ္ဂး ဒှ်ဒတန်တုဲ သွက်ဂွံစဵုဒၞါ နူကဵုကံၚ်ဇြဳပၞာန် မသ္ပဒၞန်ကေတ်စဵုဒၞါ ပ္တိတ်ဒၟံၚ်ပရဲ ကုတၚ်နွံပၟိက်ညးဍုၚ်ကွာန်တံမာန်ဂှ်ကီု၊ အလုံညးဍုၚ်ကွာန်မွဲ သွက်ဂွံပံၚ်တောဲရီုဗၚ်ကဵုအိုတ်ဂှ်လေဝ် တမ်ဒပ် (၆) KNDO ဒုၚ်လဝ်ဂုဏ် နမေတ္တာရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Social Media