ဗဒိုပ်ဗၠာဲသၟိၚ်ကြုကပေါဝ်(ကၚ်မွန်ချောၚ်း) ဒးဒုၚ်ဗတိုက်လဝ်ကဵုဒရုမ်တုဲ ဗ္ဒမ်လိုၚ်တူအာပၟတ်၊ ကောန်ဒပ်ဗၠာဲသၟိၚ်(၃)တၠ ဒးလဝ်ဝပ်

ကျာ်ထဝ်၊ ဨဗြဴ(၂၉)

တွဵုရးဍုၚ်မန် ပွိုၚ်ဍုၚ်ကျာ်ထဝ် ဗဒိုပ်ဗၠာဲသၟိၚ်ကြုၚ်ကပေါဝ်(ကၚ်မွန်ချောၚ်း) မၞုံတမ်ဒဵုကျာ်ဣသိယဵုဂှ် ဒးဒုၚ်ဗတိုက်လဝ် နကဵုဒရုမ်တုဲ ကောန်ဒပ်ဗၠာဲသၟိၚ်ကံၚ်ဇြဳပၞာန် (၃)တၠ ဒးလဝ်ဘဲဝပ်တုဲ ဗ္ဒမ်လိုၚ်လ္ၚဵု တူပၟတ် ဒးလီုလာ်လဝ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂိတုဨဗြဴ စၟတ်တ္ၚဲ (၂၇) အခိၚ်ၜိုတ်(၄)နာဍဳဂှ် ဗဒိုပ်ဗၠာဲသၟိၚ်ကြုၚ်ကပေါဝ် ကောန်ဒပ်ကံၚ်ဇြဳပၞာန်တအ် ဖျေံလဝ်ဗဒိုပ်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် အာဗတိုက်လဝ် နကဵုဒရုမ် (၂)ဖ္ဍိုက်ရ။

ဟိုတ်နူပရေၚ်ထောံဖျေံဗုမ် နကဵုဒရုမ်တုဲ ပ္ဍဲဗဒိုပ်ဗၠာဲသၟိၚ်ဂှ် ပရေၚ်ပါ်ခတိုဟ်က္တဵုဒှ်လဝ်ကီု ပ္ဍဲကဵုဗ္ဒမ်လာၚ် သိုၚ်လဝ် သွက်ဗၠာဲသၟိၚ်ဗြဴယာယဳဂှ်လေဝ် ပၟတ်တူ ဒးလီုလာ်လဝ်ရဂှ် ဂွံတီကေတ်ရ။

ကြဴနူပရေၚ်ဗတိုက်ပန်ပှ်ောဂှ်တုဲ ဃောဂကောံပလိုတ်ပၟတ်တအ် ကၠုၚ်ပလိုတ်ဒၟံၚ်ပၟတ် ဗ္ဒမ်လာၚ်ပၟတ်တူဒၟံၚ်ဂှ် ဒပ်ပံၚ်ကောံ KNLA ကၠုၚ်စိုပ်ဗတိုက်လဝ် နကဵုဒရုမ် အလန်ဒုတိယရ။

ဟိုတ်နူပရေၚ်ပန်ပှော်ဏံတုဲ ကောန်ဒပ်ကံၚ်ဇြဳပၞာန် ဒးလဝ်ဘဲဝပ် (၃)တၠတုဲ လ္ပာ်ကံၚ်ဇြဳပၞာန် ၜိုန်ရပန်လဝ်ဂၠံၚ်တရဴဒရုမ်ကၠုၚ်ဂှ်ကီုလေဝ် ပရေၚ်ဇီုကပိုက်ဒး လ္ပာ်ဒပ်ပံၚ်ကောံတအ် ဟၟဲရဂှ် ဂွံတီကေတ် နူဒပ်ပံၚ်ကောံရ။

ဗဒိုပ်ဗၠာဲသၟိၚ်ကြုၚ်ကပေါဝ်ဂှ် ကြဴနူဒပ်ပၞာန်သီအဝဵုတုဲ ဒးဒုၚ်ဗတိုက်လဝ် ဗၞတ် (၆)ဝါတုဲ ပရေၚ်ဗတိုက်ပန်အလန်ဏံ ဒှ်ပရေၚ်ဇီုကပိုက် ဒးလီုလာ်လဝ်ဂၠိုၚ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်- CJ