ရုၚ်ဗော် NLD ဂမၠိုၚ် ဒးဒုၚ်လုပ်စိုပ်ၜက်ၜေတ် ဒးဒုၚ်ပလီုတံ နွံကၠုၚ် စဵုကဵု (၁၀၂) ဝါ

လ္ဂုၚ်၊ ဨပရဴ (၂၉)

သီုရုၚ်ဗဟဵု ဗော် NLD ကီု သီုကဵုရုၚ်ဗော် မၞုံပ္ဍဲရးဒေသ ကေုာံ တွဵုရး (၇) တံဂှ် ဒးဒုၚ်လုပ်စိုပ်ၜက်ၜေတ် ဒးဒုၚ်ပလီုပလာ်လဝ်တံ နွံကၠုၚ် စဵုကဵု (၁၀၂) ဝါရောၚ် ဒုဥက္ကဌ ဗော် NLD ပွိုၚ်ဍုၚ်သာန်ချံၚ် ဥူဗိုဝ်ဝ်ဥူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

နူသၞာံ ၂၀၂၁ ဂိတုဖေဖဝ်ဝါရဳ ပရေၚ်ပၞာန်သီအဝဵု မက္တဵုဒှ်လဝ်တေံ စဵုကဵုသၞာံဏံ ဂိတုဨပရဴဂှ် ပ္ဍဲကဵုရုၚ်ဗဟဵု ဗော် NLD ဂှ် (၃) ဝါ၊ ပ္ဍဲရုၚ်မၞုံရးဒေသဇၞော် ကေုာံ တွဵုရးတံဂှ် (၈) ဝါ၊ ပ္ဍဲရုၚ်ခရိုၚ်တံဂှ် (၅) ဝါ၊ ပ္ဍဲရုၚ်ပွိုၚ်ဍုၚ်တံဂှ် (၆၆) ဝါ၊ ပ္ဍဲရုၚ်မၞုံပ္ဍဲအရာပ်တံဂှ် စဵုကဵု (၂၀) ဝါ ဒးဒုၚ်လုပ်စိုပ်ပလီုပလာ်လဝ်ရ။

မွဲလ္ပာ်ပၠန်ဂှ်လေဝ် ဒၟါနူဟွံကၠုၚ်စိုပ်ပ္တိုန်စရၚ် အပ္ဍဲတ္ၚဲမစၟတ်လဝ်ဂှ်တုဲ နူကဵုနဒဒှ်ဗော်ပရေၚ်ဍုၚ်ကွာန်ဂှ် ကမ္မယှေန်ပေါဲရုဲမာဲကၟိန်ဍုၚ်ကံၚ်ဇြဳပၞာန် ပါဲပလီုထောံလဝ် ဗော် NLD ရ။

ကြဴနူပလီုထောံ နဒဒှ်ဗော်ပရေၚ်ဍုၚ်ကွာန်တုဲဂှ် ပ္ဍဲဂိတုမာတ်ချ် (၃၁) တေံ ကောန်ဂကောံကံၚ်ဇြဳပၞာန်ဂမၠိုၚ် နကဵုကယျိုၚ်အရာပ် ကၠုၚ်စိုပ်ပလှ်ဏာလဝ် ဂတဵုမုက် ရုၚ် NLD ပွိုၚ်ဍုၚ်ကမာရတ်ဂှ်တုဲ ပ္ဍဲဂိတုဨပရဴ (၇) အခိၚ်ဗ္တံဂှ်လေဝ် ဂကောံမၞိဟ် သီုကဵုကောန်ဒပ်ကံၚ်ဇြဳပၞာန်တံပါဂှ် ကၠုၚ်စိုပ်ပလီုပလာ်ဏာလဝ် ရုၚ် NLD နူကဵုပွိုၚ်ဍုၚ်ဒံၚ်တာ၊ ရးမာန္တလေဝ်ဂှ်ရ။

သ္အာၚ်နူဂှ်ပၠန် ပ္ဍဲဂိတုဨပရဴ (၂၅) အခိၚ်ဗ္တံ (၇) နာဍဳဂှ်လေဝ် နကဵုကောန်ဂကောံ ပရေၚ်အုပ်ဓုပ်ကောပ်ကာဲပွိုၚ်ဍုၚ် ကံၚ်ဇြဳပၞာန်ကဵု ဇြဟတ်ကောန်ဒပ် ၜိုတ်ၜါဒါဇြိန်ပြၚ် ကၠုၚ်စိုပ်ပလီုပလာ်ဏာလဝ် ရုၚ်ဗော် NLD မၞုံပွိုၚ်ဍုၚ်သာယာဝတဳ၊ ရးဗဂေါတေံဂှ်ရ။

ဒုဥက္ကဌ ဗော် NLD ပွိုၚ်ဍုၚ်သာန်ချံၚ် ဥူဗိုဝ်ဝ်ဥူဂှ် ဇၟာပ်ပ်ပိုန်ဒြပ်အရပ်ရာ ဗော် NLD ဂှ် ဒှ်ပိုန်ဒြပ် ညးဍုၚ်ကွာန်တံဂှ်ရ ပရေၚ်ပလီုပလာ်သာ်ဏံဝွံ ကလိလောန်အမှုရာဇဝတ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဥူဗိုဝ်ဝ်ဥူဂှ် “မၞိဟ်ကၠုၚ်ပလှ် ဂတဵုမုက်ရုၚ်ဗော် NLD ဂှ် ဒှ်ကောန်ရဲ သၟာပကီုပရာပ်တံဏောၚ်။ ဇၟာပ်ပ်ပိုန်ဒြပ် ဗော် NLD ဂှ် ဒှ်ပိုန်ဒြပ်ညးဍုၚ်ကွာန်တံရဏောၚ်။ အရာဍေံတံ မကၠောန်ဒၟံၚ်အိုဿီုဂှ် ဒှ်ပွကလိလောန်ဒၟံၚ် အမှုရာဇဝတ်တံရဏောၚ်” သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဗော်ဂအုပ်ဒဳမဝ်ကရေဇြဳ ကောန်ဍုၚ်အရၚ်သေံ မဒှ်ဗော်ကောန်ဍုၚ်အရၚ်ဇြဟတ်ဇၞော် (SNLD) ဂှ်လေဝ် ကြဴနူဒးဒုၚ်ပလီု နဒဒှ်ဗော်ပရေၚ်ဍုၚ်ကွာန်တုဲဂှ် သွက်ဂွံပလှ်သီထောံ ဂတဵုမုက်ဗော် မၞုံတွဵုရးသေံတံဂှ် ဒးဒုၚ်ကဵုလဝ်ဇြဟတ်ဂရိုဟ်ရောၚ် ပရိုၚ်ဂမၠိုၚ် မံက်တိတ်ဒၟံၚ်ရ။

စပ်ကဵုအကာဲအရာဏံတုဲ နူကဵုသြၚ်လောန်တိုၚ်(မ်) ၜိုန်ရသၟာန်သၟုက်ဆက်စၠောံလဝ် ဇရေၚ်ညးမၞုံအခေါၚ်ဟီုဂး ဗော်ဂအုပ်ဒဳမဝ်ကရေဇြဳ ကောန်ဍုၚ်အရၚ်သေံ (SNLD) သာၚ်လုက်ကီုလေဝ် ဒဵုကဵုအခိၚ်လၟုဟ် ဟွံဂွံအဆက်ဏီရ။

ကံၚ်ဇြဳပၞာန်ဂှ် ပ္ဍဲဂိတုဂျာန္နဝါရဳ သတ္တာဟလက္ကရဴအိုတ်တေံ စၞောန်ပျးလဝ် သၞောဝ်ပ္တိုန်စရၚ်ဗော်ပရေၚ်ဍုၚ်ကွာန်တံတုဲ နကဵုညးမိက်သ္ဂောံဆက်ဒက်ပ္တန်အာ နဒဒှ်ဗော်ပရေၚ်ဍုၚ်ကွာန်တံဂှ် အပ္ဍဲပွိုၚ် (၆၀) တ္ၚဲ သွက်ဂွံကၠုၚ်စိုပ်ပ္တိုန်စရၚ်အိုတ်ဂှ် ကမ္မယှေန်ပေါဲရုဲမာဲ လလောၚ်ပ္တိတ်လဝ်ရ။

ပ္ဍဲကဵုဗော်မၞုံဒၟံၚ် (၉၀) ပြၚ်ဂှ် ဗော် (၅၀) ဗော်ဝွံ သွက်ဂွံဆက်ဒက်ပ္တန် နဒဒှ်ဗော်ပရေၚ်ဍုၚ်ကွာန်ဂှ် ပ္တိုန်လဝ်စရၚ်အိုတ်တုဲ သှ်ေ (၄၀) ဗော်ဂှ် ဟိုတ်နူဟွံပ္တိုန်လဝ်စရၚ်ဂှ်ရ နူကဵုနဒဒှ်ဗော်ပရေၚ်ဍုၚ်ကွာန် လီုအာအလဵုလဵုဍေံရောၚ်ဂှ် ကမ္မယှေန်ပေါဲရုဲမာဲ လလောၚ်တြးလဝ် ပ္ဍဲဂိတုမာတ်ချ် (၂၈) တ္ၚဲပ္တိုန်စရၚ်လက္ကရဴအိုတ်တေံဂှ်ရ။

လ္ဂောံကဵုသၞောဝ်ပ္တိုန်စရၚ် ဗော်ပရေၚ်ဍုၚ်ကွာန်တံဂှ်မ္ဂး ကပေါတ်ကညောတ်ဗော်ပိုၚ် ဗော်ပရေၚ်ဍုၚ်ကွာန် မဒးဒုၚ်ပလီုလဝ်တံဂှ် ဒးပအပ်ကဵု ဌာန၊ ဂကောံဗော်သွး နူကဵုအလဵုအသဳကၟိန်ဍုၚ် မစၟတ်လဝ်တံ ဟွံသေၚ်မ္ဂး အတိုၚ်နဲကဲ မစၞောန်လဝ်တံရောၚ်ဂှ် ထ္မံက်ထ္ၜးလဝ်ရ။

ဆ္ဂး ရုၚ်ဗော် NLD မဒးဒုၚ်ပလီုလဝ် နူကဵုနဒဒှ်ဗော်ပရေၚ်ဍုၚ်ကွာန် မၞုံပ္ဍဲတွဵုရး ကေုာံ ရးဒေသဇၞော်တံဂှ် ဒးဒုၚ်လုပ်စိုပ်ၜက်ၜေတ်လဝ်တုဲ ဒးဒုၚ်ပလှ်ဖျေံလဝ် ဂတဵုမုက်ဗော်တံဂှ်တုဲ ရုၚ်ဗော်ဂမၠိုၚ်လေဝ် ဒးဒုၚ်ပလီုလဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Social Media