ဗဒိုပ်ကံၚ်ဇြဳပၞာန်ဖျေံသ္ဇိုၚ် သၠုၚ်ကျာဍုၚ်ဗြဝတဳ (၃) ဗဒိုပ် ဒးဒုၚ်ဗတိုက်လဝ်

ဗြဝတဳ၊ မေ (၃၀)

တွဵုရးကရေၚ် ဗဒိုပ်ကံၚ်ဇြဳပၞာန်ဖျေံသ္ဇိုၚ် မၞုံသၠုၚ်ကျာဍုၚ်ဗြဝတဳဂှ် ဒပ်ပံၚ်ကောံ KNLA KNDO ကဵု Federal Wings Drone တအ် ချဳဒရာၚ်ဗတိုက်လဝ်တုဲ သီုသ္ကိုပ်တံဒပ်မွဲတၠ လ္ပာ်ကံၚ်ဇြဳပၞာန် ဒးချိုတ်လဝ် (၉)တၠရဂှ် ဂကောံ Federal Wings Drone လလောၚ်တြးလဝ်ရ။

သ္ပတမ်နူ ဂိတုမေ စၟတ်တ္ၚဲ (၂၃)တုဲ ဗဒိုပ်ကံၚ်ဇြဳပၞာန် သ္ကုတ်သၠုၚ်ကျာဍုၚ်ဗြဝတဳ ကုန်ဗျူဟာဝဝ်လေဝ်၊ ကုန်ဗဒိုပ်မဝ်ခဳ ကေုာံ ဗဒိုပ်ကနေဝ်လေဝ်ဂှ် ဂကောံဒပ်ပံၚ်ကောံ KNLA တံဒပ် (၂၀၁)၊ KNDO တံဒပ် (၈) ကေုာံ Federal Wings Drone တအ် ချဳဒရာၚ်ပၞာန် ဗတိုက်လဝ်ရ။

ပ္ဍဲပရေၚ်ပန်ပှ်ောဂှ် သီုကဵုသ္ကိုပ်တံဒပ်ကံၚ်ဇြဳပၞာန် ကနေဝ်လေဝ် (၁)တၠ ဒးချိုတ်လဝ် (၉)တၠရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပ္ဍဲပရေၚ်ပန်ဗတိုက်ဂှ် ကုန်ဗျူဟာဝဝ်လေဝ် ကေုာံဗဒိုပ်မဝ်ခဳ ပါလုပ်ဒၟံၚ် ပ္ဍဲပရေၚ်ဒးဒုၚ်ဗတိုက်လဝ်ဂှ် ၜိုန်ရဇီုကပိုက်လဝ် နွံကီုလေဝ် စရၚ်ဇီုကပိုက်ဒးလဝ် သ္ပလဝ်ဒ္တန် ဟၟဲဏီတုဲ လ္ပာ်ဒပ်ပံၚ်တောဲတအ် ကောန်ဒပ် (၁)တၠ ဒး ဒးလဝ်ဘဲဝပ်ရဂှ် သ္ဂးလဝ်ရ။

ကြဴနူပရေၚ်ပန်ပှ်ော က္တဵုဒှ်လဝ်တုဲဂှ် ဒပ်ကံၚ်ဇြဳပၞာန် ဂြာတ်ထောံဖျေံဗုမ် ပ္ဍဲကွာန်ပနွယ်ဖိုဝ်ကလိုဝ် နွံဗ္ဒာဲဗဒိုပ်မဝ်ခဳ ကဵုက္ၜၚ်ကျာတုဲ သီု ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကွာန်ဇိုၚ်ၚ်ကရပ် ဟွံဆေၚ်စပ်ကဵုပေါဲဗတိုက်တအ် နကဵုလွဟ်ဇၞော်ရဂှ်လေဝ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲကဵုပရေၚ်ပရောဒပ်ကံၚ်ဇြဳပၞာန် ဂြာတ်ထောံဖျေံဗုမ် ပ္ဍဲကွာန်ပနွယ်ဖိုဝ်ကလိုဝ် ကဵုက္ၜၚ်ကျာဂှ် ဘာကျာ်ခရေတ်ယာန်ကေုာံ ဗဝ်ဒါသောၚ် (၁)မွဲမ၊ သ္ၚိဒၟံၚ်(၂)မ ဒးဇီုကပိုက် လီုလာ်လဝ်ရ။

ဟိုတ်နူဂြာတ်ထောံဖျေံဗုမ် ကဵုက္ၜၚ်ကျာတုဲ ညးဒေသ ပ္ဍဲကွာန်တအ် ၂၀၀ ပြၚ်ဂှ် ဒးဂြိပ်ပါဲဓလေတ်ဒၟံၚ် ပ္ဍဲဒၞာဲဗၠးဘဲတုဲ နွံဒၟံၚ်ပၟိကဵု ဇွောံမ စၞစ အရီုဗၚ်ကၟဳဗ္ဒၚ်ဖိုဟ်ဏီရဂှ် ဂကောံအခေါၚ်အရာမၞိဟ်ကရေၚ် KHRG လလောၚ်တြးလဝ်ရ။

ပရိုၚ်- သြၚ်လောန်တိုၚ်(မ်)

ဗီုရုပ်-Federal Wings