ပ္ဍဲဂၠံၚ်ကွဳစက် မတ်မလီု-ရေဝ် ကွဳစက်ပ္ဍိုက်ဗၞိဟ်ၜါဖ္ဍိုက် ဒးဒုၚ်ပန်တုဲ ဒးဒုၚ်စံၚ်ပလီုလဝ် မွဲဖ္ဍိုက်

ဇြပ်ဗု၊ မေ(၃၀)

တွဵုရးဍုၚ်မန်၊ ပွိုၚ်ဍုၚ်ဇြပ်ဗု၊ ပ္ဍဲဂၠံၚ်ကွဳစက် မတ်မလီု-ရေဝ် ဗ္ဒာဲကွာန်အေကမ္ဘာဂှ် ပ္ဍဲဂိတုမေ စၟတ်တ္ၚဲ (၂၉) အခိၚ်နူဂယးဂှ် ကွဳစက်ပ္ဍိုက်ဗၞိက်ၜါဖ္ဍိုက် ဒးဒုၚ်ပန်လဝ်တုဲ ဒးဒုၚ်စံၚ်ပလီုလဝ် မွဲဖ္ဍိုက်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

တ္ၚဲဂှ် အခိၚ်နူဂယး ၜိုတ် ၇ နာဍဳ ကွဳစက်ပ္ဍိုက်ဗၞိက်သၠာ ၆ ဒဳတိုန်ကၠုၚ် နူဍုၚ်ရေဝ် အာလ္ပာ်ဍုၚ်မတ်မလီု (၂) ဖ္ဍိုက်ဂှ် ဒးဒုၚ်ပန်လဝ် ဗ္ဒာဲကွာန်အေကမ္ဘာရ။

ဟိုတ်နူဒးဒုၚ်ပန်လဝ်တုဲ သၟာဒဳကွဳစက်ကဵု ညးဗက်လကြဴတအ် ကၠဟ်စွံလဝ်ကွဳစက် ဂြိပ်ဒဴပါဲဓလေတ် ထောံတုဲ ကွဳစက်ပ္ဍဲဂှ်မွဲဖ္ဍိုက် ဒးဒုၚ်စံၚ်ပလီုလဝ်ရဂှ် ဟီုသ္ဂးလဝ်ရ။

ကွဳစက်ဒးဒုၚ်ပန်လဝ်ဏံ ဒှ်ကွဳစက်ပ္ဍိုက်နၚ်ကပေါတ်တြေံကွဳလိုန်ဓာတ်တုဲ ဟိုတ်နူဒးဒုၚ်စံၚ်လဝ်ဂှ်ရ က္ဍိုပ်ကွဳစက် တူပၟတ်ဒးလီုလာ်လဝ်ရ။

ကွာန်အေကမ္ဘာ ဒၞာဲကွဳစက်ပ္ဍိုက်ဗၞိက် ဒးဒုၚ်ဒုၚ်စံၚ်လဝ်ဂှ် ဒှ်ဒေသ မ္ၚးနူဒပ်ကံၚ်ဇြဳပၞာန်တုဲ ဒပ်ပၞာန်ဗၠးၜးကောန်ဂကူကရေၚ် KNLA ၊ ဒပ်စဵုဒၞာညးဍုၚ်ကွာန် PDF တအ်လေဝ် ချဳဒရာၚ်ဒၟံၚ် ပရေၚ်ပၞာန်ရ။

ပ္ဍဲအကံက်တေဝ်လဳဂရာမ် ဠဝ်ဗဳဒပ်ပၞာန်ဂှ် ဒပ်လ္ပာ် (၄)၊ တံဒပ်လၟိဟ် (၂၇) ၊ ဒပ်မဟာ KNLA (၆) ကၠောန်သ္ပလဝ်ရဂှ် တြးဒၟံၚ်ဝါဒနွံရ။

စပ်ကဵုအကာဲအရာဏံတုဲ ၜိုန်ရသြၚ်လောန်တိုၚ်(မ်) ပ္တိတ်ဇြဟတ် သွက်ဂွံဆက်စၠောံကဵု ညးတာလျိုၚ် ဗော်သွးကောန်ဂကူကရေၚ် KNU ဒပ်မဟာ(၆)ကီုလေဝ် စဵုလၟုဟ်ဏံ ကေတ်အဆက် ဟွံဂွံဏီရ။

ပ္ဍဲဂိတုမေ စၟတ်တ္ၚဲ (၂၆)ဂှ်လေဝ် ပ္ဍဲဂၠံၚ်ကွဳစက် လဂုၚ်-မတ်မလီု ပွိုၚ်ဍုၚ်သဓီု ဂကောံကွာန်မိုဝ်ကောၚ်ဂှ် ကွဳစက်ပ္ဍိုက်ဗၞိက်မွဲဖ္ဍိုက် ဒးဒုၚ်တံၚ်ခတိုဟ်လဝ်မာၚ်တုဲ သၟာဒဳကွဳစက်၊ ညးဗက်လကြဴ ကွဳစက်တအ် ညးၜါ ဒးချိုတ်လဝ်တုဲ ဒးလဝ်ဘဲဝပ်မွဲတၠရဂှ် ဂွံတီကေတ် နူညးဒေသတအ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်- CJ