ကအ်ကြိက်၊ မေ (၃၀)
တွဵုရးကရေၚ်၊ ဍုၚ်ကအ်ကြိက်၊ အရာပ်လၟိဟ် (၇) ၊ ပ္ဍဲကဵုအရာပ်ပ္တိတ်လဝ်တၟိ ခနုၚ်မူဂှ် ဒၟါနူဒးလွဟ် ဇၞော်တုဲ သမ္ဘာတၠသ္ၚိ ၂ တၠ ချိုတ်အာလဝ်ရောၚ် ညးဒေသတံကဵု ဂကောံရီုဗၚ်ဟံၚ်ပြာ်ပရေၚ်မၞိဟ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ (၂၈) အခိၚ်လ္ဒေါဝ်တ္ၚဲ ဥူဖိုဝ်ကျာ အာယုက် (၇၃) သၞာံကဵု ဒဝ်ခေန်မျာတ်ထိုဲ အာယုက် (၅၀) သၞာံ သမ္ဘာတၠသ္ၚိၜါတၠ အခိၚ်စဴကၠုၚ်သ္ၚိ နကဵုကွဳလိုန်ဓာတ်ဂှ် ဒးအာလဝ်လွဟ်ဇၞော်တုဲ ချိုတ်အာလဝ်ရ။
ဟိုတ်နူဒးအာလွဟ်ဇၞော်ဂှ်ရ ဥူဖိုဝ်ကျာဝွံ ကလိဂွံအာဝပ် က္ဍဟ်ထောၚ်ပြိုဟ်အာတုဲ ထာၚ်ဒဳသီုၜါလ္ပာ် ဂှ်လေဝ် ပြောပ်အာကီုတုဲ ညးမဒှ်သမ္ဘာ ဒဝ်ခေန်မျာတ်ထိုဲဂှ် ဒးအာကဝေက်မကမ်လွဟ်ဇၞော် ပ္ဍဲကဵုကအ်၊ ဇိုၚ်၊ တဲတံဂှ်တုဲ ကလိဂွံဝပ်ထောၚ်အာတံ နွံတုဲ ဒးချိုတ်အာလဝ်ရ။
အတိုၚ်ဂလာန်ညးဒေသတံဂှ်မ္ဂး ပ္ဍဲကဵုတ္ၚဲဂှ် အခိၚ်လဒေါဝ်တ္ၚဲဂှ် က္တဵုဒှ်ပေါဲဗ္တိုက်ဟွံမွဲမွဲသာ် လွဟ်ဇၞော် ဒတုံဗ္တိုဟ်ထ္ကးအာလဝ် အပ္ဍဲအရာပ်တၟိ ခနုၚ်မူဂှ်ရ။
ဇွရုပ် သမ္ဘာတၠသ္ၚိ မ္ဒးချိုတ်အာ ဒၟါနူဒးမကမ်လွဟ်ဇၞော်တံဂှ် ဂကောံရီုဗၚ်ပရေၚ်မၞိဟ်တံ ပလံၚ်ဗစိုပ် ကဵုလဝ် ရုၚ်ဂဥုဲကအ်ကြုက်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုမေ (၆) တေံဂှ်လေဝ် ပ္ဍဲကဵုဂၠံၚ်တိတ်ဍုၚ်ကအ်ကြိက် ဒၞါဲကမၠောန်ဖဴဍိုတ်ဂှ် ဒၟါနူမကမ် လွဟ်ဇၞော် ဒတုံဗ္တိုဟ်ထ္ကးအာလဝ်ဂှ်ရ ကောန်ကလောန်ဖဴဍိုတ် (၁) တ ချိုတ်တုဲ (၆) တၠ ကလိဂွံလဝ်ဝပ်ဏီရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai