မတ်မလီု – မေ(၃၀)
ဟိုတ်နူလဗိုတ်ကျာဇြဟတ်သ္ကာတ်မိုဝ်ခါ လုပ်လဝ်တွဵုရးရခေၚ်တုဲ သွက်ဂွံသုၚ်စောဲ ပ္ဍဲကမၠောန်ရီုဗၚ် ဟံၚ်ပြာ် ဒေသဒးဆောံလေၚ်လီုလာ်တအ်ဂှ် ဗော်ဍုၚ်မန်တၟိ ထံက်ပၚ်ကဵုလဝ်ဒါန် (၅၀၀)ကိုတ်ဒကေဝ်ရ။
ဟိုတ်နူလဗိုတ်ကျာမိုဝ်ခါ လုပ်လဝ် ပ္ဍဲဂိတုမေ စၟတ်တ္ၚဲ (၁၄) တုဲကၠုၚ်တေံတုဲ ဍုၚ်မၞုံတွဵုရးရခေၚ်ဗွဲမဂၠိုၚ် ဒးဇီုကပိုက်လီုလာ်လဝ် နွံဂၠိုၚ်ဂၠေၚ်ရ။
အခိၚ်လၟုဟ်ဏံ ဥက္ကဋ္ဌဂကောံဗော်ကောန်ဂကူရခေၚ် သ္ကိုပ်ဗိုလ်ထောန်မျေတ်နိုၚ် က္ဍိုက်က္ဍိုပ်တုဲ ကၠောန်သ္ပကဵုဒၟံၚ် ပရေၚ်ရီုဗၚ်ဟံၚ်ပြာ်ကီု အရီုဗၚ်ဟံၚ်ပြာ် နူပ္ဍဲဍုၚ်မ္ၚးဍုၚ်တအ်လေဝ် သွက်ဂွံကဵု ကၠုၚ်ရီုဗၚ်ဂှ် ဗတိုက်ဖ္အောဝ်လဝ်ရ။
ဂကောံဇြဟတ်ပၠန်ဂတး မိတ်(AA)ဂမၠိုၚ်ကီု သီုကဵုအလဵုအသဳပရေၚ်ညဳသၟဟ်ကောန်ဂကူတအ် သွက်ဂွံကလေၚ်ပ္တန်ပ္တဴ တွဵုရးရခေၚ်ဂှ် အပ်ပြာပ်ကဵုလဝ် အရီုဗၚ်မၞုံပၟိက်ရဂှ်လေဝ် လလောၚ်တြးလဝ်ရ။
ကံၚ်ဇြဳပၞာန်သီအဝဵုဂှ်မ္ဂး ကၠောန်သ္ပကဵုဒၟံၚ် ပရေၚ်ရီုဗၚ်ဟံၚ်ပြာ်ရဂှ် ၜိုန်ရဓမံက်ထ္ၜးဒၟံၚ် ပ္ဍဲမဳဒဳယာတြး ဝါဒဂှ်ကီုလေဝ် စဵုကဵုလၟုဟ်ဏံ ကဵုလဝ်အရီုဗၚ်စိုပ်တရဴ ဟွံမာန်ဏီရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)။
ဟိုတ်နူဘဲဒဏ်လဗိုတ်ကျာတုဲ အခိၚ်ညးဍုၚ်ကွာန်ရခေၚ်တအ် အာစိုပ်ဒၟံၚ်ဒဒိုက်ဂှ် ဒၟာနူဗော်ဍုၚ်မန်တၟိ ထံက်ပၚ်ကဵုလဝ်ဗီုလၟုဟ် နဒဒှ်မိဿဟာပေၚ်ပေၚ်ဂှ် ဂကောံဗော်ကောန်ဂကူရခေၚ် တၚ်ဏာၚ်ဂုဏ် ဇြိုဟ်ဟ်နက်က် ကတိုၚ်ကတိုၚ်ကၟဟ်ကၟဟ်ရဂှ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – ဂကောံဗော်သွးကောန်ဂကူရခေၚ်
sanlontai