သွက်သၞောတ်တၠအဝဵုပၞာန် ဂွံသုန်ဂြာံအာဂှ် KIA ကေုာံ TNLA တံ ပံၚ်တောဲယျ

မိုၚ်ဂျာယာန်၊ မေ (၃၀)

ဂကောံရပ်လွဟ်ကောန်ဍုၚ်အရၚ် ဇြဟတ်ဇၞော် ဂကောံဗၠးၜးကချေၚ် (KIO/KIA) ကဵု ဒပ်ပၠတရဴ ပရေၚ်ဗၠးၜး တွဵုရးပလံၚ် (PSLF/TNLA) တံဝွံ သွက်သၞောတ်တၠအဝဵုပၞာန် ဂွံသုန်ဂြာံအာဂှ် ပံၚ်တောဲရေၚ်တၠုၚ်အာညးသ္ကအ် တုပ်ပ်ဏောၚ်ဂှ် ပ္ဍဲဂိတုမေ (၂၈) တေံ လလောၚ်ပ္တိတ်လဝ် တၚ်လလောၚ်တြးပံၚ်တောဲရ။

ညးစၞး နူကဵုဂကောံ KIA ကေုာံ TNLA တံဝွံ ပ္ဍဲဂိတုမေ (၁၆) ကဵု (၁၇) တုဲကၠုၚ်တေံ ဆဵုဂဗပ္ညဳပ္ညပ်လဝ်ညး သ္ကအ် ပ္ဍဲဒၞါဲဂအုပ်ဌာန်ဒတန် KIA မၞုံ တွဵုရးကချေၚ်၊ ဍုၚ်မိုၚ်ဂျာယာန်ဂှ်တုဲ ကလိဂွံလဝ်တၚ်တုပ်စိုတ် သွက်ဂွံဆက်ရေၚ်တၠုၚ်အာ နကဵုဓဝ်ကၠိုဟ်ခၠၚ်ညးသ္ကအ်ဂှ်ရောၚ် သ္ဂးလဝ်ရ။

လိက်ကသုက်မဟာမိတ်ထာဝရ မတုပ်လဝ်စိုတ် နူကဵုကၠာတေံ အကြာညးတံၜါဂကောံဂှ် သွက်ဂွံဆက် ထ္မံက်အာရုပ်ရဴဂှ်ကဵု သွက်သၞောတ်တၠအဝဵုပၞာန် ဂွံၜိုဟ်လလမ်အာတုဲ သွက်ဂွံပံၚ်တောဲအာတုပ်ပ်ဂှ် ကလိဂွံလဝ်တၚ်တုပ်စိုတ်ဂမၠိုၚ်ရ။

ညးဒုၚ်တာလျိုၚ် လလောၚ်ပရိုၚ် ဂကောံဗၠးၜးကချေၚ် (KIO) သ္ကိုပ်ဗိုလ်ဇၞော် နဝ်ဘူဂှ် ပ္ဍဲအခိၚ်အခါ ကာလ နကဵုဗ္ၜတ်ဍုၚ်မွဲ ကၠောန်ၜိုတ်ဒၟံၚ် သွက်ပရေၚ်သၞောတ်တၠအဝဵုပၞာန် ဂွံသုန်ဂြာံအာဂှ် နကဵုဂကောံ ၜါဂကောံဏံ ဒၞါဲထေက်ကဵုကၠောန်ထေက်တံဂှ် ဒှ်သဘဴကၠောန်အာညးသ္ကအ် မွဲကရောံမွဲစွံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“သီုညးဖအိုတ် ပူဗိုၚ်တုဲမှ တၚ်တုပ်စိုတ် ညးဂမၠိုၚ် မကၠောန်ဒၟံၚ် ညံၚ်သၞောတ်တၠအဝဵုပၞာန် ဂွံသုန်ဂြာံအာဂှ် ဒှ်အခိၚ်အလုံကၟိန်ဍုၚ်မွဲ ကၠောန်ၜိုတ်ဒၟံၚ်အိုတ်ရ။ ဟိုတ်ဂှ်ရ နကဵု TNLA ပိုယ်တံ နကဵု KIO ပိုယ်တံ ကုကမၠောန်တံဏံဂှ် ဒၞါဲထေက်ကဵုပူဗိုၚ်ထေက်တံဂှ် ပူဗိုၚ်ဏောၚ်၊ ဒၞါဲထေက်ကဵုကၠောန် ထေက်တံဂှ် ကၠောန်အာမွဲစွံဏောၚ်။ ချူဓဇက်လဝ် ပရိုဝ်ဂရာမ်တၞဟ်ခြာဂှ် ဟွံသေၚ်ပုဟ်။ ကမၠောန်ပိုယ်တံ မဒှ်ဒၟံၚ်လၟေၚ်ဒဒှ်ဓမ္မတာတံဂှ် ပိုယ်တံပံၚ်တောဲတုဲ ဒှ်သဘဴကၠောန်အာဏောၚ်” သာ်ဝွံ ညးသ္ဂးရ။

ဂကောံဗၠးၜးကချေၚ် (KIO/ KIA) ကေုာံ ဒပ်ပၠတရဴပရေၚ်ဗၠးၜး တွဵုရးပလံၚ် (PSLF/TNLA) တံဝွံ ပ္ဍဲသၞာံ ၂၀၂၁ ကြဴနူဒပ်ပၞာန်သီအဝဵု ကလေၚ်မွဲဝါပၠန်တုဲ ကုဂကောံဒပ်စဵုဒၞါညးဍုၚ်ကွာန် မမံက်တိတ်ကၠုၚ်တံဂှ် ဗ္တောန်ကဵုဒၟံၚ် ကွတ်ပၞာန် ပ္ဍဲကဵုတိဍာ်ညးတံရ။

မွဲလ္ပာ်ပၠန်ဂှ် ဒပ်ပၞာန်ဗၠးၜးကချေၚ် (KIA) ကေုာံ ဒပ်စဵုဒၞါညးဍုၚ်ကွာန် (PDF) တံ ပံၚ်တောဲတုဲ ပ္ဍဲကဵုဒေသ သက်ကိုၚ် တိဍာ်မစုက်ဒၟံၚ် သီုကဵုပါလုပ် တွဵုရးကချေၚ်တံဂှ် သွက်ဂွံထပိုတ်ရိုဟ် ကၞက်သၞောတ်တၠ အဝဵုပၞာန်ဂှ် လုပ်ဒၟံၚ်ပေါဲဗ္တိုက်ဗလးတိ ကုဒပ်ကံၚ်ဇြဳပၞာန်တံရ။

သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် ညံၚ်ရဴ KIA, TNLA တံ လလောၚ်တြးလဝ် သွက်ဂွံဖအိုတ် ကၠေံ သၞောတ်တၠအဝဵုပၞာန်ဂှ် ဂကောံရပ်လွဟ်ကောန်ဍုၚ်အရၚ်တၞဟ်သ္အာၚ်တံလေဝ် ယဝ်ရလလောၚ် မာန်မ္ဂး ပၠန်ဂတးက္ညၚ် သာပရေံကၠုၚ်မာန်ရောၚ် ထံက်ထ္ၜးလဝ်ရ။

“ညးတံ ၜါဂကောံဂးကီုလေဝ် ပ္ဍဲကဵုဂၠံသြိုဟ် ကောန်ဍုၚ်အရၚ်တံအိုဿီုဂှ်လေဝ် နွံဒၟံၚ်သာ်ဏံကီုရ၊ ပ္ဍဲကဵုစိုတ်ဓာတ် ဂကောံဇြဟတ်ပၠန်ဂတးတံဂှ်လေဝ် နွံဒၟံၚ်ဗီုဏံကီုရ။ ညးတံ လလောၚ်တြးထောံ ပိုတ်တ်သ္ကုတ်တ် သာ်ဏံဂှ် ဒှ်ထေက်ရ။ ဂကောံတၞဟ်သ္အာၚ်တံလေဝ် ယဝ်ရလလောၚ်တြးသာ်ဏံ မာန်မ္ဂး သာခိုဟ်ရ။ အခိၚ်ဗ္တိုက် သၞောတ်တၠအဝဵုပၞာန် ညံၚ်ဂွံသုန်ဂြာံအာဂှ် ဓဝ်ပတှ်ေတံ ဗိုန်ဗတ်ကၠုၚ်တုဲ၊ ညံၚ်ဂွံဒှ်အကာဲအရာ မပံၚ်တောဲအာ နကဵုပရေၚ်ပၞာန် မအာတုပ်ပ်ဂွံ နကဵုမွဲအသံမွဲအမိၚ်တံဂွံဂှ် ဣဏံဂှ် ဒှ်အကာဲအရာ သ္ဒးထေက်ကဵုဒးကၠောန်ဏောၚ်ဂှ် မိက်ဂွံဟီုရ” သာ်ဝွံ ညးသ္ဂးရ။

KIA ကေုာံ TNLA တံဝွံ ဒှ်ကောန်ဂကောံ ကမ္မတဳပ္ညဳပ္ညပ်သဳကၠဳ ပရေၚ်ကၟိန်ဍုၚ် (FPNCC) မဒက်ပ္တန်လဝ် နကဵုဂကောံရပ်လွဟ်ကောန်ဍုၚ်အရၚ်တံဂှ်တုဲ TNLA ဂှ် သီုကဵုဒှ်ကောန်ဂကောံမဟာမိတ်ကောဒေံ မပံၚ်တောဲရေၚ်တၠုၚ်ဒၟံၚ် ပ္ဍဲပရေၚ်ပၞာန်၊ ပရေၚ်ဍုၚ်ကွာန် ကုဒပ်ပၞာန်ရခေၚ် AA ၊ ကဝ်က MNDAA တံမွဲရောၚ် မဒှ်ရ။

စပ်ကဵုသၞောတ်တၠအဝဵုပၞာန် ဂွံသုန်ဂြာgအာဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံလဝ် ဒုသ္ကိုပ်ဗိုလ်ဇၞော် မိုၚ်အိုက်ကျဝ် မဒှ်ညးဒုၚ်တာလျိုၚ် လလောၚ်ပရိုၚ် TNLA မလလောၚ်ပ္တိတ်ပံၚ် တောဲလဝ် ကု KIA တံဂှ်ကီုလေဝ် ဟွံဂွံလဝ်အဆက်ဏီရ။

ပ္ဍဲကဵုတွဵုရးကချေၚ် ကေုာံ ဒေသပယျဵု တွဵုရးသေံ ဒၞါဲ KIA ကေုာံ TNLA တံဂှ် အကြာဂကောံ ဒပ်ဗလးတိတံဂှ် ပရေၚ်ပၞာန်ကြံၚ်မ္ၚိုဟ်တံ နွံလဝ်တုဲ ညးစၞး သီုၜါလ္ပာ်သာ်ဏံတံ သဳကၠဳလဝ်အိုတ်ရ။

နူကဵုပရေၚ်သဳကၠဳၜါလ္ပာ်ဏံဂှ် သွက်ဂွံဒုၚ်တာလျိုၚ် ပရေၚ်ဂီုကၠီုဗၠးဘဲ ညးဍုၚ်ကွာန် မၞုံအပ္ဍဲဒေသ တံဂမၠိုၚ် ပါလုပ်သီဒကဵု ဂကူသေံ၊ ဂကူကချေၚ်၊ ဂကူတအာၚ်(ပလံၚ်) မဒှ်ညးဒေသဂမၠိုၚ်တံဂှ်ကဵု သွက်ဂွံဝေၚ်ပါဲကဵု ပြဝ မသ္ကဵုဒှ်တဴလျိုၚ်ဣဝဵုတံအိုတ်ဂှ်လေဝ် တုပ်လဝ်စိုတ်အိုတ်ရ။

သ္အာၚ်နူဂှ်ပၠန် ဒုၚ်သ္ဇိုၚ်ကဵု ပရေၚ်ကဆံၚ်တုပ်သၟဟ်တုဲ သွက်ဂွံမံၚ်စံၚ်အာတုပ်ပ် ဗွဲမဍုက်ကေဝ် ဒဒှ်ေဒယှ်ဂှ်ကီု ကမၠောန်ဗ္တိုက်ပလီုဂဥုဲဇဗ ကေုာံ ကိစ္စမၞုံပၟိက်တၞဟ်သ္အာၚ်တံဂှ် နကဵုဂကောံၜါလ္ပာ်ဏံ ဗီုနွံပၟိက် ပ္ညဳပ္ညပ်ရေၚ်တၠုၚ်အာဏောၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KIA/TNLA