ထဝါဲ၊ မေ (၃၀)
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အပ္ဍဲကွာန်ယျေဝိုၚ်၊ ပွိုၚ်ဍုၚ်ထဝါဲ၊ ရးဒေသဇၞော်တၞၚ်သဳဂှ် ကြဴနူစံၚ်ပလီုပလာ် သ္ၚိဒၟံၚ် (၂) မတုဲဂှ် ရပ်ဒက်ဏာ ညးဒေသ (၁၀) တၠ နဒဒှ်ဇွောံစဵုဒၞါပၞာန်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ (၂၈) အခိၚ်လ္ဒေါဝ်တ္ၚဲ ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၁၀၀) ပြၚ်ပါဂှ်ဝွံ နူကဵုကွာန်သပျေချံၚ်ဂှ် လုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲကွာန်ယျေဝိုၚ်ရ။
ကြဴနူဂှ်တုဲ ကရောၚ်ပၞာန်ကံၚ်ဇြဳပၞာန်ဂှ် သ္ၚိနူကွာန်ယျေဝိုၚ် (၂) မဂှ်ဝွံ နကဵုတၚ်ထ္ၜးဟိုတ် ထံက်ပၚ်ဒၟံၚ် ဇရေၚ် PDF တံဂှ်ဂးတုဲ စံၚ်ပလီုပလာ်ဏာလဝ်ရ။
ဒပ်ကံၚ်ဇြဳပၞာန် မစံၚ်ပလီုပလာ်ဏာဂှ်ဝွံ အခိၚ်ကလေၚ်ဆုတ် ကရောၚ်ပၞာန်ဂှ် ရပ်ဒက်ဏာ ညးဒေသ နူကဵုကွာန်ယျေဝိုၚ် ကေုာံ ကွာန်မျေန်မာတ်တာတ်တံ (၁၀) တၠ နဒဒှ်ဇွောံစဵုဒၞါပၞာန်ဂှ် ညးဒေသတံ သ္ဂးရ။
ဒပ်ကံၚ်ဇြဳပၞာန်ဝွံ ကြဴနူရပ်ဒက်ဏာ ညးဒေသဂမၠိုၚ် နဒဒှ်ဇွောံစဵုဒၞါပၞာန်တုဲဂှ် ဖျေံဒပ်မံၚ်တန်တဴဒၟံၚ် ပ္ဍဲဘာလကျာ် ကွာန်မျေန်မာတ်တိတ် ဗွဲယာယဳဂှ် ဂွံတီကေတ်ရ။
ဟိုတ်နူကရောၚ်ပၞာန်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ညးဒေသ နူကဵုကွာန် ယျေဝိုၚ်၊ မျေန်မာတ်တိတ်၊ ခံၚ်တိုၚ်ပျေန်၊ ပခါတ်အေန်၊ ကေန်ကုန် ကေုာံ ယျေဝ်အိုၚ်တံဂမၠိုၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ပ္ဍဲကဵုဒေသ(အရှေ့တော) ပွိုၚ်ဍုၚ်ထဝါဲဂှ် အပ္ဍဲဂိတုမေဏံ အကြာဒပ်ကံၚ်ဇြဳပၞာန်ကဵု ဒပ်စဵုဒၞါဒေသတံဂှ် ပေါဲဗ္တိုက်က္တဵုဒှ်လဝ် ဟွံအောန်နူကဵု (၅) ဝါတုဲ ၜါလ္ပာ်ဇီုကပိုက်ချိုတ်ဂျိုၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai