သွက်ဂွံထပိုတ် ဂၠံၚ်သၠုဲလုပ် ဂကောံဒစဵုဒစးတံဂှ် ကံၚ်ဇြဳပၞာန် ချပ်ဂၞန်မံၚ်

သက်ကိုၚ်၊ မေ (၃၁)

သွက်ဂွံထပိုတ်ဂၠံၚ်သၠုဲလုပ် ဂကောံဇြဟတ်လ္ပာ်ဒစဵုဒစး မကလိဂွံဒၟံၚ် နူကဵုအထံက်အပၚ်တံမွဲကဆံၚ် ဂှ်ကဵု သွက်ဂွံဂွံတၚ်နၚ် ညးချဳဒရာၚ်ပရေၚ်ဒဳမဝ်ကရေဇြဳတံဂှ်တုဲ ညံၚ်ဂွံပ္တိုန်စရၚ် သေမ်ကာဒ်တံဂှ်ကီု၊ ဟွံပ္တိုန်စရၚ်မ္ဂး ကၟာတ်အာဒတုဲဏောၚ်ဂှ် ကံၚ်ဇြဳပၞာန် ချပ်ဂၞန်ကၠုၚ်ရ။

ကမၠောန်ပ္တိုန်စရၚ်သေမ်ကာဒ် စထ္မံက်လဝ်ရုပ်ရဴ နူကဵုလက်ထက် NLD တေံဂှ် ကံၚ်ဇြဳပၞာန် မသီကေတ်လဝ်အဝဵုကၟိန်ဍုၚ် နကဵုတၚ်စောတ်စောဲ မာဲဟွံဓဝ်ယာ ပ္ဍဲပေါဲရုဲမာဲ သၞာံ ၂၀၂၀ ဂှ် ဆက်ထ္မံက်ဒၟံၚ်ရုပ်ရဴရ။

ကံၚ်ဇြဳပၞာန်ဝွံ အပ္ဍဲကာလဍေံတံသီအဝဵု ၜါသၞာံပြၚ်ဂှ် ကဵုဇြဟတ်ဂရိုဟ် ကုအဝ်ပရေတာ ပရေၚ် ဆက်စၠောံ အပ္ဍဲဍုၚ်ဂမၠိုၚ် နူကဵုသၟဝ်ပရေၚ်ထိၚ်ဒဝ်ဒပ်ပၞာန်ဂှ်တုဲ သေမ်ကာဒ်ဖုၚ် ဟွံပ္တိုန်စရၚ်တံဂှ် ကၠောန်ဒၟံၚ် သွက်ဂွံကၟာတ်သီထောံမွဲတဲဓဝ်ရ။

ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန် ရးသက်ကိုၚ်မွဲတၠဂှ် ကဵုပ္တိုန်စရၚ် သေမ်ကာဒ်ဖုၚ်တံဂှ်ဝွံ မိက်ဂွံ ဂွံတၚ်နၚ် ရဲချဳဒရာၚ်ဒၟံၚ် ပ္ဍဲပၠန်ဂတးတံတုဲ ကၠောန်လဝ်မဒှ်တုဲ ဂ္စါန်ပ္တိတ်ကၠုၚ်ဇြဟတ် သွက်ဂွံထပိုတ် ဂၠံၚ်သြန်အထံက်အပၚ်လုပ်တံဂှ်ရောၚ် ဟီုရ။

“မိက်ဂွံဂွံတၚ်နၚ်တံတုဲ ကၠောန်လဝ်ဗီုဏံရ။ ကၟာတ်ထောံ KPay တံအိုတ်ရ၊ ပိုယ်တံတှ်ေ ကေၚ်ဒးဒုၚ်ကၟာတ်လဝ်ကီုရ။ နကဵုယၟုဇကု နကဵုတၞးကာဒ်ကောန်ဍုၚ်ဇကု မပ္တိုန်လဝ်စရၚ်သေမ်ကာဒ်ဂှ် ကၟာတ်ထောံဟဂှ်ရ။ ဒးဆောံလေၚ်အာ သၠုဲတၟာဂလိုၚ်ရ။ ပ္ဍဲအရာဏံ ဍေံတံ ဟွံတပ်တးဂှ် ချိုတ်ပၠိုတ်ရ။ နကဵုဍေံတံ ဂ္စါန်ကၠောန်ကၠုၚ် လ္ပာ်ပမာန်တံဂှ်ရ။ ပ္ဍဲဗလးတိဏံ ယဝ်ရထ္ပက်ကရောၚ်ပၞာန်မ္ဂး မၞိဟ်ဍေံတံရ ပြဟ်လလုဲဂၠိုၚ်၊ ဇီုကပိုက်ဂၠိုၚ်။ လက္ကရဴအိုတ် နကဵုဍေံတံ ပ္ဍဲပၠန်ဂတးဏံ အရီုဗၚ်အထံၚ်ပၚ်တံ ဗီုလဵုလုပ်စိုပ်ကၠုၚ်ရောဟီုဂှ် ဂၠံၚ်လုပ်တံဂှ် ဍေံတံတီလဝ်တုဲတုဲရ၊ ဒှ်သဘဴ ထိၚ်ဒက်လဝ်ရ။ ရပ်ထိၚ်ထောံ မဏံတုဲ ထပိုတ်အာ ဂၠံၚ်လှုဲလုပ်တံဂှ်ဏောၚ်” သာ်ဝွံ ညးဟီုရ။

ကံၚ်ဇြဳပၞာန်ဝွံ မ္ၚးနူထံၚ်ပရိုၚ် တၚ်နၚ်ပရိုၚ်စပ်ကဵုပရေၚ်ချဳဒရာၚ် သၟာပၠန်ဂတး မပါလုပ်ဒၟံၚ် ပ္ဍဲပၠန်ဂတး က္ညၚ်တံဂှ်သၟးဟွံက သီုကဵုကၟာတ်သီကၠုၚ် အကံက်ဗာန် ရဲထံက်ပၚ်တံဂှ်ကီု၊ အကံက်သြန်လှုဲမဝ်ဗိုၚ် မဒးပံက်လဝ် နကဵုဂၞန်ဖုၚ်တံဂှ်လေဝ် နွံဒၟံၚ်ရ။

သေမ်ကာဒ်ဖုၚ် ကၠုၚ်ပ္တိုန်လဝ်စရၚ် ပလေဝ်လဝ် နကဵုတၚ်နၚ်တၞးကာဒ်ကောန်ဍုၚ်ဒးဒး ဟွံသေၚ်တံဂှ် အပ္ဍဲပွိုၚ် (၉၀) တ္ၚဲ ကၟာတ်အာရောၚ်ဂှ် ဌာနက္ဍိုက်ပ်စၞောန်ပ္ညၚ် ပရေၚ်ဆက်စၠောံ သၟဝ်သြဇာကံၚ်ဇြဳပၞာန် လလောၚ်ပ္တိတ်လဝ် ပ္ဍဲဂိတုမာတ်ချ်တေံရ။

အခိၚ်လၟုဟ်ဂှ် ဇရေၚ်ညးမသုၚ်စောဲဒၟံၚ် သေမ်ကာဒ် MPT, ATOM, OOREDOO ကေုာံ MYTEL ဒပ်ပၞာန်ပိုၚ်တံ သွက်ဂွံပ္တိုန်စရၚ် နကဵုတၚ်နၚ်ပူဂဵု ညးမရပ်စပ်စကာတံ ဍိုက်က်ပေၚ်ၚ်ဂှ် ပလံၚ်ဗစိုပ်ကဵုဒၟံၚ်ပရိုၚ် သီု SMS သီုကော်ကေတ်ဖုၚ်တံဂှ် နွံရ။

ကလိဂွံ SMS တုဲ သေမ်ကာဒ်ဖုၚ် ကလေၚ်ပလေဝ်ပ္တိုန်လဝ်စရၚ် နကဵုတၞးကာဒ်ကောန်ဍုၚ် ဟွံမွဲတံဂှ် ကၟာတ်အာပွမသုၚ်စောဲဒေတာတံဂှ်ကီု၊ ပွမပလံၚ်လိက်သ္ကုတ်၊ ပွမကော်ဖုၚ် One Way Block တံဏောၚ်ဂှ် ကံၚ်ဇြဳပၞာန် ကဵုလဝ်သတိရ။

လ္တူတၚ်ကဵုသတိ ကံၚ်ဇြဳပၞာန်ဂှ် ဗိုလ်ယက္ခ သ္ကိုပ်တမ်ဒပ်လၟိဟ် (၁) ခရိုၚ်သက်ကိုၚ်ဂှ် ၚုဟ်မးသေမ် ကာဒ်မွဲကဵု တာဝါတိုၚ်မွဲဂှ် တော်ဆကေတ်တုဲ ယဝ်ရကၠောန်သ္ပကၟာတ်အာ အရာမကော်ဖုၚ်တံ၊ ထပိုတ်လာၚ်ဖုၚ်တံဂှ်မ္ဂး ကေတ်အာဒုဟ် ကုရုၚ်လစှ်ေတံဏောၚ်ဂှ် ကဵုလဝ်သတိ ကလေၚ်ခၠေဝ်လဝ် ကုအဝ်ပရေတာ ATOM ရ။

ကံၚ်ဇြဳပၞာန်ဂှ် စနူအခိၚ်ရေၚ်တၠုၚ်လဝ် One Way Block တံဂှ်တုဲ အပ္ဍဲပွိုၚ် (၉၀) တ္ၚဲ သေမ်ကာဒ်ဖုၚ် ကၠုၚ်စိုပ်ပ္တိုန်လဝ်စရၚ် နကဵုတၚ်နၚ် တၞးကာဒ်ကောန်ဍုၚ်ဟွံမွဲတံဂှ် ကၟာတ်အာဒတုဲဏောၚ် ပ္ဍဲဂိတုမာတ်ချ် (၁၄) တေံ လလောၚ်ပ္တိတ်လဝ်ရ။

ညးဍုၚ်ကွာန်မွဲတၠ နူကွာန်ရး မၞုံအပ္ဍဲတွဵုရးချေၚ် မ္ဒးဒုၚ်ထပိုတ်လဝ်အေန်တာနိတ်ဂှ် ဟိုတ်နူဟွံဂွံလာၚ် ဂှ်ရ ပ္တိုန်စရၚ်သေမ်ကာဒ်ဟွံဂွံတုဲ သေမ်ကာဒ်ဖုၚ် မသုၚ်စောဲဒၟံၚ်တွဵုဂှ် ဒးဒုၚ်ကၟာတ်တုဲ သွက်ဂွံထပ် ရာန်ကေတ်တၟိဂှ် ဒးကဵုၚုဟ်မွဲဆမွဲတာန်ရောၚ် သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“လာၚ်ဂှ်လေဝ် ဟွံဂွံတုဲ ပ္တိုန်စရၚ်လေဝ် ဟွံဂွံပုဟ်။ ဗီုတံဏံ ဟွံဂွံပရိုၚ်တုဲ သေမ်ကာဒ်မသုၚ် စောဲဒၟံၚ်တွဵုဂှ် ဟွံသုၚ်စောဲရတုဲ လက္ကရဴဏံတှ်ေ မိက်ဂွံဂွံအဆက် ကော်ဖုၚ်ဏောၚ်မ္ဂး ဖုၚ်ဂှ် ဒးဒုၚ်ကၟာတ်လဝ်တုဲ ကော်ဟွံဂွံဟဂှ်။ သေမ်ကာဒ်မသုၚ်စောဲဒၟံၚ်တွဵုဂှ် ဒးပ္တိတ်ထောံတုဲ အာရာန် ကေတ်တၟိ ပ္ဍဲဍုၚ်မ္ဂး ၄/၅ လ္ၚီဂှ် ဂွံမာန်ဏောၚ်။ လ္ပာ်ရးပိုယ်တံဂှ်တှ်ေ မွဲကာဒ်ဂှ် ဒှ်အာမွဲဠက်ရ” သာ်ဝွံ ညးသ္ဂးရ။

တွဵုရးချေၚ်ဝွံ ဒှ်ဒေသ ပရေၚ်ပၠန်ဂတးရပ်လွဟ် ကုသၞောတ်တၠအဝဵုပၞာန် ဇြဟတ်ခိုဟ်မွဲတုဲ ဒပ်ပၠတရဴ ကောန်ဂကူချေၚ် (CNF) ကဵု ဒပ်စဵုဒၞါဒေသ (PDF) တံဝွံ မ္ၚးနူပေါဲဗ္တိုက်ဗလးတိဂှ် နူကဵုတရဴကျာ တံဂှ်လေဝ် ဆေၚ်ဒၟံၚ်မုက် ကုကံၚ်ဇြဳပၞာန် တန်န်ကြန်န်ရ။

မွဲလ္ပာ်ပၠန်ဂှ်လေဝ် တွဵုရးချေၚ် ဇြဟတ်ခိုဟ် ပ္ဍဲအရာပၠန်ဂတးရပ်လွဟ် ကုဒပ်ကံၚ်ဇြဳပၞာန်ဂှ်ကီု သီုကဵုတွဵုရးကချေၚ် ကေုာံ ပ္ဍဲကဵုပွိုၚ်ဍုၚ်လ္ၚဵု နူကဵုရးသက်ကိုၚ်တံဂှ် ဒးဒုၚ်ထပိုတ်လဝ်လာၚ်ဖုၚ် ကေုာံ အေန်တာနိတ်တံ နွံဒၟံၚ်ရ။

ညးဒေသမွဲတၠ ဒၟံၚ်အပ္ဍဲပွိုၚ်ဍုၚ်ကနဳ၊ ရးဒေသဇၞော်သက်ကိုၚ်ဂှ်လေဝ် ယဝ်ရညးရပ်စပ်ဒၟံၚ် သေမ်ကာဒ် နကဵုတၞးကာဒ်ကောန်ဍုၚ်ဇေတ်တ်တံ ပါလုပ်ဒၟံၚ် ပ္ဍဲပၠန်ဂတးမ္ဂး ကၠောန်သ္ပရပ်ဒက်ကေတ်ဒၟံၚ်ဒုဟ်တံဂှ်တုဲ ဝးပ္ကဝ်ဒ္ဂေတ်ဝတ်တံတုဲ ကၠတ်ကၠၚ်ဒၟံၚ်တံလေဝ် နွံဂှ် သ္ဂးရ။

“နကဵုတၞးကာဒ်ကောန်ဍုၚ်ဇေတ်တ် ယဝ်ရဍေံက္ဍစိုပ်မ္ဂး ရပ်ဒက်အာဏောၚ်ဂှ် ထေၚ်ကေတ်ရ။ ကၠောန်အာဗီုဏံဏောၚ်၊ ကၠောန်လေဝ် ကၠောန်ဒၟံၚ်ဏောၚ်။ မုဒှ်ရောဟီုတှ်ေ ကၠောန်သ္ပဗီုဏံဟီုဂှ် အသိၚ်ပၠန်ဂတးဂှ် သ္ကဵုဍိုန်အာဏောၚ်။ မိက်ဂွံကဵု ကိစ္စပရေၚ်ပၠန်ဂတး မ္ဒးဆက်စၠောံဒၟံၚ်ကဵုဖုၚ်တံ လဇုဲလဇအာဏောၚ် မဒှ်ရ။ ပ္ဍဲကဵုဒေသ ဒးဒုၚ်ထပိုတ်လဝ် လာၚ်အေန်တာနိတ်တံဟီုမ္ဂး ဗီုလဵုဂွံအာပ္တိုန်ရော၊ ဍေံတံ ကၟာတ်လဝ်အေန်တာနိတ်ဏောၚ်လေဝ်။ ဟိုတ်ဂှ်ရ ပိုယ်တံ ပ္တိုန်ဟွံဂွံပုဟ်၊ ဒေသဒးဒုၚ်ထပိုတ်လဝ် အေန်တာနိတ်သီုဖအိုတ်ရဏောၚ်။ မွဲပၠန်ဂှ် ဍေံတံဝးပ္ကဝ် Ethic တံတုဲ ကိစ္စကၠတ်ကၠၚ်တံဟီုဂှ် ကဵုပ္တိုန်စရၚ်သာ်ဏံဂှ် ပိုယ်တံဒစဵုဒစးပေၚ်ၚ်ရ” သာ်ဝွံ ညးဟီုရ။

အတိုၚ်တၚ်လလောၚ်တြး အဝ်ပရေတာ ပရေၚ်ဆက်စၠောံအပ္ဍဲဍုၚ်တံဂှ်မ္ဂး ပ္ဍဲဍုၚ်ဗၟာဏံ မၞိဟ်သုၚ် စောဲဒၟံၚ် SIM Card နာနာသာ်ဂှ် နွံဒၟံၚ် ၆၃ ပြကောဋိကိုဋ်တုဲ အခိၚ်လၟုဟ်ဂှ် အဝ်ပရေတာ ဖုၚ်အပ္ဍဲဍုၚ်တံဂှ် ဒပ်ပၞာန် ထိၚ်လဝ်ရ။

ကံၚ်ဇြဳပၞာန်ဝွံ သွက်ဂွံကၠောန်သ္ပ ပွမထိၚ်ဒက်ကၟာတ်လဒဵုတံ၊ ပွမရပ်ကၠၚ် တၚ်နၚ်ပရေၚ်ဆက်စၠောံ ညးမဒစဵုဒစး ကုဍေံတံဂှ်တုဲ ပ္ဍဲဂိတုမာတ်ချ် (၁၀) တေံ စၞောန်ပျးလဝ် နဲဥပဒေ ပရေၚ်ဗ္တိုက်သ္အး ပွပကီုပရာပ်တံရ။

လ္ဂောံကဵုသၞောဝ်ဏံမ္ဂး ကမ္မတဳကမၠောန် ပရေၚ်တာဒၞါဗ္တိုက်ပလီု ပွပကီုပရာပ်တံဂှ် ပ္တိတ်လဝ်အမိၚ် ကဵုအခေါၚ် ကုညးမကလိဂွံလဝ်လာၚ်ဇြေန် ကမၠောန်ပရေၚ်ဆက်စၠောံ မဆေၚ်စပ်တံ သွက်ဂွံထပိုတ် ပရေၚ်ဆက်စၠောံအဳလက်ထရောနေတ်တံ၊ သွက်ဂွံကၟာတ်လဒဵုသၞောတ်ဗ္ၜတ်၊ ရပ်ကၠၚ်အကြာတံ ဂှ်ရောၚ် မဒှ်ရ။

ညးခါတ်အကာဲပရေၚ်ဍုၚ်ကွာန်တံဂှ် နဲဥပဒေ ပကီုပရာပ် ကံၚ်ဇြဳပၞာန်ဂှ်ဝွံ သွက်ဂွံထပိုတ် အရာညးဍုၚ်ကွာန်တံ မထံက်ပၚ်ဒၟံၚ် ဇရေၚ်ဂကောံဒပ်စဵုဒၞါညးဍုၚ်ကွာန် PDF တံ သီုကဵုပါလုပ်အလဵု အသဳညဳသၟဟ်ဂကူ NUG တံဂှ်ကီု၊ သွက်ဂွံဍဵုဍိုက် လ္တူညးဍုၚ်ကွာန်တံဂှ်တုဲ စၞောန်ပျးလဝ်ရောၚ် ပါ်ပါဲလဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ