ပ္ဍဲပွိုၚ်ဍုၚ်ရေဝ် PDF (၂) တၠ လုပ်စိုပ်ဖျေံလွဟ်ဂှ် ကံၚ်ဇြဳပၞာန် တြးဝါဒ

ရေဝ်၊ မေ (၃၁)

ကောန်သ္ဂံၚ် (၂) တၠ နူကဵုဒပ်စဵုဒၞါညးဍုၚ်ကွာန် ပွိုၚ်ဍုၚ်ရေဝ်၊ တွဵုရးဍုၚ်မန် မဒှ်ပွိုၚ်ဍုၚ်မလလောၚ်တြးလဝ် ပရေၚ်အုပ်ဓုပ်ပၞာန်ဂှ်ဝွံ လုပ်စိုပ်ဖျေံလွဟ် သီုကဵုလွဟ်လက်နက်မကမ်တံရောၚ်ဂှ် ထ္မံက်ထ္ၜးကၠုၚ် ပ္ဍဲကဵုချာန်နေဝ်ထလဳဂရာမ် တြးဝါဒတံရ။

ပ္ဍဲဂိတုမေ (၃၀) အခိၚ်နူဂယး (၉) နာဍဳဂှ် ပ္ဍဲကဵုၝောံခန်ဇြေန်ဖျူယှေန် မၞုံပ္ဍဲ စကခ (၁၉) ဍုၚ်ရေဝ်ဂှ် ကၠောန်ဗဒှ်လဝ် အခန်ကၞာထံက်ပၚ်ကဵုလာပ်ဗဇဴ ကုကောန်သ္ဂံၚ် PDF  မကၠုၚ်ဖျေံလွဟ် (၂) တၠ ကေုာံ သီုကဵုကလေၚ်ပအပ် ဇရေၚ်မိမတံရောၚ်ဂှ် ထ္မံက်ထ္ၜးလဝ်ရ။

ဒုသ္ကိုပ် စကခ၊ ကောန်ဂကောံ နူကဵုတမ်ဒပ်ရးဂမၠိုၚ်၊ နူကဵုဌာနမဆေၚ်စပ် ကဆံၚ်ပွိုၚ်ဍုၚ်တံ၊ ပဳဒဳအာဖ် မကၠုၚ်ဖျေံလွဟ် ၂ တၠဂှ်ကဵု မိမညးတံကီု အပံၚ်ဖအိုတ် (၃၅) တၠ တိုန်စိုပ်လဝ် အခန်ကၞာဂှ်တုဲ ဂွံဒုၚ်ကေတ်တဲ လွဟ်လက်နက် ညးမကၠုၚ်ဖျေံလွဟ်တံဂှ်တုဲ ကလေၚ်ကဵုလဝ်လာဘ်ဗဇဴတုဲ ကလေၚ်ပအပ်ကဵုလဝ် ဇရေၚ်မိမညးတံရောၚ်ဂှ် လလောၚ်ပ္တိတ်လဝ်ရ။

ကောန်ဂကောံ လလောၚ်ပရိုၚ် ဂကောံဒပ်ဒမၠုက်ရးမညမွဲတၠဂှ် PDF ၂ တၠ လ္ပာ်ကံၚ်ဇြဳပၞာန်တံ မတြးကၠုၚ်ဝါဒဂှ်ဝွံ ဒှ်ညးဟွံကေၚ်လုပ် ပ္ဍဲဂကောံဒပ်စဵုဒၞါညးဍုၚ်ကွာန်တံတုဲ ဒှ်ညးမကၠောန်ၜိုတ်စဒၟံၚ်ကမၠောန် ပ္ဍဲကဵုကၠအ်ဂူ မၞုံပ္ဍဲတိဍာ်ဗၠးၜးတံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ညးတံ ၂ တၠဝွံ ယၟုညးဂမၠိုၚ်ကော်မ္ၚးဏံဂှ် ဒှ်ဗိုဝ်ဖျူ ကေုာံ (ငကြွက်) တံတုဲ ဒှ်ညးကၠုၚ်နူ ထဝါဲ ကေုာံ ပွိုၚ်ဍုၚ်ရေဝ်တံတုဲ ဟိုတ်နူကၠုၚ်မံၚ်ဒၟံၚ် အပ္ဍဲတိဍာ်ဗၠးၜးဂှ်ရ ၜိုတ်ကဆံၚ်ကေၚ်ဟီုဂးဆက်ဆောံ ကုကောန်ဒပ်စဵုဒၞါညးဍုၚ်ကွာန် PDF လ္ၚဵုတံ နွံဂှ် သ္ဂးရ။

ညးသၟတ် ၂ တၠဏံဂှ်ဝွံ ကြဴနူကၠေံအာ နူကဵုတိဍာ်ဗၠးၜးမွဲဒၞါဲတုဲ ဂွံၜိုတ် ၅ တ္ၚဲတုဲဂှ် ပရိုၚ်မံက်တိတ်ကၠုၚ် နကဵုဗီုပြၚ်လုပ်ဖျေံလွဟ် ဇရေၚ်ကံၚ်ဇြဳပၞာန်ဂှ် ဂွံတီကေတ်ရ။

တွဵုရးဍုၚ်မန်၊ ပွိုၚ်ဍုၚ်ရေဝ်ဂှ်ဝွံ ဒှ်တိဍာ် ဂကောံဇြဟတ်ပၠန်ဂတးတံ ဇြဟတ်ခိုဟ်မွဲတုဲ ပ္ဍဲဂိတုဖေဖဝ်ဝါရဳ (၂) တုဲကၠုၚ်တေံ ကံၚ်ဇြဳပၞာန် လလောၚ်တြးလဝ် နဒဒှ်ပွိုၚ်ဍုၚ်ပရေၚ်အုပ်ဓုပ်ပၞာန်မွဲရ။

ပရိုၚ်−သြၚ်လောန်တိုၚ်(မ်)

ဗီုဓာတ်−SBM