ကောန်ပၞာန်တြေံ ကနေဒါမွဲတၠ မပန်ဂစိုတ်လဝ် ကောန်ဒုဟ်မွဲတၠ ပ္ဍဲဖူခါတ်ဂှ် လှဲပြံၚ်ပအပ်ကဵု ဂကောံဒပ်ဗၠာဲသၟိၚ်ဍုၚ်သေံ

ၜၚ်ကံက်၊ မေ (၃၁)

ကောန်ဍုၚ်ကနေဒါ မာတ်တူဒျူပရဳ မဆက်စပ်ဒၟံၚ်ကဵု ဂဗုတ်ကောန်ဒုဟ်မွဲတၠ မ္ဒးဒုၚ်ဂစိုတ် ပ္ဍဲသၞာံ ၂၀၂၂ ဂှ် ဒဒှ်ရလှဲပြံၚ်ကဵုလဝ် ဍုၚ်သေံ ဗွဲမအံၚ်ဇၞးဂှ် သၟိၚ်တၠအဝဵုသေံတံ ဟီုဂးလဝ် ပ္ဍဲဂိတုမေ (၂၉) တေံရ။

ဒျူပရဳ မဒှ်ကောန်ပၞာန်တြေံ ကနေဒါ အာယုက် ၃၈ သၞာံဂှ်ဝွံ ပန်ဂစိုတ်လဝ် ဂျဳမဳဇြာန်ဟူ မဒှ်ကောန် ဒုဟ်မွဲတၠဂှ်ရောၚ် ကမ္မယှေန်နာ ပရေၚ်ဂၠိုက်ဂၠါဲထံၚ်ပရိုၚ်ဗဟဵု ဍုၚ်သေံဂှ် ဟီုဂးလဝ်ကဵု ကောံဓရီုမဳဒဳယျာတံရ။

“ညးမဒးဒုၚ်ပန်ဂစိုတ်ဂှ်ဝွံ ဆက်စပ်ဒၟံၚ်ကဵု ဂိုဏ် United တုဲ ညးဝွံ ပ္ဍဲကဵုက္ဍိုပ်သ္ကိုပ်ဂိုဏ် Red Scorpion ဂမၠိုၚ် မၞုံပ္ဍဲကနေဒါဂှ် ဆက်စပ်ဒၟံၚ်ကဵု ညးမဂစိုတ်လဝ် က္ဍိုပ်သ္ကိုပ်ဂိုဏ်ဂှ်မွဲတၠရောၚ်” ဂှ် သောၚ်ထ္ၜး လဝ်ရ။

ပ္ဍဲကဵုစၟတ်သမ္တီဗဳဒဳယော ဂကောံဒပ်ဗၠာဲသၟိၚ်ဍုၚ်သေံဂှ် ပ္ဍဲလ္တူက္ၜၚ်ကျာမွဲ ဂကောံဒပ်ဗၠာဲသၟိၚ်တံ ပူဗိုၚ်လဝ် ဒူပရဳ မဒက်လဝ်တဲဂှ် ဂွံဆဵုကေတ်ရ။

သ္အာၚ်နူဂှ်ပၠန် လာၚ်က္ၜၚ်ကျာကဝ်မာယှေဝ်ဝွံ နကဵုတၚ်ထ္ၜးဟိုတ်ပရေၚ်ဂီုကၠီုတုဲ ကယျာန်ပါဲလဝ် အရီုဗၚ်သ္ဂောံကလေၚ်ကော်ကၠုၚ် ကောန်ဒုဟ်ဂှ်ရ ဒဒှ်ရဒးကော်လဝ် က္ၜၚ်ကျာ ဒပ်ကျာဨကရာဇ် သေံဂှ်လေဝ် ဂွံတီကေတ်ရ။

“သွက်ဂွံစောဲဒုဟ် ကုညးတၠဒုဟ် ပ္ဍဲသၟဝ်သၞောတ်စဳရေၚ်သၞောဝ်ဓဝ်ဍုၚ်သေံမာန်ဂှ် ပိုယ်တံ ဒးထိၚ်ဒဝ် အာဏောၚ်။ အခိၚ်ရပ်လဝ်ဍေံဂှ် ညံၚ်ဂွံဂီုကၠီု ပ္ဍဲဍုၚ်သေံဂှ်ကီု၊ ကၟိန်ဍုၚ်ဏံဝွံ ဒဒှ်ရမံၚ်စံၚ်ဗွဲမဂီုကၠီုမာန်ဂှ် ဒးထိၚ်ဒက် သိက္ခာဏံဏောၚ်” ဂှ် ညးရေၚ်တၠုၚ်ဂဗုတ်အလဵုအသဳမွဲတၠ ဟီုဂးလဝ်တုဲ လ္ဂောံကဵုသၞောဝ် လှဲပြံၚ်တံဂှ်မ္ဂး ဒးဒုၚ်ကဵုဒဏ်ဂစိုတ်ဟွံသေၚ်ပုဟ်ဂှ် ဂွံတီကေတ်ရ။

ရုၚ်သၞောဝ်ဓဝ်မွဲ မၞုံတွဵုရးအေဝ်လ်ဗာတာ ဍုၚ်ကနေဒါဂှ်ဝွံ သွက်ဂွံလှဲပြံၚ်ကဵု ဒျူပရဳ လ္ပာ်ဍုၚ်သေံဂှ် ပ္ဍဲဂိတုဒဳဇြေမ်ဗာတံ သ္ပဒတန်လဝ်ရ။

Ref: Reuters