ပ္ဍဲပေါဲဗ္တိုက်ရေဝ်ဂှ် ပရေၚ်ဇီုကပိုက်ချိုတ်ဂျိုၚ်ၜါလ္ပာ် နွံဒၟံၚ်

ရေဝ်၊ အံက်တဝ်ဗာ(၁၈)

ပ္ဍဲကွာန်ဇြာန်ပျ(စံပြ)၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် ပ္ဍဲပေါဲဗ္တိုက်က္တဵုဒှ်လဝ် ပ္ဍဲဂိတုအံက်တဝ်ဗာ၊ စၟတ်တ္ၚဲ(၁၇) အခိၚ်နူဂယးဂှ် ပရေၚ်ဇီုကပိုက်ချိုတ်ဂျိုၚ်ၜါလ္ပာ် နွံလဝ်ရဂှ် ဂွံတီကေတ် အတိုၚ်လဟီုညးဒေသတံရ။

တ္ၚဲဂှ် အခိၚ်နူဂယး ၜိုတ်(၄)နာဍဳ ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၅၀)ပြၚ်ပါ ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်ဇြာန်ပျဂှ်ရ ပေါဲဗ္တိုက်ဇီုမုက် က္တဵုဒှ်လဝ်ကဵု အကြာဂကောံဇြဟတ်ပၠန်ဂတးပံၚ်ကောံတံရ။

ပေါဲဗ္တိုက်ဏံဂှ် က္တဵုဒှ်လဝ် ဗ္ဒါဲဘာလကျာ်ကွာန်ဇြာန်ပျဂှ်တုဲ လအ်လဝ် ပွိုၚ်ၜိုတ် (၁)နာဍဳရဂှ် ညးဒေသတံ ဟီုဂးလဝ်ရ။

ကြဴနူပေါဲဗ္တိုက်တုဲဂှ် ပ္ဍဲဗ္ဒါဲပွဳူဘာလကျာ်ဂှ် ဂွံဆဵုကေတ်ခၠိုၚ်ဆီတံရဂှ် ညးဒေသမွဲတၠဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ပ္ဍဲချာန်နာထလဳဂရာမ် လဝ်ဗဳဒပ်ပၞာန်တံဂှ်တှ်ေ ပ္ဍဲပေါဲဗ္တိုက်ကွာန်ဇြာန်ပျဂှ် သီဂိုၚ်ဂွံလဝ် ဇွကောန်ဂကောံ ဒပ်စဵုဒၞါညးဍုၚ်ကွာန် PDF မွဲတၠ၊ သေနာတ် (၂)ဒကိုအ်၊ မကမ်ညိည ကေုာံ ကဠာမကမ်တံရဂှ် ထ္မံက်ထ္ၜးလဝ် နွံမံၚ်ရ။

ဆေၚ်စပ်ကဵုလၟေၚ်ဒဒှ်ပေါဲဗ္တိုက်တံတုဲ ၜိုန်ရသြၚ်လောန်တိုၚ်မ် ဆက်စၠောံသၟာန်သၟုက်လဝ် ဇရေၚ်ဒပ်ပၞာန်ဗၠးၜးကောန်ဂကူကရေၚ် (KNLA) ဒပ်မဟာ (၆)တံမပါလုပ် သီုဇရေၚ်ဒပ်စဵုဒၞါဒေသတံကီုလေဝ် စဵုကဵုအခိၚ်လၟုဟ် ဟွံဂွံအဆက်ဏီရ။

ဟိုတ်နူပေါဲဗ္တိုက်ၜါလ္ပာ်တုဲ စဵုကဵုအခိၚ်လ္ဒောဝ်တ္ၚဲဂှ် ဒးအောပ်မာမံၚ်ဒၟံၚ်ပ္ဍဲသ္ၚိတုဲ စိုပ်အခိၚ်သဝ်တ္ၚဲဂှ်မှဟေၚ် ပရေၚ်ချဳဒရာၚ်အာကၠုၚ် အတိုၚ်ပက္ကတိ ဂွံနွံရဂှ် ညးဒေသတံသ္ဂးရ။

ကြဴနူပေါဲဗ္တိုက်တုဲ ဒပ်ကံၚ်ဇြဳပၞာန်လေဝ် ကလေၚ်ဆုတ်အာဒပ်ရဂှ် ဂွံတီကေတ် အတိုၚ်လဟီုညးဒေသတံရ။

ပ္ဍဲပွိုၚ်ဍုၚ်ရေဝ် လလောၚ်တြးလဝ်ပရေၚ်အုပ်ဓုပ်ပၞာန်ဂှ် အကြာဒပ်ကံၚ်ဇြဳပၞာန်ကေုာံ ဂကောံဇြဟတ်ပၠန်ဂတးတံဂှ် ပေါဲဗ္တိုက်ညိၚ်ဝတ်မံၚ်ကီုလေဝ် အခိၚ်လၟုဟ်ဂှ်တှ်ေ ပေါဲဗ္တိုက်ကလေၚ်မွဲဝါပၠန်တံ ကလေၚ်က္တဵုဒှ်ကၠုၚ်မံၚ်ရ။

ပရိုၚ်-သြၚ်လောန်တိုၚ်မ်

ဗီု-Social Media