ပ္ဍဲၜဳကလေၚ် ဂကောံဒပ်ကၚ်ကံၚ်ဇြဳပၞာန် ဒးဒုၚ်ကြတ်ဗတိုက်လဝ်

ၜဳကလေၚ်၊ အံက်တဝ်ဗာ (၁၈)

တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ပ္ဍဲဗ္ဒာဲကွာန်ဒေါက်ယာတ်ဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၁၇) အခိၚ်နူဂယး ဒပ်ကံၚ်ဇြဳပၞာန် ကၠုၚ်မၚ်ကၚ်ဂှ် ဟိုတ်နူဒးဒုၚ်ကြတ်ဗတိုက်တုဲ ပရေၚ်ဇီုကပိုက်ဒးချိုတ်လဝ် နွံမာန်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။

ဒပ်ကံၚ်ဇြဳပၞာန်ကၠုၚ်မၚ်ကၚ် ဇြဟတ်ဒပ် နွံၜိုတ် (၅၀) ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ၊ PDF တအ် ကြတ်ဗတိုက်ဖံက်ခတိုဟ်လဝ်မာၚ် ဗ္ဒာဲဘာဗ္တောန်လိက် ကွာန်ဒေါက်ယာတ်ကဵု ပ္ဍဲသ္ကုတ်ဂၠံၚ်တိုန်ကျာ်ယှိုဲအေန်တုဲ ကြတ်ဗတိုက်လဝ်ရ။

ဟိုတ်နူပရေၚ်ကြတ်ဗတိုက်ဏံတုဲ ပရေၚ်ပန်ပှော်ၜါလ္ပ်ာ ဒှ်လဝ်ဗ္ဒာဲကဝက်နာဍဳတုဲ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် နွံဒၟံၚ်ရဂှ် ကောန်ဒပ်စဵုဒၞာဒေသမွဲတၠ ဟီုလဝ်ရ။

ပ္ဍဲပရေၚ်ပန်ပှော်ၜါလ္ပာ်ဏံ လ္ပာ်ကံၚ်ဇြဳပၞာန် ဟွံအောန်နူ (၆) တၠ ဇီုကပိုက်ဒးချိုတ်လဝ် နွံမာန်ရဂှ် ၜိုန်ရလ္ပာ်ဒပ်စဵုဒၞာဒေသတအ် ဟီုလဝ်ကီုလေဝ် နကဵုသြၚ်လောန်တိုၚ်(မ်)သ္ပဒ္တန်တၞဟ်ခြာ ဟွံမာန်ဏီရ။

ကြဴဒှ်နူပေါဲဗတိုက်တုဲဂှ် ဒပ်ကံၚ်ဇြဳပၞာန် ပန်ဖျေံဏာလွဟ်ဇၞော် ပ္ဍဲမွဲဗွိုၚ်ကွာန်ဒေါက်ယာတ်ကဵု ကွာန်ခေဝ်မောက် အဆက်ဟွံပိုတ်သ္ကုတ်တုဲ အခိၚ်ဒေါဝ်တ္ၚဲ ၜိုတ် (၁) နာဍဳကလေၚ်ဂှ်မှ ပရေၚ်ပန်ပှော် ဂွံဒေါံဇူအာရဂှ် ဂွံတီကေတ် အတိုၚ်လဟီု ညးဒေသတအ်ရ။

ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ညးဒေသတအ် ဇီုကပိုက်ဒးလဝ်ဘဲဝပ်ကီု သ္ၚိဌာန်လီုလာ်အာလဝ် နွံဟၟဲကီုဂှ် နကဵုသြၚ်လောန်တိုၚ်(မ်) ဆက်လ္ၚတ်ဂၠိုက်ဂၠာဲဒၟံၚ်ဖိုဟ်ရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၅) တုဲကၠုၚ်တေံလေဝ် ဒပ်ကံၚ်ဇြဳပၞာန် ကၠုၚ်မၚ်ဒၟံၚ်ကၚ် ဗ္ဒာဲဘာဗ္တောန်လိက်ကွာန်ဒေါက်ယာတ်ဂှ် ဒးဒုၚ်ဖံက်ခတိုဟ်မာၚ်တုဲ ဟွံအောန်နူ (၅) တၠ ဇီုကပိုက် ဒးလဝ်ဘဝပ်ဏီရ။

ပရိုၚ် – သြၚ်လောန်တိုၚ်(မ်)

ဗီု -TPDF