ဒဳမအ်သဵု၊ သေပ်တေမ်ဗာ (၂)
ကောန်ၚာ်သၟတ် (၇၀) တၟံကၠံပြၚ် နူတွဵုရးကရေၚ်ဍာဲ ဒၞါဲပေါဲဗ္တိုက်ၜါလ္ပာ် မသ္ကာတ်မြဟ်ဒၟံၚ်ဂှ်ဝွံ ဟိုတ်နူကံၚ်ဇြဳပၞာန် ဗ္တိုက်ပန်ပှော် ကဵုဂၠံၚ်တရဴကျာကီု ကဵုလွဟ်လက်နက်ဇၞော်ကီုတံဂှ်ရ ဒးကတ်ဗ္တောန်ဒၟံၚ်လိက် အကြာအန္တရာယ်တံရောၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ်ပရေၚ်ပညာ တွဵုရးကရေၚ်ဍာဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ၚာ်သၟတ် (၉၅) တၟံကၠံ မၞုံတွဵုရးကရေၚ်ဍာဲတံဝွံ ၜိုန်ရကလိဂွံဒၟံၚ် အခေါၚ်ဗ္တောန်ပညာကီုလေဝ် ပ္ဍဲကဵုဂှ် (၂၅) တၟံကၠံဝွံ ကတ်ဗ္တောန်ဒၟံၚ် နူဘာကံၚ်ဇြဳပၞာန်တံတုဲ သှ်ေ (၇၀) တၟံကၠံဂှ် ဟိုတ်နူလွဟ်လက်နက်ဇၞော် ကံၚ်ဇြဳပၞာန်တံ ပန်ပှော်ဂှ်တုဲ ဒးကတ်ဗ္တောန်ဒၟံၚ်ပညာ အကြာဘဲအန္တရာယ်တံရ။
ကမ်လွဟ်လက်နက်ဇၞော် ကံၚ်ဇြဳပၞာန်တံ မပန်ပှော်ဏာ အပ္ဍဲပေါဲဗ္တိုက်ၜါလ္ပာ်ဂှ်ဝွံ ဒတုံစှ်ေဗတိုဟ်ထ္ကးဒၟံၚ် ဗဒါဲပွဳပွူ ဘာဗ္တောန်လိက်တံ နွံဒၟံၚ်ဂှ်ရ ဒးသ္ပဒၟံၚ်ဂရုကဵု ပရေၚ်ဂီုကၠီု ကောန်ၚာ်သၟတ်တံရောၚ်ဂှ် ကိုဝ်တေအ် ညးမဒှ်ကောန်ဂကောံ (နွေဦးဂုရု) မွဲတၠ ဟီုရ။
“ရာန်တၞးလိက်တံ ဟွံဂွံ၊ ကဵုသြန်ပ္တိုန်စရာဲ ကုအ္စာ၊ အ္စာၝောံတံ ဟွံမာန်၊ တုဲတှ်ေ ပ္ဍဲဘာတံဂှ် ကၠုၚ်ပန်ကဵုလွဟ်လက်နက်ဇၞော်ကီု ကဵုက္ၜၚ်ကျာကီု လ္ပာ်ဗၟံက်တေံဂှ် ဒှ်ဒၟံၚ်မွဲဏှမွဲဏှရ၊ စှ်ေဗဒါဲ ဘာဗ္တောန်လိက်တံ ဟဂှ်ရ၊ ပိုယ်တံ ဟွံပ္တိတ်ကၠုၚ်လဝ် ပရိုၚ်ရနွံ၊ လ္ပာ်ကရေၚ်ဍာဲဂှ် လွဟ်လက်နက်ဇၞော် ဗွဲမဂၠိုၚ်ဂှ်တှ်ေ စှ်ေပ္ဍဲပွဳပွူဘာတံရ၊ ပိုယ်တံ ဟွံပ္တိတ်ပရိုၚ်ဟီုဂှ် ယဝ်ရပ္တိတ်ဒးပရိုၚ် စှ်ေဒၞါဲလဵုရောဟီုမ္ဂး ဖေက်ပန်ဒၟံၚ်ဒၞါဲဂှ်ပၠန်” သာ်ဝွံ အခက်အခုဲ မဒးဂဗဒၟံၚ် ပ္ဍဲဘာတံဂှ် ကိုဝ်တေအ် ဟီုလဴထ္ၜးလဝ်ရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်ဝွံ သွက်သ္ဂောံဂွံ တမ်ရိုဟ်မၞိဟ် မဍိုက်ပေၚ်ကဵု လညာတ်ညာဏ်ပညာ၊ ကွတ်ပညာတံဂှ် သၠုၚ်ပ္တိုန်အသိၚ် ရေၚ်တၠုၚ်အာရောၚ် ဟီုဂးဒၟံၚ်သၟးဟွံက သီုကဵုကောန်ၚာ်သၟတ်တံ သ္ဂောံဂွံအခေါၚ် ဗ္တောန်ပညာဂှ် နွံပၟိက်ဒၟံၚ်ရောၚ် ဟီုဂးကၠုၚ်ဒၟံၚ် အဆက်က်ကီုလေဝ် ဒပ်ပၞာန်သၟဝ်တဲညးဂှ် ဖျေံဗ္ဒိုပ်ပ္ဍဲဘာဗ္တောန်လိက်တုဲ ကဵုဒၟံၚ်ပလာပ်ပထုဲ အခေါၚ်ဗ္တောန်ပညာတံရ။
ဘာဗ္တောန်လိက် ဒက်ပ္တန်လဝ် နဇြဟတ်ညးဍုၚ်ကွာန် နူတွဵုရးကရေၚ်ဍာဲတံဝွံ တ္ၚဲကံၚ်ဇြဳပၞာန်သီအဝဵုတံ ပန်ပှော်လွဟ်လက်နက်ဇၞော် ကြာန်န်တံမ္ဂး ဒးကၟာတ်ထောံလဝ် ဘာဂမၠိုၚ် နူမွဲသတ္တာဟ စဵုကဵု ၜိုတ်မွဲဂိတုတံ ဒှ်ဒၟံၚ်ရ။
“အရာတံဏံဂှ် ကဵုဇီုကပိုက်ကၠေံ ပရေၚ်ကတ်ဗ္တောန်ပညာ ကောန်ၚာ်သၟတ်တံရ၊ ဇီုလေဝ် ဇီုကပိုက်ဒၟံၚ်ရ၊ မဏံဂှ် တွဵုရးပိုယ်တံ သၟးဟွံကပုဟ်၊ တမ်ရိုဟ်မၞိဟ် ဆောံလေၚ် သွက်အလုံကၟိန်ဍုၚ်ဗၟာရ၊ မၞိဟ်စဳကၠးဍိုဟ်ကေက်တံ ကၠေံဗ္ဒန်အာမာန်ရ၊ ဟီုမ္ဂး သွက်ကၟိန်ဍုၚ်ပိုယ်တံ က္တဵုဒှ်ကၠေံ သ္ဇက်ဂုဏ်သိက္ခာ ဂွံစှ်ေမာန်တုဲ ခေတ်လၟုဟ်မ္ဂး ဍဟောဝ် သၟဝ်သၞောတ်ပရေၚ်ပညာခေတ်တၟိတံ ဟွံစိုပ်တုဲ စိုပ်ဍုၚ်ညးတၞဟ်မ္ဂးလေဝ် ဆက်ဒးကၠောန်ဒၟံၚ်ကမၠောန် ညံၚ်ဍိက်ပၠက်ရောၚ်ဂှ် အဲ မ္ဒးသ္ၚဳဂၠိပ်ရ” သာ်ဝွဴ ညးမၞုံအခေါၚ်ဟီုဂး ကမ္မတဳ ပရေၚ်ဗ္စာရဏာမၞိဟ် ကံၚ်ဇြဳကဵုကသပ် တွဵုရးကရေၚ်ဍာဲ ဥူဗညာ သ္ဂးရ။
သ္အာၚ်နူဂှ်ပၠန် ဟိုတ်နူပွပကီုပရာပ် ကံၚ်ဇြဳပၞာန်တံတုဲ ပရေၚ်ပညာ ကောန်ၚာ်သၟတ်တံ ဇီုကပိုက်ကၠုၚ်မာန်တုဲ သွက်ကၟိန်ဍုၚ်ဗၟာ ဒးဆောံလေၚ်ဒၟံၚ် ညးလေပ်ပညာတံရောၚ်ဂှ် ညး ဆက်ဟီုတဴရ။
ဒပ်ကံၚ်ဇြဳပၞာန်ဝွံ ကၟာတ်ကၠုၚ်ဒၟံၚ် သီုကဵုအခေါၚ်ရာန် ကပေါတ်အထံက်အရီုသ္ဂောံဗ္တောန် သွက်ကောန်ၚာ်သၟတ် မကတ်ဗ္တောန်ဒၟံၚ်ပညာ ပ္ဍဲဘာဗ္တောန်လိက် မဒက်ပတန်လဝ် နဇြဟတ်ညးဍုၚ်ကွာန် နူတွဵုရးကရေၚ်ဍာဲတံဂှ် ကၠောန်ၜိုတ်ဒၟံၚ်ရ။
ကောန်ၚာ်သၟတ် ကေုာံ ညးသၟတ် (၁၂) ပြကောဋိကိုဋ်ပြၚ် နူကၟိန်ဍုၚ်ဗၟာတံဝွံ အစဳဇန်ကတ်လ္ၚတ်ပညာလၟေၚ်ၚ်တံဂှ် ဟောဝ်က္ဍဟွံစိုပ်ရတုဲ ပွမဖောအ်ဗြေဝ် ပရေၚ်ပညာပူဂဵု ညးသၟတ်တံ၊ ပွမဂီုကၠီု စပ်ကဵုစိုတ်တံ ကေုာံ ဖဵုအဆက် မဇီုကပိုက်ကၠေံ လ္တူအခေါၚ်အရာအနာဂတ်တံဂှ် ဇၞော်ဗွဲမလောန်တုဲ ထပ်သ္ဂောံသၠုၚ်တိုန်ကၠုၚ် နွံမာန်ဂှ် Save the Children , UNESCO ကေုာံ UNICEF တံ ပံၚ်တောဲလလောၚ်တြးလဝ်ရ။
မ္ၚးနူဗ္တိုက် ဒၞါဲဗ္တောန်ပညာတံ ကဵု သၞာဲဒဴပရေၚ်ပညာတံဂှ် ပွမလုပ်စိုပ် ဖျေံလဝ်ဒပ် ပ္ဍဲကဵုဗွိုၚ်ပရေၚ်ပညာတံဂှ်ဝွံ ပရေၚ်ဂီုကၠီုဗၠးဘဲ သွက်ဖောအ်ဗြေဝ်တောတက် ကေုာံ သွက်ကတ်လ္ၚတ် ကောန်ၚာ်သၟတ်တံဂှ် ဇီုကပိုက်ကၠေံမာန်ရောၚ် ဂကောံ Save the Children သ္ဂးလဝ်ရ။
ဒပ်ကံၚ်ဇြဳပၞာန်တံဂှ် ဖျေံဒပ်တန်တဴဒၟံၚ် အပ္ဍဲဘာတံတုဲ ကဵုဒၟံၚ်ပလာပ်ပထုဲ အခေါၚ်ဗ္တောန်ပညာဖိုဟ်ရ။
ကောန်ၚာ်သၟတ် မဒးကတ်ဗ္တောန်ဒၟံၚ်ပညာ ပ္ဍဲကဵုဘာ မဒက်ပ္တန်လဝ် နဇြဟတ်ညးဍုၚ်ကွာန် နူတွဵုရးကရေၚ်ဍာဲတံဝွံ မ္ၚးနူကပေါတ်အထံက်အရီု သ္ဂောံဗ္တောန် ဟွံရုမ်ဂပ်တံ၊ ဒၞါဲမံၚ်စံၚ် ဟွံရုမ်ဂပ်တံ၊ ဇွောံမစၞစ ဟွံရုမ်ဂပ်တံ ၊ ဟွံဂွံအခေါၚ်မၚ်မွဲ ပရေၚ်ထတ်ယုက် ဍိုက်က်ပေၚ်ၚ်တံဂှ် အကြာပွမဗ္တိုက် ပန်ပှော်လွဟ်လက်နက်ဇၞော်တံ၊ ပွမဗ္တိုက်ဂၠံၚ်ကျာ နူကဵုဒပ်ကံၚ်ဇြဳပၞာန်တံဂှ် ဒးကတ်ဗ္တောန်ဒၟံၚ်ပညာ ဝါတ်တ်ဂါတ်တ်ရ။
ပရိုၚ်−သြၚ်လောန်တိုၚ်(မ်)