သၟတ်မန် ကြက်ဒှ်ကၠုၚ်က္ဍိုပ်သ္ကိုပ်အနာဂတ်တအ်ဂှ် သွက်ဂွံယိုက်ဂၠေၚ် ကေတ်တာလျိုၚ်ဂကူ ဂကောံပၠန်ဂတးမန်ဂမၠိုၚ် ပါလုပ်သီုဌာန်ကောံသၟတ်မန်တအ် ပ္တိတ်လဝ်တၚ်လလောၚ်တြး ပ္ဍဲတ္ၚဲသၟတ်မန် မရနုကဵု (၁၂) ဝါ ကၠုၚ်စိုပ်လဝ် ပ္ဍဲဂိတုဒဳဇြေမ်ဗာ စၟတ်တ္ၚဲ (၂၈) ဂှ်တုဲ ဆဝ်ပ္ၚုဟ်ရ။
ဟိုတ်ဂှ်ရ ပ္ဍဲကဵုပရေၚ်ပၠန်ဂတးဂှ် စပ်ကဵုအခန်ကဏ္ဍသၟတ်မန်တအ်ကီု၊ ပ္ဍဲဗလးပရေၚ်ဍုၚ်ကွာန်မန်ဂှ် ဂကောံဗော်သွးလဵု ထေက်က္ဍိုက်ကဵုက္ဍိုပ် ပၠကဵုတရဴထေက်ရော။ သွက်ဂွံက္လိဂွံ အခေါၚ်ကံကုသဵုမန် မန်ဖန်ဖက်ကေတ်မာန် မုထေက်ကဵုဒးကၠောန်ရေၚ်တၠုၚ်ထေက်ရော။ စပ်ကဵုအကာဲအရာဂမၠိုၚ်ဏံတုဲ ဆက်စၠောံသၟာန်လဝ်ကဵု ညးတာလျိုၚ် ဂကောံဇြဟတ်ရာမညဖေတ်ဒရေဝ်ခေတ်တၟိ NRFF နာဲပညာမာန်ရ။
သြၚ်လောန်တိုၚ်မ် – ကၠာအိုတ်ဏံ ပ္ဍဲပရေၚ်ပၠန်ဂတးဂှ် အခန်ကဏ္ဍသၟတ်မန်တအ်ကဵု စပ်ကဵုအကာဲအရာသၟတ်မန်တအ် ပါလုပ်ဒၟံၚ် ပ္ဍဲကဵုပရေၚ်ပၠန်ဂတးလၟုဟ်တုဲ ဟီုလဴထ္ၜးကဵုညိ။
နာဲပညာမာန် – ပၠန်ဂတးက္ညၚ်လၟုဟ်ဏံဂှ် ဒှ်ပၠန်ဂတး သၟတ်တံက္ဍိုက်က္ဍိုက် စဒှ်ကၠုၚ်လဝ်ရ။ ဒၟာနူဂှ်ရ လညာတ်အဲတှ်ေ ပ္ဍဲကဵုအခန်ကဏ္ဍ က္ဍိုက်က္ဍိုပ်ပရေၚ်ဍုၚ်ကွာန် ကၟိန်ဍုၚ်မန် အနာဂတ်ဂှ်တှ်ေ သၟတ်တအ်ရ ထေက်ကဵုဒးဒှ်ထေက်ဏောၚ် အဲညာတ်ကေတ်ရ။ နကဵုပရေၚ်ပၠတရဴသၟတ်တအ်ဟေၚ် ဒးဒက်ပ္တန်အာ ကၟိန်ဍုၚ်မန် အနာဂတ်ဏောၚ်။ ဟီုတှ်ေ မွဲလ္ပာ်ပၠန်ဂှ်လေဝ် သၟတ်မန်တအ်ဏံ ဒးၚုဟ်က္တဵုဒၟံၚ် ပ္ဍဲပရေၚ်ဍုၚ်ကွာန်ထေက်ဏောၚ်။ ပိုဲဂှ် ဒဒှ်ရဒှ်ဒၟံၚ် ကောန်ဂကူဗၠးၜးမွဲ သွက်ဂွံထ္ၜးစဳပျးကဵုမာန် ပိုဲဒးၚုဟ်က္တဵုဒၟံၚ် ပ္ဍဲပရေၚ်ဍုၚ်ကွာန်လၟိုန်ဏောၚ်။ ပါဲနူပရေၚ်ဍုၚ်ကွာန်ၚုဟ်က္တဵုဂှ် ညံၚ်ပိုဲ ဂွံဂံၚ်ပၠန်ဂတးဂှ်လေဝ် နွံဒၟံၚ်ပၟိက်ရလေဝ် ဏး။
သြၚ်လောန်တိုၚ်မ် – သၟတ်မန်တအ်ရော ပ္ဍဲကဵုဗလးပရေၚ်ပၞာန်၊ ပရေၚ်ဍုၚ်ကွာန် က္တဵုဒှ်ဒၟံၚ်လၟုဟ်ဏံ ညံၚ်ဂွံပါလုပ် ပ္ဍဲသွာၚ်ဇကုသၟဟ်အစောံမာန်ဂှ် ဂကောံဗော်သွးဗီုလဵု က္ဍိုက်က္ဍိုပ်ပ္ညုၚ်ထ္ၜးကဵု ဂၠံၚ်တရဴထေက်ရော။ လ္တူဏံ ဗီုလဵုညာတ်လဝ်ရော။
နာဲပညာမာန် – အခန်ကဏ္ဍက္ဍိုက်က္ဍိုပ်ပရေၚ်ဍုၚ်ကွာန် တွဵုရးဍုၚ်မန် အခိၚ်လၟုဟ်ဏံ ယဝ်ဒးဟီုတှ်ေ ပိုဲဂှ်တှ်ေ ညာတ်ကေတ်ဒၟံၚ် ၜါဗွဝ်ရ။ ဗော်ဍုၚ်မန်တၟိကဵု ကံၚ်ဇြဳဖေတ်ဒရေဝ်ဍုၚ်မန်တအ်ရ။ ဗော်ဍုၚ်မန်တၟိဂှ်တှ်ေ ဒၟာနူဒှ် ဂကောံပၠန်ဂတးဝှ်ကြံၚ် မွဲဗော်ဂှ်ရ သွက်ဂွံဒးဟီုဂး တၟေၚ်ၚ်တၟဟ်ဟ်ဟၟဲပုဟ်။ ပ္ဍဲညးတအ် ညးဍုၚ်ကွာန်ထံက်ဂလာန် နွံဒၟံၚ်ရ။ ဗွဲတၟေၚ်တှ်ေ ကောန်ဂကူမန်တအ် ထံက်ဒၟံၚ်ဂလာန် နွံရ။ မၞိဟ်ပူဗိုၚ်ညးတအ်လေဝ် ဂၠိုၚ်ဒၟံၚ်။ မွဲလ္ပာ်ပၠန်ဂှ် ကံၚ်ဇြဳဖေတ်ဒရေဝ်ဍုၚ်မန်ရ။ ကံဇြဳဖေတ်ဒရေဝ်ဍုၚ်မန်ဂှ်တှ်ေ ဒှ်ကံၚ်ဇြဳစန်ပကောံလဝ် ဂကောံ ပ္ဍဲကဵုတွဵုရးဍုၚ်မန် ပါလုပ်ဒၟံၚ် ပ္ဍဲပၠန်ဂတးက္ညၚ် အခိၚ်လၟုဟ်ဏံ မွဲဂကောံရ။ ဟီုတှ်ေ ညးတအ်ဂှ် အခိၚ်လၟုဟ်ဏံ ဒှ်ဂကောံ သ္ပဗဟဵုတုဲ ဒးချပ်ၜါဂကောံ ၜါဗွဝ်ရ။
သြၚ်လောန်တိုၚ်မ် – နကဵုကောန်ဂကူမန်တအ် သွက်ဂွံပၠန်ဂတးကဵုကံၚ်ဇြဳပၞာန် ပ္ဍဲတွဵုရးဍုၚ်မန်ဂှ် ဒှ်အခိၚ်ခိုဟ်အိုတ်ဏောၚ် ညာတ်ကေတ်ဟာ။ လ္တူဏံ သဳကၠဳထ္ၜးကဵုပၠန်ညိ။
နာဲပညာမန် – ယွံဍာံဒၟံၚ်ရ။ အခိၚ်လၟုဟ်ဂှ်တှ်ေ ဒှ်အခိၚ်ကံၚ်ဇြဳပၞာန် ဇြဟတ်ဍိုန်လျစှ်ေဒၟံၚ်ရ။ အရာဏံလေဝ် အတိုၚ်တီဒၟံၚ် ညးသ္ကအ်ဂှ်ရ။ ဟီုတှ်ေ ဍေံတအ်ဒးပံက်လဝ်မုက်ပၞာန် ပ္ဍဲကဵုဒေသ ကောန်ဂကူကောန်ဍုၚ်အရၚ်တအ်ရ။ ဒှ်အခိၚ် ပၠန်ဂတးဒစဵုဒစးဒၟံၚ်ကဵု ကံၚ်ဇြဳပၞာန် သီုအလုံကၟိန်ဍုၚ်မွဲရ။ ဟီုတှ်ေ ဒှ်အခိၚ်ဇြဟတ်ဍေံတအ် ဍိုန်လျအိုတ်ရ။ ပ္ဍဲတွဵုရးဍုၚ်မန် ယဝ်ရဒးဟီုတှ်ေလေဝ် ပ္ဍဲကဵုဂိတုတုဲကၠုၚ်တေံ ဌာန်ဂအုပ်ရးပၞာန်ဒိုဟ်အဂၞဲ စဵုကဵုဒးဒုၚ်ဗတိုက်လဝ်ကဵုဒရုမ် ဒှ်လဝ်ရ။ ဟီုတှ်ေ ဗွဲသာမညတှ်ေ ပရေၚ်ဗတိုက်ပန်ပှော် ဒှ်ဒၟံၚ် ပ္ဍဲကွာန်ရးတအ်ဂှ် စိုပ်ကၠုၚ်လ္တူဍုၚ်ဇၞော် ဗွဲတၟေၚ်တှ်ေ ပ္ဍဲတွဵုရးဍုၚ်မန်ဂှ် အောန်ဒၟံၚ်ရ။ လၟုဟ်တှ်ေ စိုပ်ကၠုၚ် ဒဵုကဵုဍုၚ်မတ်မလီုဂှ်ရ ၜိုတ်ကဆံၚ်လဵု ကံၚ်ဇြဳပၞာန် ဇြဟတ်ဂီုကၠီုဍေံတအ် ဍိုန်လျဒၟံၚ်ရောဂှ် ဂွံဆဵုညာတ်ကေတ်ဒၟံၚ် ကၠးကၠးမးမးရ။
မွဲလ္ပာ်ပၠန်ဂှ်လေဝ် ပ္ဍဲကဵုတွဵုရးဍုၚ်မန်ဂှ် သၟတ်မန်တအ်ဏံကီု၊ သၟတ်နွံဒၟံၚ် ပ္ဍဲတွဵုရးဍုၚ်မန်တအ်ကီု ကၠောန်ဒၟံၚ်ပၠန်ဂတး နကဵုနဲကဲစုၚ်ညးသ္ကအ်ဂှ် နွံဒၟံၚ်ရ။ ၜိုန်ဂှ်လေဝ် သၟတ်တအ်ဏံ နွံကၠုၚ်ပၟိက် ဇြဟတ်ကောံကလောံရ။ သီုဖအိုတ်ဂှ် စိုပ်ဒၟံၚ်အကာဲအရာ ပြးဇးဒၟံၚ်တုဲ ပိုဲတအ်ဂှ် ပ္ဍဲကဵုကာလဏံ က္လေၚ်စန်ပကောံသၟတ်တအ်ဏံတုဲ ယဝ်ရလုပ်အာပေါဲဗတိုက် မွဲစွံမာန်ဏောၚ်တှ်ေ ပိုဲဖန်ဗဒှ် တွဵုရးဍုၚ်မန်သၠးၜး၊ ဗၠးၜး မွဲတွဵုရးမာန်ဏောၚ်။