ကံၚ်ဇြဳပၞာန် ဒးဂိဒၟံၚ် ပ္ဍဲပၞာန်ထ္ပက်အလုံမွဲကၟိန်ဍုၚ်ဂှ် နကဵုဂကောံဒပ်ရပ်လွဟ်တအ် သွက်ဂွံသောၚ်ကလးအာ အတိုၚ်နဲကဲဂၠံၚ်တရဴ ပရေၚ်ဍုၚ်ကွာန်ညးသ္ကအ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် ဟီုဂးလဝ် ပ္ဍဲကောံဓရီုကံၚ်ဇြဳပၞာန် ကၠောန်ဗဒှ်လဝ် ပ္ဍဲဂိတုဒဳဇြေမ်ဗာစၟတ်တ္ၚဲ (၄) တုဲကၠုၚ်ဏံရ။ ပ္ဍဲကောံဓရီုဂှ် စပ်ကဵုအကာဲအရာပၞာန် တွဵုရးရခေၚ်ကဵု တွဵရးကရေၚ်ဍာဲ စွံအဓိက ဟီုဂးလဝ်တုဲ ညံၚ်တွဵုရးရးခေၚ် ဟွံဂွံညိၚ်ဝတ်ဂှ် ဒပ်ပၞာန် ရခေၚ် AA ကၠောန်သ္ပဒၟံၚ်ရဂှ် ဟီုစောတ်စောဲလဝ်ရ။
လ္တူက္ဍိုပ်သ္ကိုပ်ပၞာန်ဟီုဂးလဝ် သွက်ဂွံသောၚ်ကလးအာ အတိုၚ်ဂၠံၚ်တရဴနဲကဲပရေၚ်ဍုၚ်ကွာန် တၚ် AA ကလေၚ်ပလန်တဲ၊ သီုကဵုတၚ်လစွံစိုတ်ကီု ဟိုတ်နူပေါဲဗတိုက် ပ္ဍဲတွဵုရးရခေၚ်တုဲ စပ်ကဵုအကာဲအရာညးဒေသတအ် ဒးဂြိပ်ဒဴပါဲဓလေတ်ဒၟံၚ်တုဲ ဆက်စၠောံသၟာန်လဝ်ကဵု ညးမၞုံအခေါၚ်ဟီုဂး ဒပ်ပၞာန်ရခေၚ် AA ဥူခိုၚ်သုခရ။
သြၚ်လောန်တိုၚ်မ် – ကၠာအိုတ်ဏံ ပ္ဍဲလ္တူက္ဍိုပ်သ္ကိုပ်ပၞာန်ဟီုဂးလဝ် သွက်ဂွံဂၠာဲသွဟ် အတိုၚ်ဂၠံၚ်တရဴနဲကဲပရေၚ်ကွာန်ဂှ် နကဵု AA လစွံစိုတ်ဗီုပြၚ်လဵု နွံရော။
ဥူခိုၚ်သုခ – တၚ်ကံၚ်ဇြဳပၞာန်ပ္ကီုပရာပ် ဟီုဂးလဝ် ဆဵုဂဗသဳကၠဳအာ အတိုၚ်ပရေၚ်ဍုၚ်ကွာန်ဏောၚ်ဟီုဂှ် သွက်ကံၚ်ဇြဳပၞာန် ဒးကြေပ်ဂြတ်ဒၟံၚ် သွာၚ်နာနာဂှ် ဂွံပၞော်တိတ်ပရေၚ်ဍုၚ်ကွာန်ဍေံတအ် မွဲမာန်ဟာဂးတုဲ ဒှ်ကိစ္စဟီုဂးလဝ်ရဂှ် ပိုဲညာတ်ရ။ ပ္ဍဲဒၞာဲဏံ တၚ်ဒးချပ်မွဲဂှ် ယဝ်ရဍေံတအ် ဆဵုဂဗသဳကၠဳ အတိုၚ်ပရေၚ်ဍုၚ်ကွာန်ဏောၚ်တှ်ေ ဒုၚ်သ္ဇိုၚ်လ္တူအရာလဵုတုဲ ဍေံတအ်သဳကၠဳရော။ လၟုဟ်ဂှ် ကံၚ်ဇြဳပၞာန်ဟီုကၠုၚ်ဒၟံၚ်မွဲဒမြိပ် ဒုၚ်သ္ဇိုၚ်ကဵု သၞောဝ်သ္ဇိုၚ်ဒက်ပ္တန် ၂၀၀၈ NCA တုဲ ကိစ္စသဳကၠဳဏောၚ်ဟီုဂှ် အရာဏံ ညးဂှ်လေဝ် ကိစ္စသွက်ဂွံဒုၚ်တဲမာန် ဟၟဲရ။ ဒှ်ကိစ္စ ဒှ်ကမၠောန်ဟွံသေၚ်ရ။ ပ္ဍဲကၟိန်ဍုၚ်ဗၟာ ၂၉၆၂ ဂှ် ကံၚ်ဇြဳပၞာန်အဆက်က် သီကေတ်အဝဵုတုဲ အလဵုအသဳတိုန်ကၠုၚ် အဆက်က်တအ်ဂှ် ပေါဲသဳကၠဳ သဳကၠဳကၠုၚ်လဝ် သီုဖအိုတ်ဂှ် မုသွဟ်လေဝ် ဟွံတိတ်လဝ်ပုဟ်။
မုလေဝ် ပေါဲသဳကၠဳ အံၚ်ဇၞးကၠုၚ်လဝ် ကၠးကၠးဖ္ဍးဖ္ဍး ဟၟဲကၠုၚ်ပုဟ် အလုံမွဲဒမြိပ်ဝၚ်ဂှ်။ တုဲပၠန်မွဲဂှ် နကဵုကံၚ်ဇြဳပၞာန် ဟီုဒၟံၚ် ဆဵုဂဗသဳကၠဳအာ အတိုၚ်ပရေၚ်ဍုၚ်ကွာန်ဂှ် ဍေံတအ်ဂှ် ဒှ်ဂကောံပရေၚ်ဍုၚ်ကွာန် ဟွံသေၚ်ပုဟ်။ ယဝ်ရဒးဟီုတှ်ေ အလဵုအသဳ ညးဍုၚ်ကွာန်ရုဲစှ်ပ္တိုန်လဝ်လေဝ် ဟွံသေၚ်တုဲ ဒှ်အလဵုအသဳ သ္ပစၞးကဵုညးဍုၚ်ကွာန်လေဝ် ဟွံသေၚ်ရ။ ဒၟာနူဂှ်ရ သွက်ဂွံသဳကၠဳ အတိုၚ်ပရေၚ်ဍုၚ်ကွာန် ဍေံတအ်ဂှ် ဒှ်ဂကောံလုပ်သၞောဝ်ဟွံသေၚ်ပုဟ်။ ဍေံဂှ် ဒှ်ဒပ်ပၞာန်ပ္ကီုပရာပ် သက်က်ရ။ ဒၟာနူဂှ်ရ ကိစ္စဥက္ကဋ္ဌကံၚ်ဇြဳပၞာန် ဟီုဒၟံၚ် ဆဵုဂဗသဳကၠဳအာ အတိုၚ်ပရေၚ်ဍုၚ်ကွာန်ဂှ်တှ်ေ မုလေဝ် ဒှ်ကၠုၚ်မာန်ဟွံသေၚ်ပုဟ်ဂှ် အဲညာတ်ကေတ်လဝ် ဗီုဏံရ။ အဓိပ္ပါယ်လေဝ် ဟၟဲပုဟ်လေဝ်။
သြၚ်လောန်တိုၚ်မ် – ပ္ဍဲလ္တူသွက်ဂွံသောၚ်ကလးအာ အတိုၚ်နဲကဲဂၠံၚ်တရဴပရေၚ်ဍုၚ်ကွာန် သွက်ဂွံသဳကၠဳအာ ဓဝ်ၜိုဟ်လလံဂှ် နကဵု AA မုမိက်ဂွံက္လေၚ်ဟီု ပလန်အာတဲ နွံရော။
ဥူခိုၚ်သုခ – ကံၚ်ဇြဳပၞာန်ပ္ကီုပရာပ်ဂှ် ဒှ်ဂကောံဒုၚ်လျိုၚ် အတိုၚ်ပရေၚ်ဍုၚ်ကွာန်မာန် ဟွံသေၚ်ပုဟ်။ သဳကၠဳကဵုကံၚ်ဇြဳပၞာန် ပ္ကီုပရာပ်လေဝ် မုလေဝ်ဒှ်ကၠုၚ်မာန် ဟွံသေၚ်ပုဟ်။ ဍေံဂှ် တံၚ်အခိၚ်တုဲ သောၚ်ကလးအာ အကြေပ်ဂြတ်ဍေံတအ်ဏောၚ်။ တုဲတှ်ေ ယဝ်ရအကာဲအရာဍေံ ခိုဟ်ကၠုၚ်တှ်ေ က္လေၚ်ဗတိုက်ကၠုၚ်ပၠန်ဏောၚ်။ ဗက်ရပ်ပြိုက်ဂစိုတ်မၞိဟ်တအ် ဟွံဗဗွဲကဵုဓဝ်ပၠန်ဏောၚ်။ ဒၟာနူဂှ်ရ ပရေၚ်ဆဵုဂဗသဳကၠဳကံၚ်ဇြဳပၞာန်ဟီုဒၟံၚ်ဂှ်တှ်ေ ဒှ်ဟီုဒၟံၚ် သွက်ဒတုဲဖိုလ်ဍေံသက်က်ရ။ ဟီုဒၟံၚ် သွက်ဒတုဲဖိုလ် ညးဍုၚ်ကွာန်ဟွံသေၚ်ပုဟ်။ ဒၟာနူဂှ်ရ ကိစ္စဏံဂှ်တှ်ေ ဗွဲအစောံကြက်ရှ်သာမုလေဝ် ဒှ်ကၠုၚ်မာန်ဟွံသေၚ်ပုဟ်။ ဒှ်အရေဝ် ဟၟဲကဵုအဓိပ္ပါယ်ရဂှ် အဲညာတ်ကေတ်ရ။
သြၚ်လောန်တိုၚ်မ် – တုဲမွဲပၠန်ဂှ် ညံၚ်တွဵုရးရခေၚ် ဟွံဂွံညိၚ်ဝတ် AA ကၠောန်ဒၟံၚ်ရဂှ် လ္တူကံၚ်ဇြဳပၞာန်ဟီုဂးလဝ်ဂှ်ရော မုမိက်ဂွံဟီုကဵု တၚ်သမ္တီက္လေၚ်ပလန်အာတဲ နွံရော။
ဥူခိုၚ်သုခ – က္ဍိုပ်သ္ကိုပ်ကံၚ်ဇြဳပၞာန်ပ္ကီုပရာပ် ဟီုဒၟံၚ်ညံၚ်ပရေၚ်ဟွံညိၚ်ဝတ် ပ္ဍဲဒေသ ဂွံဒှ်ကၠုၚ်ဂှ် ဂကောံရပ်လွဟ်တအ် ကၠောန်ဒၟံၚ်ရ။ ညံၚ်ဒေသရခေၚ် ဟွံဂွံညိၚ်ဝတ်ဂှ် AA ကၠောန်သ္ပဒၟံၚ်ရဂှ် တၚ်စောတ်စောဲဟီုဂးလဝ်ဂှ်တှ်ေ ဒှ်ကိစ္စဟီုဂးဒၟံၚ် မုက်ဂွ ဂုဏ်သိက္ခာဟၟဲ ရဂှ် မိက်ဂွံဟီုရ။ ပါလုပ်သီုဍုၚ်ရခေၚ်ပိုဲ အလုံမွဲကၟိန် ဍုၚ်ညံၚ်ပရေၚ်ဟွံညိၚ်ဝတ် ဂွံက္တဵုဒှ် ညံၚ်ဂွံစိုပ်ဒဒိုက် အလုံမွဲကၟိန်ဍုၚ်ဂှ် သုၚ်စောဲဒပ်ပၞာန်တိုက်၊ ပၞာန်ဍာ်၊ ပၞာန်ကျာသီုဖအိုတ်တုဲတှ်ေ ဗတိုက်ပန် ပ္ကီုပရာပ်ပြိုက်ဂစိုတ်ဒၟံၚ် ညးဍုၚ်ကွာန်တအ်တုဲ ဂြာတ်ထောံဖျေံဗုမ် ပ္ဍဲဍုၚ်ကွာန်၊ စံၚ်ပလီုပၠံၚ်ၜးကေတ်ကပေါတ် သ္ၚိဒၟံၚ်ညးဍုၚ်ကွာန် ပလီုပလာ်ဒၟံၚ် ဂတးဒၟံၚ်တိ ဗီုဏံဂှ် ဒှ်ဒပ်ကံၚ်ဇြဳပၞာန် ပ္ကီုပရာပ်ဍေံတအ်ရ။ ညးဍုၚ်ကွာန်ဒးဒုၚ်ဒၟံၚ်ဘဲဒဏ်ပ္ကီုပရာပ်ဍေံတအ် သီုအလုံမွဲကၟိန်ဍုၚ်လေဝ် အတိုၚ်တီဒၟံၚ်ဂှ်ရ။ ကိစ္စဏံဂှ် ကၟိန်ဍုၚ်နာနာလေဝ် တီဒၟံၚ်ရ။
ဒၟာနူဂှ်ရ နူကဵုလိက်ပရိုၚ်၊ တဳဗဳ ကံၚ်ဇြဳပၞာန် ဒပ်ပၞာန်ပ္ကီုပရာပ် ထိၚ်ဒဝ်လဝ်တအ်ဂှ် အရာတအ်ဏံဂှ် ဂတးဂတန် လီဠာန် တြးဒၟံၚ်ဝါဒ ဓဝ်ဍာံဒုဟ်ရာဇဝဝ်ကံၚ်ဇြဳပၞာန် ပ္ကီုပရာပ်ဍေံတအ်က္လိလောန်လဝ် ပ္ဍဲကဵုဗလးမုက်တိတအ်ဂှ် ကၠေံဗ္ဒန်အာဟွံသေၚ်ပုဟ်။ နကဵု ULA ပိုဲတှ်ေ ညးပါလုပ်ဆက်စပ် ဒၟံၚ်ပ္ဍဲဒပ်ပၞာန် တံဒပ်ပၞာန်ဖေတ်သေတ်ပၞာန်ပ္ကီုပရာပ်ဗၟာ ပါလုပ်ဒၟံၚ် ပ္ဍဲအရာက္လိလောန်ပ္ကီုပရာပ် လ္တူညးဍုၚ်ကွာန်ပိုဲတအ် သီုညးဖအိုတ်ဂှ် ပိုဲပ္တိုန်လဝ်စၟတ်သမ္တီသၞောတ်စှ်ေစှ်ေ ချိုတ်တ်ပၠိုတ်တ်ရ။ တုဲတှ်ေ က္လေၚ်ပလန်တဲ ဗတိုက်အာ ချိုတ်တ်ပၠိုတ်တ်ပၠန်ဏောၚ်။
သြၚ်လောန်တိုၚ်မ် – ဟိုတ်နူပေါဲဗတိုက် တွဵုရးရခေၚ်တုဲ အကာဲအရာညးဍုၚ်ကွာန် ဇီုကပိုက်ဒးချိုတ်လဝ် ကဵု ဒးဂြိပ်ဒဴပါဲဓလေတ်ဒၟံၚ်တအ်ကီု သီုကဵုအရီုဗၚ် နွံဒၟံၚ်ပၟိက် သွက်အရီုဗၚ်ဗ္စာရဏာပရေၚ်မၞိဟ်တအ်ဂှ် ဆက်နွံဒၟံၚ် ဗီုပြၚ်လဵုရော။
ဥူခိုၚ်သုခ – လၟုဟ်ဟီုတှ်ေ ကံၚ်ဇြဳပၞာန်ဖေတ်သေတ်ဗၟာပ္ကီုပရာပ် ကြာန်ဒၟာန်တုဲတှ်ေ ဟိုတ်နူပန်ဖျေံလွဟ်ဇၞော်၊ ဗတိုက်ကဵုက္ၜၚ်ကျာ၊ ပန်နၚ်လွဟ်ဇၞော် နူကဵုဒပ်ပၞာန်ဍာ်တအ်တုဲ အပံၚ်လၟိဟ်မၞိဟ်ညးဍုၚ်ကွာန်ရခေၚ်ပိုဲ ထောံသ္ၚိဌာန်တုဲ ဒးဂြိပ်ဒဴဒၟံၚ် ၁၂၆၃၄၃ တၠ၊ ဂကောံအိန်ထံၚ် ၂၁၄၂၆ ဂကောံ နွံဒၟံၚ်ယျ။ မၞိဟ်ဒးချိုတ်လဝ် ၃၀ ပြၚ်၊ မၞိဟ်ဒးလဝ်ဝပ် ၁၁၀ ပြၚ်၊ ညးဍုၚ်ကွာန်ရခေၚ် ဒးဒုၚ်ရပ်လဝ်ကဵု ဒပ်ပၞာန်ပ္ကီုပရာပ် ဟွံဗဗွဲဓဝ် ၁၁၃ တၠနွံဒၟံၚ်ယျ။ လၟိဟ်ညးထောံသ္ၚိဌာန်တအ်ဂှ် ပ္တိုန်လဝ်စရၚ်စၟတ်သမ္တီနွံတုဲ ညးဍုၚ်ကွာန် ဟွံဂွံပ္တိုန်လဝ်စရၚ်ဏီလေဝ် နွံဗွဲမဂၠိုၚ်ရ။ ဒၟာနူဂှ်ရ လ္တူနူကဵုလၟိဟ် ပိုဲဓမံက်ထ္ၜးလဝ်ဏံ လၟိဟ်မၞိဟ်ညးပါဲဘဲပၞာန် ဂၠိုၚ်မာန်ဒၟံၚ်ဏီရ။