သ္ကိုပ်ပၞာန်ဇၞော်မေန်အံၚ်လှာၚ် က္ဍိုပ်သ္ကိုပ်ပၞာန်သီအဝဵု ဒးကျဟောံဗြီုဒၟံၚ် ဇၟာပ်ပေါဲပၞာန် ဟိုတ်နူဂကောံဇြဟတ်ပၠန်ဂတးတအ် ဗတိုက်ဒၟံၚ်ဂှ် နကဵုဂကောံရပ်လွဟ်တအ် သွက်ဂွံဂၠာဲအာသွဟ် အတိုၚ်နဲကဲဂၠံၚ်ဍာန်ပရေၚ်ဍုၚ်ကွာန်ညးသ္ကအ်ဂှ် ဟီုပ္တိတ်လဝ် ပ္ဍဲကောံဓရီုကံၚ်ဇြဳပၞာန် ကၠောန်ဗဒှ်လဝ် ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၄) ဂှ်ရ။ ပရေၚ်ညးဟီုပ္တိတ်လဝ်ဂှ် ဒှ်အခိၚ် ဒးဗလးလဝ်တဲ အပံၚ်လၟိဟ်ဍုၚ် ဟွံအောန်နူ ၁၈ ဍုၚ် မွဲကရောံကဵုအပြုပြေၚ်ပၞာန် ၁၀၂၇ ကီု၊ ဗဒိုပ်ပၞာန်ဂၠိုၚ်ကဵုကၠံ ဒးဆောံလေၚ်လဝ်ကီု၊ သီုဒှ်အခိၚ် အလုံတံဒပ်မွဲ လုပ်ကၠုၚ်ဖျေံလဝ်လွဟ်ကဵု အခိၚ်ဒးက္လေၚ်ဒုၚ်ဒၟံၚ်တဲ ပၞာန်ဂြိပ်တိတ်တအ်ရ။
ဟိုတ်ဂှ်ရ ပ္ဍဲလ္တူက္ဍိုပ်သ္ကိုပ်ပၞာန်ဟီုဂးလဝ်ဏံ စပ်ကဵုလစွံစိုတ်ကီု၊ ပါလုပ် သီုဗလးပရေၚ်ဍုၚ်ကွာန်ဒှ်ကၠုၚ်မာန်ကီု သီုကဵုအကာဲအရာဒပ်ပၞာန်သီအဝဵုတအ်တုဲ ဆက်စၠောံသၟာန်လဝ်ကဵု ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သိုဝ်နိုၚ်ရ။
သြၚ်လောန်တိုၚ်မ် – ကၠာအိုတ်ဏံ က္ဍိုပ်သ္ကိုပ်ပၞာန်ဂှ် ဒၟာနူဍေံတအ်ဟွံသေၚ် ဟိုတ်နူဂကောံရပ်လွဟ်တအ် ကြအ်ဒိုဟ်တုဲ ညးဍုၚ်ကွာန်တအ် ဒးဂိဏောၚ် လ္တူဟီုဂးလဝ်ဏံဂှ် ဗီုလဵုညာတ်ကေတ်ရော။
ဥူတာန်သိုဝ်နိုၚ် – ကမၠတ်ဂှ် ကလေၚ်ကဟုက်ဒၟံၚ် မၞိဟ်ရ။ ဒပ်ပၞာန်မေန်အံၚ်လှာၚ် ပြိုက်ဂစိုတ်ဒၟံၚ်၊ စံၚ်ပလီုဒၟံၚ်သ္ၚိ၊ လၟုဟ်ဂှ် လုပ်ဂွံပ္ဍဲကွာန်တုဲ မၞိဟ်ကဵုကပေါတ်တှ်ေတုဲ ဟိုတ်နူကဵုဒပ်ဍေံတအ် ညးဍုၚ်ကွာန်တအ် ဒးစိုပ်ဒၟံၚ်ဒဒိုက်ရ။ ပွပ္ကီုပရာပ်သီုဖအိုတ်ဂှ် ဍေံရကၠောန်လဝ်။ ဟိုတ်ဂှ်ရ ကမၠတ် က္လေၚ်ကဟုက်ဒၟံၚ်မၞိဟ်ရ။ သီုဖအိုတ်ဂှ် ဟိုတ်နူပွပ္ကီုပရာပ်ဍေံတုဲ ညးဍုၚ်ကွာန်တအ် ဒှ်ဒၟံၚ်ဒဒိုက် နာနာသာ်ရ။ ဒၟာနူဂှ်ရ သွက်ဂွံဒးက္လေၚ်သောၚ်ကလးကဵု မုဟၟဲရပုဟ်။ နွံဒၟံၚ်ပၟိက်ဂှ်တှ်ေ သွက်ဒပ်ပၞာန်ဂွံလလံအိုတ်အာ ပေါဲဗတိုက်ညးဍုၚ်ကွာန်တအ်ဂှ် သၠုၚ်ပ္တိုန်အသိၚ်တုဲ သွက်ဂွံဗတိုက်အာညးသ္ကအ်ရ နွံဏောၚ် အဲညာတ်ကေတ်ရ။
သြၚ်လောန်တိုၚ်မ် – ဒပ်ကံၚ်ဇြဳပၞာန်ဂှ် ပ္ဍဲကဵုအကာဲအရာကြေပ်ဂြတ်ကၠုၚ်ပေၚ်ၚ်ဏံ လ္တူက္ဍိုပ်သ္ကိုပ်ပၞာန် ဗတိုက်ဖ္အောဝ်ကၠုၚ် သွက်ဂွံသောၚ်ကလးအာ အတိုၚ်နဲကဲဂၠံၚ်တရဴဴပရေၚ်ဍုၚ်ကွာန်ဂှ် ဗီုလဵုသ္ၚဳဂၠိပ် ညာတ်ကေတ်ရော။
ဥူတာန်သိုဝ်နိုၚ် – အရာဏံဂှ်တှ်ေ စိုပ်ကရေပ်ကြေပ်ကၠုၚ်တှ်ေ ဟီုပ္တိတ်နၚ် ရမျာၚ်ဏံရ။ ပ္ဍဲလ္တူဏံ နကဵုပိုဲညးဍုၚ်ကွာန်တအ် ညံၚ်ဟွံဂွံချပ်ဟဳဗက်ကဵု ညံၚ်ဟွံဂွံလၟောဝ်ဗက်အာ ပ္ဍဲလ္တူဍေံဟီုလဝ်ဂှ်ရ ပၟိက်ဇၞော်ဒၟံၚ်။ တ္ၚဲဏံ ဒဒိုက်စိုပ်ဒၟံၚ် ပ္ဍဲဍုၚ်ဗၟာသီုဖအိုတ် တံရိုဟ်ဍေံဂှ် ဟိုတ်နူကမၠောန်ပ္ကီုပရာပ် ကောန်ရဲဥက္ကဋ္ဌကံၚ်ဇြဳပၞာန် မေန်အံၚ်လှာၚ် ပြိုက်ဂစိုတ်ဒၟံၚ်ဟၟဲကဵုသၞောဝ်သၞောတ်ဂှ် ဒးကၠိုဟ်တီလဝ် ထေက်ရ။ ဒၟာနူဂၠာဲပၞော်တိတ်ပရေၚ်ဍုၚ်ကွာန် နူမေန်အံၚ်လှာၚ်ဂှ် လ္တူဏံ ဟွံစွံလဝ်ဓဝ်ပတှ်ေပုဟ်။ ပၞော်တိတ်ပရေၚ်ဍုၚ်ကွာန်လေဝ် ကဵုဟွံဂွံပုဟ်။ အခိၚ်လၟုဟ်ဂှ်တှ်ေ ပါသီုကဵုဍေံ ကံၚ်ဇြဳပၞာန်သီုဖအိုတ်ဂှ် ပ္တိုန်ရုၚ်သၞောဝ်ဓဝ်ညးဍုၚ်ကွာန်တုဲ ညံၚ်ဂွံစောဲဂဗုတ်မာန်ဂှ် သီုညးဖအိုတ် ဒးဘိုၚ်ကရိုၚ်ရီုဗၚ်ကဵု ပၠန်ဂတးက္ညၚ်ဂှ်ရ နွံပၟိက်ရဂှ် အဲပတှ်ေကေတ်လဝ်ရ။
သြၚ်လောန်တိုၚ်မ် – ဒတူလာၚ်အာ နူကဵုသၞောဝ်သ္ဇိုၚ်ဒက်ပ္တန် ၂၀၀၈ နကဵုတာလျိုၚ်ပိုဲပိတၚ်ဂှ်တုဲ သဳကၠဳဏောၚ် လ္တူက္ဍိုပ်သ္ကိုပ်ပၞာန်ဟီုလဝ်ဂှ် ဗီုလဵုညာတ်ကေတ်ရော။ သွက်ပေါဲသဳကၠဳတအ် ဂွံဒှ်ကၠုၚ်မာန် နွံဟာ။
ဥူတာန်သိုဝ်နိုၚ် – လ္ပာ်ပၠန်ဂတးညးဍုၚ်ကွာန်ပိုဲလေဝ် ဓမံက်ထ္ၜးလဝ် တၚ်လစွံစိုတ် တုဲဒၟံၚ်ရ။ လၟုဟ်ဂှ် သွက်ဂွံရိုဟ်ပလီု သၞောဝ်သ္ဇိုၚ်ဒက်ပ္တန် ၂၀၀၈ ညံၚ်ဒပ်ပၞာန် ဂွံနုက်တိတ် နူပရေၚ်ဍုၚ်ကွာန် ယဝ်ရဂွံ ၜါတၚ်ဏံဟေၚ်မှ ဂွံချပ် စပ်ကဵုပေါဲဆဵုဂဗသဳကၠဳဏောၚ်ဂှ် လ္ပာ်ပၠန်ဂတးက္ညၚ်ပိုဲ လလောၚ်တြးလဝ် တၚ်လစွံစိုတ်တုဲဒၟံၚ်ရ။ သွက်ဂွံဆက်ကၠောန် အာအတိုၚ်ဂှ်ရ။
သြၚ်လောန်တိုၚ် – အလန်လကြဴအိုတ်ဏံ ဗလးပရေၚ်ဍုၚ်ကွာန်အခိၚ်တ္ၚဲဏံ မုဆက်ဒှ်ကၠုၚ်မာန်ရော။ စပ်ကဵုတၠုၚ်လအာ ဂကောံပၞာန်တုဲ ဟီုထ္ၜးသဳကၠဳကဵုပၠန်ညိ။
ဥူတာန်သိုဝ်နိုၚ် – သွက်ဂွံဂၠာဲပၞော်တိတ်ပရေၚ်ဍုၚ်ကွာန် ပ္ဍဲကဵုပ္တိုန်ကၠုၚ်လဝ်ဂှ် ဂကောံမေန်အံၚ်လှာၚ်တအ် ပ္တိုန်ထ္ၜးကၠုၚ်လဝ် သွက်ပေါဲဆဵုဂဗသဳကၠဳပရေၚ်ဍုၚ်ကွာန် ပေါဲပ္ညဳပ္ညပ်ဒေါံပန်ပှော်တအ်ဂှ် ညိဓဝ် ပိုဲချပ် ဟွံထေက်ရ။ အခိၚ်လၟုဟ်ဏံ ဟိုတ်နူဒှ်အခိၚ်ပေါဲအံၚ်ဇၞး ညးဍုၚ်ကွာန်တအ်ဂှ်ရ ပါလုပ် သီုဥက္ကဋ္ဌကံၚ်ဇြဳပၞာန်ဏံ ကံၚ်ဇြဳပၞာန်ကီု သီုကဵုအလုံဂကောံပၞာန်မွဲ ဒှ်အခိၚ် သွက်ဂွံပ္တိတ်ဏာဂြိုပ်ရဂှ် ပိုဲညာတ်ကေတ်ရ။ အတိုၚ်ပရေၚ်ဍုၚ်ကွာန်တှ်ေ ညံၚ်ဟွံဂွံကဵုမေန်အံၚ်လှာၚ် ပၞော်တိတ်ပရေၚ်ဍုူၚ်ကွာန်ကီု။ ညံၚ်ဟွံဂွံချပ်ကီု ပိုဲတအ်ဂှ် နူလ္ပာ်ဒှ်မာန် ၜိုတ်မာန်ကဵုမာန် ညံၚ်ဂွံကဵုဇြဟတ်ထံက်ပၚ် ဂကောံဇြဟတ်ပၠန်ဂတးက္ညၚ်တအ်ဂှ် လ္ပာ်ညးဍုၚ်ကွာန်တအ် တာလျိုၚ်နွံဒၟံၚ်ဏောၚ် အဲညာတ်ကေတ်ရ။