သဵု(လ်) ၊ မာတ်ချ် (၁)
သွက်ဂွံကလေၚ်စှ်ေကလောန် ၜိုန်ရစၟတ်လဝ်တ္ၚဲလက္ကရဴအိုတ်ကီုလေဝ် အ္စာဂဥုဲဗွဲမဂၠိုၚ်ဝွံ ဟွံကလေၚ်လုပ်ကလောန်အိုတ်ဏီပုဟ်ဂှ် ဝန်ဇၞော်ပရေၚ်ထတ်ယုက် ကိုဝ်ရဳယျာသၠုၚ်ကျာ ဟီုလဝ်တုဲ ယဝ်ရဟွံကလေၚ်စှ်ေကလောန်မ္ဂး ဒးဒုၚ်ကေတ်အရေဝ် အတိုၚ်သၞောဝ်ဥပဒေဏောၚ်ဂှ် ကဵုလဝ်သတိရ။
သွက်ဂွံသောၚ်ကလးကဵု အကာဲအရာ လၟိဟ်အ္စာဂဥုဲယအ်စှ်ေဒၟံၚ်ဂှ်ကဵု လၟိဟ်ညးအာယုက်ဇၞော်ဇၞော်တံ ဂၠိုၚ်တိုန်ကၠုၚ်ဂှ်တုဲ အလဵုအသဳဂှ် ကဵုအာအခေါၚ်ဂွံတိုန်ဘာဂဥုဲ ဂၠိုၚ်ၚ်ဏောၚ်ကီုလေဝ် အ္စာဂဥုဲကဆံၚ်ဍောတ်တ် ဗၞတ် ၁၀၀၀၀ ဝွံ ဒစဵုဒစးအစဳဇန်ဏံတုဲ ဗကပ်ဒၟံၚ်ဗဗေၚ်ရ။
အ္စာဂဥုဲဂမၠိုၚ် ဟွံစှ်ေကလောန်တုဲ မံၚ်ဒၟံၚ်ဂှ်ရ ပ္ဍဲကဵုရုၚ်ဂဥုဲတံဂှ် ဒှ်ဒၟံၚ်အခက်အခုဲတုဲ ဟိုတ်နူအစဳဇန်အလဵုအသဳတုဲ ဍာ်ဒကေဝ်ကဵုဒၟံၚ်ပရေၚ်ဒုၚ်ကာတံ ဇီုကပိုက်မာန်ဏောၚ်ဂှ် အ္စာဂဥုဲဂမၠိုၚ် သ္ဂးလဝ်တုဲ ပ္တိုန်လဝ်ဒုဟ်ဗျိလဝ် ပြဝအလဵုအသဳရ။
အတိုၚ်သၞောဝ်ကိုဝ်ရဳယျာသၠုၚ်ကျာဂှ်မ္ဂး အ္စာဂဥုဲဂမၠိုၚ် ဗကပ်ဗဗေၚ်ဟွံဂွံရောၚ် တာဒၞါလဝ်တုဲ နကဵုအ္စာဂဥုဲ ဗကပ်ဗဗေၚ်ဂမၠိုၚ် ဂိတုဖေဖဝ်ဝါရဳ ၂၉ စွံလက္ကရဴအိုတ်တုဲ ယဝ်ရဟွံကလေၚ်စှ်ေကလောန်မ္ဂး ကေတ်အာအရေဝ် အတိုၚ်သၞောဝ်ဏောၚ်တုဲ လာၚ်ဇြေန်စပ်ကဵုဂဥုဲတံဂှ်လေဝ် ကၟာတ်အာဏောၚ်ဂှ် အလဵုအသဳ ဘပဠလဝ်ရ။
အ္စာဂဥုဲ ဗ္တောန်ဒၟံၚ်ကမၠောန်တံဂှ် ကလေၚ်စှ်ေကလောန်အိုတ်ကီုလေဝ် ကၠောန်ဒၟံၚ်အခိၚ်ပေၚ်ၚ်ဟွံမွဲဏီပုဟ်ဂှ် ဝန်ဇၞော်ပရေၚ်ထတ်ယုက် ချိုဝ်ကျိုဝ်ဟောန် ဟီုရ။
ဟိုတ်နူအ္စာဂဥုဲဂမၠိုၚ် ဗကပ်ဗဗေၚ် နကဵုလၟိဟ်ဗွဲမဂၠိုၚ်ဂၠေၚ်တုဲ စဳဇန်လဝ် သွက်ဂွံလွဳနကဵုပါ်ကရေက်၊ လွဳနကဵုဓာတ်ဓာတုတံ ကေုာံ ကရေက်တုဲဂွံသၠးဂဝ်တံဂှ် ဒးပလီုလဝ်နွံတုဲ ဒးပဆုဲလဝ်လေဝ် နွံဂှ်ရ အလဵုအသဳဂှ် လလောၚ်တြးလဝ် အကာဲအရာကာတၟေၚ် စပ်ကဵုပရေၚ်ထတ်ယုက်ဂှ် ဂွံတီကေတ်ရ။
အစဳဇန်အလဵုအသဳဂှ် ကောန်ဍုၚ်ကိုဝ်ရဳယျာသၠုၚ်ကျာ ၇၅ တၟံကၠံတံ ထံက်လဝ်ဂလာန်ရောၚ် ပ္ဍဲကဵုလိက်ကံက်ကပှ်တၚ်နၚ်တံ ထ္မံက်ထ္ၜးလဝ်တုဲ သွက်ဂွံသၠုၚ်ပ္တိုန်အာ အခေါၚ်ဂွံတိုန်ဘာဂဥုဲ ၆၅ တၟံကၠံဂှ် ဆက်ရေၚ်တၠုၚ်အာဏောၚ် ဝန်ဇၞော်ပရေၚ်ထတ်ယုက် ဟီုရ။
ကုသမ္မတ ယောန်သက်ယိုဝ် မဆက်ဆောံလဝ် လ္တူအ္စာဂဥုဲဗကပ်ဗဗေၚ်တံ ဗွဲမကြံၚ်မ္ၚိုဟ်ဂှ်လေဝ် ညးဍုၚ်ကွာန်ထံက်ဂလာန် ဂၠိုၚ်တိုန်ကၠုၚ်ဂှ် ထ္မံက်ထ္ၜးလဝ် ပ္ဍဲလိက်ကံက်ကပှ်တၚ်နၚ်ဂှ်ရ။
အခိၚ်လၟုဟ် သွက်ဂွံဂၠိုက်ဂၠါဲစၟဳတ် ကုညးမဆက်စပ်ကဵု ပရေၚ်ဗကပ်ဗဗေၚ်တံဂှ် အာတ်မိက်လဝ် ဂကောံဒပ်ဗၠာဲသၟိၚ်တံရောၚ် ဝန်ဇၞော်ပရေၚ်ထတ်ယုက် ကဵုလဝ်သမ္တီရ။
Ref: AFP