မဝ်သကိုဝ်၊ မာတ် ၂
နကဵုက္ဍိုပ်ဍုၚ်ပလိုတ်တံ ယဝ်ရကၠောန်ကၠုၚ် ပေါဲပၞာန်ယူကရုၚ် ညံၚ်အသိၚ်ဂွံသၠုၚ်တိုန်မ္ဂး အန္တရာယ် ပေါဲပၞာန်နျူကလဳယျာဒှ်ကၠုၚ်မာန် နွံကၠုၚ်ဏောၚ်ဂှ် သမ္မတရုယှာ ဗလာဒဳမာ ပူတေန် ကဵုလဝ်သတိရ။
ပ္ဍဲကဵုဂလာန်သၞာံတၟိ ဟီုလဝ် ပ္ဍဲဍုၚ်မဝ်သကိုဝ်ဂှ် ပူတေန်ဂှ် နကဵုဍုၚ်ပလိုတ်တံ ဍုၚ်လဵုဟွံဟီု ယဝ်ရဗလးကောန်ပၞာန် ပ္ဍဲယူကရုၚ်ဂှ်မ္ဂး ဒးဆေၚ်အာမုက် ကုအဆက်လက္ကရဴ အကာဲအရာပရေံပရေံတံဏောၚ်ဂှ် ဘပဠလဝ်ရ။
နကဵုဍုၚ်ပလိုတ်တံ လွဟ်လက်နက်ဗ္တိုက် ပွန်ဍေံတံဂွံဂှ် နွံမံၚ်ပ္ဍဲဇကုတံဏောၚ်ဟီုဂှ် ဒးဗ္စာလဝ်ထေက်ရောၚ် ဂးလဝ်တုဲ စၟအ်အ်ပြဝဍေံတံဂှ် ဖန်ဗဒှ်ဒၟံၚ်အန္တရာယ် ညံၚ်ပဋိပက္ခ ရပ်စပ်လွဟ်လက်နက်နျူကလဳယျာတုဲ ဗ္တိုက်တံ ဂွံဒှ်ကၠုၚ်ဏောၚ်ဂှ် ပူတေန် ဟီုလဝ်ဏီရ။
ဂလာန်ပူတေန် ဟီုဂးဒၟံၚ် ရပ်စပ်လွဟ်လက်နက်နျူကလဳယျာသာ်ဏံ မွဲဏှမွဲဏှဂှ်လေဝ် က္ဍိုပ်သ္ကိုပ် ဂကောံဍုၚ်ပလိုတ်တံ ပ္တိုန်ဒုဟ်ပါ်ပါဲလဝ်အိုတ်ရ။
နူကဵုတၚ်တုပ်စိုတ် ထိၚ်ဒက်လွဟ်လက်နက် ကေုာံအမေရိကာန်ဂှ် တံၚ်ပ္တိတ်ရုယှာတုဲ ပူတေန်ဂှ် ဂကောံဒပ်နျူကလဳယျာညး ကြပ်သီုဖအိုတ် ညံၚ်ဂွံဂတာပ်ကဵုခေတ် ကၠောန်လဝ်တုဲယျဂှ် ကဵုလဝ်သမ္တီရ။
အခိၚ်ကၠတ်ထဝ်အမေရိကာန် ဒှ်ဒၟံၚ်အခက်အခုဲ သွက်ဂွံကဵုအခေါၚ်တုပ်စိုတ် အရီုဗၚ်သ္ဂောံပလံၚ်ယူကရုၚ်တံဂှ် ဒပ်ရုယှာတံ ဂွံမံၚ်ပေါဲအံၚ်ဇၞး ပ္ဍဲပေါဲဗ္တုက်ဗလးတိရောၚ် ဂွံတီကေတ်ရ။
အစောံစရာဲပရေၚ်ဗ္တိုက် ဂကောံဒပ်ဇကုတံ တောတက်ကၠုၚ် တၟာဂလိုၚ်ဂှ် ပူတေန် ဟီုဂးလဝ်တုဲ ဂလာန်သြဝါဒညးဂှ် ဗလးပ္တိတ်လဝ် ပ္ဍဲကဵုလာၚ်ရုပ်ရမျာၚ်ကၟိန်ဍုၚ်၊ ရုၚ်ရုပ်ဒမျိုၚ် ကေုာံ ပ္ဍဲကဵုဒ္ၚေါဝ်ဒေတ်ဂျေတ်ဒဴ အလုံဍုၚ်တံဂှ် ဂွံတီကေတ်ရ။
Ref: AFP