ဂါဇြာ၊ ဖေဖဝ်ဝါရဳ ၂၉
ပၞောဝ်ကဵုလၟိဟ်မၞိဟ် ၅၇၆၀၀၀ မၞုံပ္ဍဲဒေသဂါဇြာတံဂှ် ပန်ဂအုံမွဲဂအုံဂှ်ဝွံ ကြပ်ဒးဒုၚ်ဒၟံၚ်ဘဲကၞောဝ်ကၠောဝ်ဗျဵုယျဂှ် သၞာဲဒဴပရေၚ်ကဵုအရီုဗၚ်ကုလသမဂ္ဂမွဲတၠ ကဵုလဝ်သမ္တီ ကံၚ်ဇြဳဂီုကၠီုရ။
ယဝ်ရကေတ်အရေဝ်ရေၚ်တၠုၚ်ကဵုဟွံမွဲမ္ဂး ဘဲဒဏ်ကၞောဝ်ကၠောဝ်ဗျဵုဂှ်ဝွံ ဒှ်ကၠုၚ်ဗွဲစၟတ်မာန်ဏောၚ်ဂှ် ညးသ္ဂးလဝ်ရ။
ပ္ဍဲကဵုဂါဇြာ ပေါဲဗ္တိုက်က္တဵုဒှ် ဆက်ဒၟံၚ်ဂှ် ဟိုတ်နူအကာဲအရာ သာပရေံကၠုၚ်ဂှ်ရ ဒဒှ်ရထပ်ဗ္တိုက်ဖ္အောဝ် ပရေၚ်ဒေါအ်ပန်ပှော်ဂှ် သ္ကိုပ်စၞောန်ပ္ညုၚ် ရုၚ်ကုလသမဂ္ဂ စပ်ကဵုပရေၚ်ဗ္စာရဏာမၞိဟ် ရာမာတ်ချ် ရာဂျာသေန်ဟာန် ကဵုလဝ်သမ္တီရ။
သၟဝ်ကျာဂါဇြာ ပ္ဍဲကဵုကောန်ၚာ်အာယုက် သၟဝ် ၂ သၞာံ ၆ တၠဂှ် မွဲတၠ အာဟာရပိုတ်အိုတ်ဒၟံၚ်တုဲ လၟိဟ်မၞိဟ် ၂ ဒဿမ ၃ ပြကောဋိကိုဋ် မၞုံဒၟံၚ်ပ္ဍဲတ္ကအ် ပါလက်သတိုၚ်ဂှ်ဝွံ ဂွံဂျိုၚ်လမျီုဒတူလိုၚ်အာ ဇွောံမစၞစဟွံရုမ်ဂပ် က္တဵုဒှ်ဒၟံၚ်ရောၚ် ညးဟီုလဝ်ကဵု ကံၚ်ဇြဳဂီုကၠီုရ။
သ္အာၚ်နူဂှ်ပၠန် နကဵုဂကောံကဵုအရီုဗၚ်ဂမၠိုၚ် ဒးဆေၚ်ဒၟံၚ်မုက်ကဵု ပွတာဒၞါအခက်အခုဲ မသၠဲလးတံဂှ်တုဲ ဂွံကဵုအရီုဗၚ် ပ္ဍဲဒေသဂါဇြာမာန်ဂှ်ဝွံ ဒှ်ဒၟံၚ်အကာဲအရာ အောန်အိုတ်ဏောၚ်ဂှ် ဂွံတီကေတ်ရ။
ပ္ဍဲဂါဇြာ ညံၚ်အကာဲအရာပရေၚ်ဗ္စာရဏာမၞိဟ်တံ ဂွံတောတက်ကၠုၚ် ကၠောန်အာဏောၚ်ဂှ် အေဿရေ ကဵုလဝ်ကတိရ။
အရီုဗၚ်အမာတ်ကလုတ်ကုလသမဂ္ဂ အေဿရေ ဂျောန်နတာန် မာတ်လာဂှ် ဗ္ၜတ်ကဵုအရီုဗၚ်မာန်ဂှ်ဝွံ တန်တဴဒၟံၚ်ကဵု အစောံဇြဟတ် ကုလသမဂ္ဂ ကေုာံ ဂကောံကဵုအရီုဗၚ်တၞဟ်သ္အာၚ်တံဏောၚ်ဂှ် ဟီုရ။
အခိၚ်လၟုဟ်ဂှ် သွက်ဂွံကဵုအခေါၚ် ဂကောံကဵုအရီုဗၚ်ဂမၠိုၚ် ဂွံလုပ်စိုပ်ဒေသဂါဇြာဂှ် အမေရိကာန် ဖ္တိုက်ဖ္အောဝ်လဝ် အေဿရေ ရ။
သမ္မတဂျဵုဗိုၚ်ဒေန်ဂှ် စိုပ်ဂိတုဥပုသ် မဿလေမ်တံမ္ဂး သွက်ဂွံဒေါအ်ပန်ပှော် ပ္ဍဲဂါဇြာဂှ် အေဿရေ တုပ်လဝ်စိုတ်ရောၚ် ဂးကီုလေဝ် ဟိုတ်နူဂလာန်ဏံတုဲ သ္ကိုပ်ဝန်ဇၞော်အေဿရေ နေတာန်ယျာဟု ဒးအံသဝ်လဝ်ရောၚ် ကလေၚ်ခၠေဝ်ပလန်လဝ်ရ။
ညးဒေသဂါဇြာတံဝွံ အခိၚ်ဒးဆေၚ်ဒၟံၚ်မုက် ကုအကာဲအရာ စၞစ ကေုာံ ဍာ် ဟွံရုမ်ဂပ်ဒၟံၚ်ဂှ် အကာဲအရာ ရေၚ်ယာန်ကဵုအရီုဗၚ်တံ ဒးဒုၚ်ပၠံၚ်ၜးဂှ်လေဝ် နွံဒၟံၚ်ရောၚ် ဂွံတီကေတ်ရ။
Ref: Reuters