ရေဝ်၊ ဂျောန် ၂၇
ပ္ဍဲဂိတုဂျောန် ၂၆ တေံ က္ဍိုပ်သ္ကိုပ်ဂကောံလကိုဟ်ဍုၚ်ရေဝ် လလောၚ်ပ္တိတ်လဝ် ဒဒှ်ရ ဒုအကြာပ်ဒပ်ဗၠာဲသၟိၚ် နူဗ္ဒိုပ်ဗၠာဲသၟိၚ်ၝောံဍုၚ်ရေဝ် ဖျေံသ္ဇိုၚ်ဍုၚ်ရေဝ် တွဵုရးဍုၚ်မန် လုပ်စိုပ်ဖျေံကၠုၚ်လွဟ် သီုကဵုလွဟ်လက်နက်မကမ်ဂမၠိုၚ် မဒှ်ရ။
ဒုအကြာပ်ဒပ်ဗၠာဲသၟိၚ် ယျေဝ်ထက်ပိုၚ်ဝွံ သေနာတ် AK 47 မွဲဇကိုအ်၊ မကမ် ၆၀ ဒကောၚ်၊ ဖျေဲလွဟ်ၜါ ကေတ်နၚ်တုဲ လုပ်ဖျေံလဝ်လွဟ် ဇရေၚ်ဂကောံလကိုဟ်ဍုၚ်ရေဝ်ရ။
ဒုအကြာပ်ဒပ်ဗၠာဲသၟိၚ် ယျေဝ်ထက်ပိုၚ် လုပ်ဖျေံလွဟ် သီုလွဟ်လက်နက်တံဂှ် လ္ပာ်လကိုဟ်ဍုၚ်ရေဝ် ဖျေံလဝ်လာပ် သြန် ၃၀ ကိုဋ်ဂှ် ဂွံတီကေတ်ရ။
ဒုအကြာပ်ဒပ်ဗၠာဲသၟိၚ် ယျေဝ်ထက်ပိုၚ် ဖျေံကၠုၚ်လွဟ်ဂှ်ဝွံ အပ္ဍဲကာလသီအဝဵုဏံ ကောန်ဒပ်ဗၠာဲသၟိၚ် နူဗ္ဒိုပ်ဗၠာဲသၟိၚ်ၝောံဍုၚ်ရေဝ် မွဲတၠ ဖျေံလွဟ်ကၠာအိုတ်ရဂှ် က္ဍိုပ်သ္ကိုပ်ဂကောံလကိုဟ်ဍုၚ်ရေဝ် ဟီုလဝ်ရ။
ပ္ဍဲတွဵုရးဍုၚ်မန် အပ္ဍဲကာလသီအဝဵုဏံ ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ်တံဝွံ ဒးဒုၚ်ကဵုဇြဟတ်ဂရိုဟ် အနိၚ်အပိုၚ်ကီု၊ ဒးကေတ်တာလျိုၚ် အခိၚ်ပေၚ်ၚ်ကီု ကေုာံ ဟိုတ်နူဟွံဂီုကၠီုတံဂှ်တုဲ မွဲဏှမွဲဏှ လုပ်စိုပ်ဖျေံကၠုၚ်လွဟ် ဇရေၚ်ဒပ်ပၠန်ဂတးတံ နွံဒၟံၚ်ရ။
တုဲကၠုၚ် ပ္ဍဲဂိတုဂျောန် ၇ တေံဂှ်လေဝ် အထံက်ဒပ် ဗိုလ်ဇၞော်ကျဝ်မျေတ်လွေန် နူတမ်ဒပ်ခလရ စၟတ် ၁၀၆ ဖျေံသ္ဇိုၚ်ကွာန်တၟအ်ကၞေၚ် ပွိုၚ်ဍုၚ်ရေဝ်ဂှ်ဝွံ လုပ်ဖျေံလဝ်လွဟ် ဇရေၚ်ဒပ်ပံၚ်ကောံ KNLA သီုလွဟ်လက်နက်ဂမၠိုၚ်ရ။
အတိုၚ်တၚ်နၚ် နူလိက်လၟေၚ်လ္ဂန်အိန် ကံက်ကပှ်လဝ်ဂှ်မ္ဂး နူသၞာံ ၂၀၂၁ စဵုကဵုသၞာံ ၂၀၂၄ ဂိတုဂျာန္နဝါရဳ ပ္ဍဲတွဵုရးဍုၚ်မန် ကောန်ဒပ်ကံၚ်ဇြဳပၞာန် ဖျေံကၠုၚ်လွဟ် ဇရေၚ်ဒပ်ပၠန်ဂတးတံဂှ် ၂၃၇ တၠ နွံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−FB က္ဍိုပ်သ္ကိုပ်ဂကောံလကိုဟ်ဍုၚ်ရေဝ်