အခိၚ်ပေါဲဗ္တိုက်သ္ကာတ်မြဟ်ဒၟံၚ်ဂှ် စကဵုတာလျိုၚ် ကုကောန်ဒပ်တၟိတၟိ နူတန်ဗ္တောန်ကွတ်ပၞာန် လၟေၚ် (၁)

နေဗျဳဒဝ်၊ ဂျောန် ၂၇

ကောန်တန်ဗ္တောန် နူကဵုတန်ဗ္တောန်ကွတ်ပၞာန်လၟေၚ် (၁) ကံၚ်ဇြဳပၞာန် ပံက်လဝ်ဂှ် ဂိတုဂျောန်အိုတ်ဏံ စကဵုတာလျိုၚ်ဏောၚ်ဂှ်ရ ပ္ဍဲကဵုမုက်ပၞာန်နာနာ ဒးဆေၚ်ဒၟံၚ်မုက်လၟုဟ်တံဂှ် တြးတုဲပလံၚ်ဗစိုပ်ကဵုမာန်ရောၚ်ဂှ် ညးခါတ်အကာဲပရေၚ်ဍုၚ်ကွာန်တံကဵု ညးလျိုၚ်ပရေၚ်ပၠန်ဂတးတံ သ္ၚဳဂၠိပ်လဝ်အိုတ်ရ။

အလုံဍုၚ်မွဲ ဟိုတ်နူပၞာန်ပၠန်ဂတးတုဲ ကံၚ်ဇြဳပၞာန် ဒးဆေၚ်ဒၟံၚ်မုက်ကဵု ဇြဟတ်ဒပ်လေၚ်ဒိုက်ဂှ် သၞာံဏံ ပ္ဍဲဂိတုဖေဖဝ်ဝါရဳတေံ ဂယိုၚ်ပ္တိုန်လဝ်သၞောဝ်ယိုက်ဂၠေၚ်လျိုၚ်ပၞာန်ဂှ်တုဲ ညးဒးဒုၚ်ပ္ကောံ နဒဒှ်ကောန်ဒပ်တံ လၟိဟ် ၅၀၀၀ ဂှ် ပ္ဍဲဂိတုဨပရဴ သတ္တာဟပထမတေံ စကော်လဝ် တန်ဗ္တောန်ကွတ်ပၞာန် လၟေၚ် (၁) ရ။

ညးမပါလုပ်လဝ် ပ္ဍဲတန်ဗ္တောန်ကွတ်ပၞာန် လၟေၚ်ကၠာအိုတ် လၟေၚ် (၁) တံဂမၠိုၚ်ဝွံ ဂိတုဂျောန်အိုတ်ဏံ ဘာကွတ်ပၞာန်တုဲဒှ်ဏောၚ်ဂှ်တုဲ သွက်ဂွံယိုက်တာလျိုၚ် နဒဒှ်ကောန်ဒပ်တၟိမာန်ဂှ် ဗလးဏာ ဇရေၚ်ဌာနစပ်ကဵုလ္ပာ်ပၞာန် အလုံဍုၚ်မွဲတံဂှ်ဏောၚ်ဂှ် တမ်ရိုဟ်ပရိုၚ်ဒပ်ပၞာန် ဟီုလဝ်ကဵု ဌာန်ပရိုၚ် AP ရ။

ဆ္ဂး ကဵုအာတာလျိုၚ် ကုကောန်ဒပ်တၟိတၟိတံ သာ်လဵုရောဟီုဂှ် ဟီုပ္တိတ်လဝ် ဗွဲလစှ်ေဟွံမွဲကီုလေဝ် တမ်ရိုဟ်ပရိုၚ်ဒပ်ပၞာန်မွဲတၠပၠန်ဂှ်တှ်ေ ကောန်ဒပ် ပရေၚ်ပ္ကတ်ပ္ကေၚ်တုဲဒှ်တုဲ မစိုပ်ကၠုၚ်တံဂှ် ဗ္ဒိုပ်ဒပ်တံရဏောၚ် သ္ဂုတ်သွာတ်ဏောၚ်ဂှ် သ္ဂးရ။

နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် နကဵုကံၚ်ဇြဳပၞာန် ဇြဟတ်ဍိုန်လျဒၟံၚ်ဂှ် သွက်ဂွံဗပေၚ်ဇြဟတ်တုဲ ကောန်ဒပ်တၟိတၟိ ဘာစှ်ေလဝ်တံဂှ် စွံအာလက္ကရဴဏံဟွံသေၚ်တုဲ  ကဵုလုပ်အာပေါဲဗ္တိုက်ဏောၚ် ချိုတ်ပၠိုတ်ဂှ် သ္ၚဳဂၠိပ်လဝ်ရ။

“ဇြဟတ်ညးတံ မဍိုန်လျကၠုၚ်ဒၟံၚ်ဂှ် သွက်ဂွံကလေၚ်ဗပေၚ် မဒှ်တုဲ စွံလက္ကရဴဏံဏောၚ်ဂှ် အဲဟွံစှ်ေစိုတ်ပုဟ်။ နှဴကဵုကောန်ပၞာန် ယိုက်ဂၠေၚ်ဒၟံၚ်လျိုၚ်ပၞာန်လၟုဟ်တံဂှ်တုဲ ကဵုလုပ်အာပေါဲဗ္တိုက်ဏောၚ်ဂှ် ချိုတ်ပၠိုတ်ရ။ တၚ်ဆဵုဂဗဟွံမွဲမွဲသာ် အာပ္ဍဲပေါဲဗ္တိုက်ဇၞော်တှ်ေ ဂွံချိုတ်ရဂၠိုၚ်ဂှ် အဲညာတ်ရ” သာ်ဝွံ သ္ဂးရ။

နကဵုကံၚ်ဇြဳပၞာန် ဒေသရခေၚ် မကျဗြံဒၟံၚ် ဂၠိုၚ်ကဵုဂိတုအဆက်က်ဂှ် မပါလုပ် ပ္ဍဲကဵုပွိုၚ်ဍုၚ်လ္ၚဵု နူကဵုကချေၚ်၊ ချေၚ်၊ သက်ကိုၚ်၊ မဂွဵု၊ မာန္တလေဝ် ကေုာံ ရးတၞၚ်သဳတံဂှ် က္တဵုဒှ်ဒၟံၚ်ပေါဲဗ္တိုက် ကုဂကောံဇြဟတ်ပၠန်ဂတးညးဍုၚ်ကွာန်ရပ်လွဟ်တံရ။

ပ္ဍဲအကာဲအရာသာ်ဏံဂှ် ပ္ဍဲကဵုရးသေံသ္ကုတ်သၟဝ်ကျာ ဒေါအ်လဝ်ပန်ပှော် ပွိုၚ်မသုန်ဂိတုပြၚ်ဂှ် စနူဂိတုဂျောန် ၂၅ တုဲ ပရေၚ်ပၞာန် ၁၀၂၇ လပှ်ဒုတိယ ကလေၚ်ကၠုၚ်ပၠန်ဂှ်ရ ပ္ဍဲကဵုကျံက်မေဝ်၊ တဳပဝ် ကေုာံ လ္ပာ်နံၚ်ချဵုတံဂှ် ဒးဆေၚ်ဒၟံၚ်မုက်ကဵု ပေါဲဗ္တိုက်သ္ကာတ်မြဟ် ကုဒပ်ပံၚ်ကောံ ဒပ်ပၞာန်တအာၚ် TNLA ရ။

ဟိုတ်ဂှ်ရ သွက်ဂွံယှအ်ဖျေံ အသိၚ်ပၞာန် ဒပ်ပံၚ်ကေံာ ဒပ်ပၞာန်တအာၚ် TNLA တံဂှ် ထပ်ပလံၚ်ဗစိုပ်လဝ် ဇြဟတ်ဒပ် လ္ပာ်ရးသေံသ္ကုတ်သၟဝ်ကျာ လၟိဟ်ဗွဲမဂၠိုၚ်ဂၠေၚ်ဂှ်ရ ကောန်ဒပ်တၟိတၟိ စှ်ေနူတန်ဗ္တောန်ကွတ် လၟေၚ် (၁) တံ ဟွံသက်သာအှ်ေပုဟ်ဂှ် ညးခါတ်အကာဲပရေၚ်ပၞာန်တံ သ္ၚဳဂၠိပ်လဝ်အိုတ်ရ။

ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် ပ္ဍဲကဵုပေါဲဗ္တိုက်တံဂှ် အခိၚ်ကောန်ပၞာန် ပ္ကတ်ပ္ကေၚ်လဝ်ကဵုသၞာံတံ ညံၚ်ဂွံအံၚ်ဇၞး ကၠောန်ဟွံမာန်ဂှ် စကာကောန်ဒပ်တၟိတၟိ ကဵုလဝ်တန်ဗ္တောန်ကွတ် ၜိုတ် ၂ ဂိတုတံဂှ်လေဝ် လ္ပာ်ဒပ်ပၞာန် ဂွံဆောံလေၚ်ဂၠိုၚ်ရနွံဂှ် ထံက်ထ္ၜးလဝ်ရ။

“ကရောၚ်ပၞာန် ကောန်ပၞာန်ပ္ကတ်ပ္ကေၚ်လဝ်တံ ပါဂှ်ရဂှ် ဂွံအံၚ်ဇၞး အခိၚ်သ္ပဟွံမာန်ဂှ် ထ္ပက်စုတ်စၞး ကောန်ပၞာန်တၟိတၟိဏံတုဲ စကာအာဏောၚ်။ ဆ္ဂး ညအ်ဂှ် လ္ပာ်ဒပ်ပၞာန် အရာမဆောံလေၚ်တံ ဂွံဂၠိုၚ်တိုန်ကၠုၚ်ဂှ်ရနွံ။ မူဟိုတ်ရောဟီုတှ်ေ တိုန်တန်ဗ္တောန်ၜိုတ် ၂ ဂိတုတုဲ ဆၜိုတ်တီကေတ် ဗီုဂွံပန်သေနာတ်ညိဂှ် ဂွံယိုက်လျိုၚ်ပၞာန်ဂှ် ဒှ်ဟွံမာန်ပုဟ်။ ဟိုတ်ဂှ်ရ ကောန်ဒပ်တၟိတၟိ ၅၀၀၀ တိတ်ကၠုၚ်လေဝ် စိုတ်ဓာတ် ဒပ်ပၞာန် မစှ်ေဒၟံၚ် မကျဗြံဒၟံၚ်ဂှ် ဗီုဂွံသၠုၚ်ပ္တိုန်မာန် ဟွံမွဲပုဟ်ဂှ် အဲစှ်ေစိုတ်ရ” သာ်ဝွံ သ္ဂးရ။

မွဲလ္ပာ်ဂှ်ပၠန်လေဝ် နူဂိတုဨပရဴမံက်တေံ သွက်ဂွံကဵုပၞာန်အရီု ကုဍုၚ်ဗြဝတဳဂှ် ကရောၚ်ပၞာန်အံၚ်ဇေယျ ကဆံၚ်ကၟိန်ဍုၚ် ဇြဟတ်ပွဳပွူ ၜိုတ် ၅၀၀ ပါဂှ်လေဝ် ဒဵုကဵုအခိၚ်လၟုဟ် ၜိုတ်ကဝက်ဂၠံၚ်ရဂှ် ဒးဒုၚ်ဗ္တိုက်တာဒၞါဒၟံၚ်ကဵု ဂကောံဒပ်ပံၚ်ကောံပၠန်ဂတးကရေၚ်တံ အဆက်က်ရ။

အခိၚ်လၟုဟ် ဒပ်ကံၚ်ဇြဳပၞာန်ဝွံ အသေအဟာန်ပံက်တန်ဗ္တောန် သွက်တန်ဗ္တောန်ကွတ်ပၞာန် လၟေၚ် (၃) ပွိုၚ် ၁၂ သတ္တာဟဂှ် ပ္ဍဲဂိတုဂျောန် ၂၅ တေံ ကၠောန်ဗဒဒှ်လဝ် ပ္ဍဲဘာပ္ကတ်ပ္ကေၚ် ပ္ဍဲတိဍာ်ဌာန်ဂအုပ်ရးပၞာန်မဆေၚ်စပ်တံဂှ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ရ။

ပ္ဍဲကဵုဏံ ပ္ဍဲတွဵုရးဍုၚ်မန် ညးဒးဒုၚ်ပ္ကောံပ နဒဒှ်ကောန်ဒပ် သွက်တန်ဗ္တောန်ကွတ်ပၞာန် လၟေၚ် (၃) ဂှ် ၁၆၅ တၠ နွံလဝ်တုဲ ထပ်ပံၚ်ထောံ ကဵုၜါလၟေၚ်တုဲကၠုၚ်တေံဂှ်မ္ဂး ညးဒးဒုၚ်ပ္ကောံသ္ပကောန်ပၞာန် နွံကၠုၚ်ဒၟံၚ် စဵုကဵု ၈၀၀ ရ။

ညးခါတ်အကာဲပရေၚ်ပၞာန်တံဂှ် ကံၚ်ဇြဳပၞာန် ဇြဟတ်ဒပ်ဍိုန်လျစှ်ေကၠုၚ်ဒၟံၚ်ဂှ်ဝွံ သွက်ဂွံဒေါအ်ဒေၚ် ပၞာန်ထ္ပက် ဂကောံဇြဟတ်ပၠန်ဂတးတံမာန် သွက်ဂွံဗပေၚ်ဇြဟတ်ပၞာန် နွံပၟိက်ဒၟံၚ်တံမာန်ဂှ် ကဵုတန်ဗ္တောန် ကုကောန်ဒပ်တၟိတၟိတံ ဗွဲမပြဟ်တုဲ စဳဇန်ဒၟံၚ် သွက်ဂွံပလံၚ်မုက်ပၞာန်ဏောၚ်ဂှ် သ္ၚဳဂၠိပ်လဝ်အိုတ်ရ။

အတိုၚ်လိက်ဒုၚ်စဳရေၚ် ဂကောံမၚ်လ္ၚတ်ကေၚ်ကာဍုၚ်ဗၟာ ကေုာံ ပဋိပက္ခ BACS ဂှ်မ္ဂး သွက်တန်ဗ္တောန်ကွတ်ပၞာန် လၟေၚ် (၁) ကဵု လၟေၚ် (၂) ဂှ် ပံက်လဝ်ဘာပၞာန် ၂၁ ဘာတုဲ ပ္ဍဲကဵုၜါလၟေၚ်ဂှ် ညးသၟတ်ပွဳပွူ ၉၀၀၀ ဒးဒုၚ်ပကောံပလဝ်ကောန်ပၞာန်ရ။

ပရိုၚ်−သြၚ်လောန်တိုၚ်(မ်)

ဗီု−SAC Telegram