သဵု(လ်) ၊ ဖေဖဝ်ဝါရဳ ၂၈
အပ္ဍဲလၟေၚ်တရဴ မအာစိုပ်လဝ် ဘာပ္ကတ်ဗ္တောန်ကွတ်ပၞာန်မွဲဂှ် က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အာန် ဒဒှ်ရဖ္တိုက်ဖ္အောဝ်ဟီုကၠုၚ်လဝ် သွက်ဂွံဒက်ပ္တန်ဒပ်ပၞာန်ဂတာပ်ခေတ် မၞုံကဵုဇြဟတ်မဂၠိုၚ်တုဲ ယဝ်ပေါဲပၞာန်ဒှ်ကၠုၚ်မ္ဂး ညံၚ်ဂွံဗ္တိုက်ဇၞးမာန်ဂှ် ပ္ဍဲဂိတုဖေဖဝ်ဝါရဳ ၂၆ တေံ ဌာန်ပရိုၚ် KCNA ကၟိန်ဍုၚ်ပိုၚ်ဂှ် ထ္မံက်ထ္ၜးလဝ်ရ။
သွက်ဂွံဘိုၚ်ပါလုပ်ဗ္တိုက်ကဵု လ္ပာ်ရုယှာ မဗ္တိုက်ဒၟံၚ်ယူကရုၚ်ဂှ် ကြဴနူကိုဝ်ရဳယျာသၟဝ်ကျာ ဗလးလဝ်ကောန်ဒပ်ပၞာန် ဂၠိုၚ်ကဵုလ္ၚီတုဲဂှ် လၟေၚ်တရဴကေန်ဂျုၚ်အာန် အာစိုပ်ဘာပ္ကတ်ဗ္တောန်ကွတ်ပၞာန် ကာန်ကောန်ဏံ ဒှ်ကၠုၚ်လဝ်ရ။
အပ္ဍဲသတ္တာဟဏံ ကေန်ဂျုၚ်အာန် အာစိုပ်လဝ် သီုကဵုတက္ကသိုလ်ပရေၚ်ဍုၚ်ကွာန် ကေန်အဳသံၚ် မဒှ်အေန်သတဳကျုတ်ပရေၚ်ဍုၚ်ကွာန် မလွဳၜံၚ်ပ္တိတ်ကဵုဒၟံၚ်အလံၚ်ဗိုလ်ပၞာန်တံဂှ်တုဲ သွက်ဂွံမၚ်မွဲသစ္စာ လ္တူဒပ်ပၞာန်၊ သွက်ဂွံသၠးပွးဒုၚ်ဂိတံဂှ် ဖ္တိုက်ဖ္အောဝ်ဟီုလဝ်ရ။
ကေန်ဂျုၚ်အာန် အာစိုပ်လဝ်ဇရေၚ်ဒပ်စပ်ကဵုလ္ပာ်ပၞာန်ကၠာတေံဂှ် သွက်ဂွံထပ်ဗလးဏာ ကောန်ဒပ်ဂမၠိုၚ်ဍုၚ်ရုယှာဂှ် ဒှ်ပရေၚ်ဒစးဒုၚ် ပလေဝ်ပလေတ်မွဲ ဒှ်မာန်ရောၚ် ထံၚ်ပရိုၚ်ကိုဝ်ရဳယျာသၠုၚ်ကျာတံ ဟီုလဝ်ရ။
အပ္ဍဲလၟေၚ်တရဴ မအာစိုပ်လဝ်ဘာပ္ကတ်ဗ္တောန်ကွတ်ပၞာန်ဏံ အလန်လက္ကရဴအိုတ်ဂှ် ဟိုတ်နူပရေၚ်ကောပ်ကာဲ ဘာတန်ဗ္တောန်တံဏံဟွံခိုဟ်၊ ဟိုတ်နူဌာနစပ်ကဵုကွတ်ပညာတံ ပရေၚ်ဂေတ်ဂြိပ် ဟွံခိုဟ်တံဂှ်တုဲ ဂွံဒက်ပ္တန်ဒပ်ပၞာန်ဂတာပ်ခေတ်ဂှ် ဒဒှ်ရတၚ်နွံပၟိက် နွံဒၟံၚ်တၟာဂလိုၚ်ဂှ် ဟီုဒေါန်လဝ်ရောၚ် သ္ဂးရ။
နကဵုကွးဘာဂမၠိုၚ်လေဝ် ဒးသၠုၚ်ပ္တိုန်အသိၚ် မကတ်လ္ၚတ်အာ ပရေၚ်ဆဵုဂဗပရေၚ်ပၞာန်ဂတာပ်ခေတ်တံဏောၚ်ဂှ်လေဝ် ကေန်ဂျုၚ်အာန် ဟီုရ။
အကာဲအရာဍုၚ်သ္အာၚ် ပရေၚ်ဂၠါဲသၞတံ ဂၠိုၚ်ကၠုၚ်ဒၟံၚ်ဂှ်ကီု၊ ပေါဲပၞာန် ကေုာံ ရာဇဝၚ် ပရေၚ်ဆီဇွောဝ်တံဂှ် စၟအ်ဒၞါဲ ဒှ်ကၠုၚ်မာန်ဏောၚ်ဟီုဂှ် ထ္မံက်ထ္ၜးဒၟံၚ်ဂှ်ရ နကဵုဒပ်ပၞာန်ညးတံ ညံၚ်ဂွံဗ္တိုက်ပေါဲပၞာန် ဂွံဇၞးကေတ်ဂှ် ပၟိက်ဇၞော်တဴရောၚ် ကေန်ဂျုၚ်အာန် ဟီုရ။
လွဟ်လက်နက် ကေုာံ နဲကွတ်ပညာတံဂှ် ဒးသၠုၚ်ပ္တိုန်ကဆံၚ် မဂတာပ်ခေတ်တံဂှ်ဏောၚ်တုဲ နကဵုကောန်ဒပ်ကိုဝ်ရဳယျာသၟဝ်ကျာ လုပ်ဒၟံၚ်ပေါဲဗ္တိုက် ကရောံဒပ်ရုယှာတံ ကလိဂွံအာတၚ်ဆဵုဂဗ ပေါဲပၞာန်ဂတာပ်ခေတ်မွဲဏောၚ်ဂှ် ညးဟီုရ။
ပ္ဍဲပယျဵုၜါဍုၚ်ဂှ်တှ်ေ ကောန်ပၞာန်ကိုဝ်ရဳယျာသၟဝ်ကျာ မဗ္တိုက်ဒၟံၚ်သ္ဂောံစဵုဒၞါ ဒေသကာဒ်ဍုၚ်ရုယှာဂှ် ပရေၚ်ဇီုကပိုက်ချိုတ်တံ ဂၠိုၚ်ဒၟံၚ်ရောၚ် ယူကရုၚ် ဟီုလဝ်ရ။
Ref: Reuters