မဝ်သကိုဝ်၊ မာတ် ၁
ပရေၚ်ဆက်ဆောံ အကြာရုယှာကဵု အမေရိကာန် မဒှ်ကၠုၚ်မာန်တံဂှ် ညံၚ်ဟွံဂွံပလီုပလာ်ဂှ် သမ္မတ ဗလာဒဳမာပူတေန် ကဵုလဝ်သတိ ကုဍုၚ်ရးပလိုတ်ဂမၠိုၚ် ပ္ဍဲဂိတုဖေဖဝ်ဝါရဳ ၂၇ တေံတုဲ သွက်ပြဝပ္တိတ်ကၠုၚ်ဇြဟတ်သာ်ဏံတံဂှ် မဝ်သကိုဝ် စကာဌာနထံၚ်ပရိုၚ် ကလုတ်တမာန်တံတုဲ တာဒၞါအာဏောၚ်ဂှ် ဟီုလဝ်ရ။
ပွမပ္တိတ်ကၠုၚ်ဇြဟတ် ညံၚ်ပရေၚ်ဆက်ဆောံ အကြာမဝ်သကိုဝ်ကဵု ဝါယှေန်တာန် ဇြဟတ်ဂွံကလေၚ်ခိုဟ်ကၠုၚ်ဂှ်ဝွံ ဒှ်ဆၜိုတ်ဂွံစညိကီုလေဝ် ပရေၚ်တောတက်နွံဂှ် သမ္မတပူတေန် သောၚ်ကလးဟီုလဝ်ကဵု ဌာနဂီုကၠီုရုယှာ FSB မထ္ပက်လဝ်အဇာ ဒၞါဲအေဂျေန်ဇြဳ KGB ခေတ်သဵုဗဳယေတ် မွဲအခိၚ်တေံ သမ္မတပူတေန်မကေၚ်အာလဝ်က္ဍိုပ်ဂှ်ရ။
ဟိုတ်နူပရေၚ်ဆက်စၠောံ ကုအလဵုအသဳတၟိ အမေရိကာန် အလန်ကၠာအိုတ်ဂှ်တုဲ တၚ်စၟဳညိညနွံတုဲ ဂွံသောၚ်ကလးပြဒ္ဒညာ မက္တဵုဒှ်ဒၟံၚ် ပ္ဍဲဂၠးတိဏံဂှ် ညံၚ်ပရေၚ်ဆက်ဆောံအလဵုအသဳၜါဍုၚ် ဂွံကလေၚ်ခိုဟ်ကၠုၚ်ဂှ် သီုၜါလ္ပာ်ဆန္ဒနွံဒၟံၚ်ညးသ္ကအ်ရဂှ် ပူတေန် ဟီုလဝ်ရ။
ဆ္ဂး အကြာဍုၚ်နျူကလဳယျာဇြဟတ်ဇၞော် ၜါဍုၚ် ကၠောန်ဒၟံၚ်ညံၚ်ပရေၚ်ဆက်ဆောံ ဂွံဂီုကတဴဏံဂှ် ကၟိန်ဍုၚ်နာနာတံ ဟွံဒးဂၞပ်ပုဟ်ဟီုဂှ် သောၚ်ကၠးဒၟံၚ်ရောၚ် ပူတေန် ဟီုလဝ်ရ။
ကၟိန်ဍုၚ်ရးပလိုတ်လ္ၚဵုတံ ပရေၚ်ဆက်ဆောံ အမေရိကာန်−ရုယှာ ကလေၚ်စကၠုၚ်ဂှ် ဟွံမွဲပၟိက်တုဲ ညံၚ်ပေါဲသဳကၠဳ မစကၠောန်ဒၟံၚ်တံ ဂွံဒှ်ပလာပ်ပထုဲဂှ်လေဝ် ဂကောံဇြဟတ်တံဏံ ပ္တိတ်ဒၟံၚ်ဇြဟတ်အိုတ်ရောၚ် ပူတေန် ဟီုရ။
နကဵုညး ၜိုန်ရဟွံဟီုပ္တိတ်ယၟု ဍုၚ်လဵုမွဲ မကၠောန်ဒၟံၚ်ပြဝပလီုပလာ်တံဂှ်ရောကီုလေဝ် ရံၚ်ကေတ်ဗီု မိက်ဂွံသ္ဂး ကုသမဂ္ဂယူရောပ် ကဵု ဗျိတိၚ် ဒှ်မာန်ရ။
ယဝ်ရ အကြာရုယှာကဵု ယူကရုၚ် ကလိဂွံတၚ်တုပ်စိုတ်မ္ဂး ဒးကဵုတၚ်ဒုၚ်လျိုၚ်ပရေၚ်ဂီုကၠီုဏောၚ်ဂှ် ယူရောပ် ဟီုလဝ်ကဵု အမေရိကာန်ရ။
ဆ္ဂး သမ္မတအမေရိကာန် ဒဝ်နေဝ်ထြာမ်ဂှ်တှ်ေ ကဵုအာတၚ်ဒုၚ်လျိုၚ်ဂီုကၠီု ကုယူကရုၚ်ဟွံသေၚ်ပုဟ်တုဲ အခေါၚ်ဂွံဒှ်ဍုၚ်မလုပ်ဂကောံနေတဝ်ဂှ်လေဝ် ကဵုအာဟွံသေၚ်ပုဟ်ဂှ် ဟီုလဝ်ရ။
ပ္ဍဲအကာဲအရာမက္တဵုဒှ်ဒၟံၚ်သာ်ဏံဂှ် ယူရောပ် ဗလးဏာ ကောန်ဒပ်ညးတံ ပ္ဍဲယူကရုၚ်တုဲ ဂွံထိၚ်ဒဝ်ပရေၚ်ၜိုဟ်လလမ်ဂှ် ဖန်ဇန်ဒၟံၚ်ရ။
အမေရိကာန်ဂှ်တှ်ေ ဗလးအာကောန်ဒပ်ဗလးတိဂမၠိုၚ် ပ္ဍဲယူကရုၚ်ဟွံသေၚ်ပုဟ်ဂှ် ဟီုလဝ်တုဲ သွက်ဂီုကၠီုယူကရုၚ်ဂှ် ယူရောပ် တာလျိုၚ်နွံ အဓိကရောၚ် ဟီုလဝ်ရ။
Ref: Reuters