ဝါယှေန်တာန်၊ မာန် ၅
သမ္မတအမေရိကာန် ဒဝ်နေဝ်ထြာမ် ထ္ပက်လဝ်စၟတ်တဲ တၚ်စၞောန်သ္ဂောံကံက်ဂလိုၚ်ပ္တိုန်အာအကံက်အခေါန် လ္တူကပေါတ်ဗၞိက်ကြုက် ၜါဆတုဲ နကဵုကနေဒါ ကေုာံ မက္ကသဳဂိုဝ် ဂွံပါဲဒလေတ်အကံက်အခေါန် ဒၞါဲဟွံသှ်ေရပုဟ်ဂှ် ပ္ဍဲဂိတုမာတ် ၃ တေံ ဟီုကၠုၚ်လဝ်ရ။
ကနေဒါ ကေုာံ မက္ကသဳဂိုဝ် မဒှ်ဍုၚ်သွံရာန်ဒၟံၚ်ဗၞိက်အဓိက ကုအမေရိကာန်ဂှ်ဝွံ ဟိုတ်နူဟွံတာဒၞါလဝ် ပရေၚ်ညးဆုဲပြံၚ်မံၚ်တန်တဴ ဟွံလုပ်သၞောဝ်တံကဵု ဟွံဗ္တိုက်သရိုဟ်လဝ် ပရေၚ်ကၠတ်သွံရာန်ဂဥုဲၜူမာဲတံဂှ်ဂးတုဲ အပ္ဍဲဂိတုဖေဖဝ်ဝါရဳတေံ သမ္မတထြာမ် ဒဒှ်ရကံက်အာအခေါန် လ္တူၜါဍုၚ်ဏံဏောၚ်ဂှ် လလောၚ်တြးလဝ်တုဲ ခြာဟွံလအ်ဂှ် ဒေါအ်ထောံလဝ်ရ။
ကြဴနူထြာမ် ဟီုကၠုၚ်ကဵု အ္စာပရိုၚ်ဂမၠိုၚ် ပ္ဍဲဂိတုမာတ် ၃ တေံ ဒဒှ်ရဍုၚ်ၜါဍုၚ်ဏံ ဂွံပါဲဒလေတ်အကံက်အခေါန် ဒၞါဲဟွံသှ်ေရပုဟ်ဂှ်တုဲဂှ် ဖျာသထံက်ယှေဝ်ယျာအမေရိကာန်တံ စှ်ေအာလဝ်ရ။
တ္ၚဲဒေါအ်ဇူလဝ်အကံက်အခေါန်တံဂှ်ဝွံ ပ္ဍဲဂိတုမာတ် ၄ တေံဂှ် အာယုက်အိုတ်အာယျ မဒှ်ရ။
ကပေါတ်ဗၞိက်ကြုက်တံဂှ် ကၠာတေံ ထြာမ်ဖျေံစၟတ်လဝ် သ္ဂောံကံက်အာအခေါန် ၁၀ တၟံကၠံဏောၚ်ကီုလေဝ် တၚ်စၞောန်သ္ဂောံကံက်အခေါန် စဵုကဵု ၂၀ တၟံကၠံဂှ် ထ္ပက်လဝ်စၟတ်တဲတုဲယျဂှ် သ္ၚိဗု ဟီုလဝ်ရ။
လ္တူကနေဒါ ကေုာံ မက္ကသဳဂိုဝ်တံဂှ် အတိုၚ်ထြာမ် စဳဇန်လဝ် ယဝ်ကံက်ဂလိုၚ်ပ္တိုန်အခေါန်ဖလှာတံဂှ်မ္ဂး ၚုဟ်ဗၞိက်တံ သၠုၚ်တိုန်ကၠုၚ်မာန်ရ။
ဟိုတ်ဂှ်ရ ဒှ်သဘဴထြာမ် ဝးပ္ကဝ်ကၠေံကတိပါၚ် အခိၚ်မစန်ဒက်လဝ်မာဲတေံ ခရိတ်အိုတ်ပ္ဍဲဂြောဝ်ဂတာဂမၠိုၚ် မ္ဒးယအ်စှ်ေအာဏောၚ်ဂှ်ရ။
သမ္မတထြာမ် ယဝ်ကံက်ကၠုၚ်အခေါန်မ္ဂး လ္တူကပေါတ်ဗၞိက်အမေရိကာန်ဂှ် ကံက်အာအခေါန်ဖလှာ ၂၅ တၟံကၠံဏောၚ်ဂှ် အလဵုအသဳကနေဒါ ဟီုလဝ်ရ။
Ref: AFP