ဗေကျေန်၊ မာတ် ၆
သမ္မတဒဝ်နေဝ်ထြာမ် ကံက်ဂလိုၚ်ပ္တိုန်အခေါန်တုဲ သ္ပမာန်ဍဵုဍိုက်ဒၟံၚ်ဂှ် အေၚ်ဒုၚ်အာဟွံသေၚ်ဂှ်ကီု၊ လ္တူဗၞိက်ပ္တိတ်အမေရိကာန် ဗၞိက်ပရေၚ်တဵုလွဳတံကဵု ဇွောံမစၞစ ၚုဟ်မးမၞုံ ၂၁ ဗဳလျာန်ဒဝ်ဠာအမေရိကာန်ဂှ် ကံက်ပပဵုပ္တိုန်အာအခေါန်တုဲ ပလန်အာတဲဏောၚ်ဂှ် ကြုက် လလောၚ်တြးလဝ်ရ။
သမ္မတထြာမ် လလောၚ်တြးလဝ် ဒဒှ်ရကံက်ဂလိုၚ်ပ္တိုန်အာအခေါန်ဖလှာ လ္တူဗၞိက်ကြုက်တံ ၜါဆဏောၚ်ဂှ်တုဲ ဍုၚ်ကြုက်ဂှ်လေဝ် ယဝ်ပေါဲပၞာန်ပရေၚ်သွံရာန်ဗၞိက်တံ ဒှ်ကၠုၚ်မ္ဂး လုပ်အာပေါဲဗ္တိုက်ဏောၚ်ဂှ် ဟီုလဝ်ဂှ်ရ ပေါဲပၞာန်ပရေၚ်သွံရာန်ဗၞိက် အကြာဍုၚ်ဇြဟတ်ဇၞော် ပရေၚ်ပိုန်ဒြပ် ၜါဍုၚ်ဂှ် ခြာဟွံလအ် ဒှ်ကၠုၚ်မာန်ရ။
ဒဒှ်မပ္တိတ်ကၠုၚ်ဇြဟတ် ဂွံကရေပ်ဓရတ်ကြုက်ဂှ်ဝွံ တော်တၟော်လဝ် ဗၠေတ်အာယျဂှ် ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ကြုက်ဂှ် ဟီုလဝ် အပ္ဍဲပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဗေကျေန်ရ။
ကၠာတေံ ထြာမ် ဟီုကၠုၚ်လဝ် ဒဒှ်ရကံက်အာအခေါန် လ္တူကပေါတ်ဗၞိက်ကြုက် မလုပ်စိုပ်ကၠုၚ်အမေရိကာန်တံဂှ် ၁၀ တၟံကၠံဏောၚ်ကီုလေဝ် ဒဒှ်ရကံက်အာ ၂၀ တၟံကၠံဂှ် ထပ်တုဲလလောၚ်တြးလဝ်ရ။
ဂဥုဲၜူမာဲ လုပ်စိုပ်ဒၟံၚ်ပ္ဍဲအမေရိကာန်တံဂှ် ဟိုတ်နူကြုက် ဟွံရေၚ်တၠုၚ်ကေတ်လဝ်အရေဝ် ဗွဲမရုပ်ဂပ်ဂှ်တုဲ မ္ဒးကံက်ဂလိုၚ်ပ္တိုန်လဝ်အခေါန်ဖလှာတံရောၚ် ထြာမ် ဟီုလဝ်ရ။
ဣဏံဝွံ ဒှ်ပြဝသ္ပမာန်ဍဵုဍိုက် ပရေၚ်ရပ်ဓရတ်မွဲတုဲ ပ္ဍဲညးတံ သၞောဝ်ဗ္တိုက်သ္အးဂဥုဲၜူမာဲ မတေၚ်ဂြတ်အိုတ် နွံဒၟံၚ်ဂှ် ဌာနဝန်ဇၞော်ကာဍုၚ်ကြုက် ဟီုလဝ်ရ။
အကြာကြုက်ကဵု အမေရိကာန်ဂှ် ကလေၚ်ပလန်တဲညးသ္ကအ်တုဲ ပရေၚ်ကံက်ဂလိုၚ်ပ္တိုန်အခေါန်တံ ထပ်နွံကၠုၚ်မာန်ကီုလေဝ် စပ်ကဵုကိစ္စအကံက်အခေါန်ဏံတုဲ သွက်ဂွံပ္ညဳပ္ညပ်ဂှ် လ္ပာ်ကြုက် ရံၚ်ကေတ်ဗီုပြၚ်ပံက်လဝ်ဂၠံၚ်ဂှ် ညးလ္ၚတ်ဂမၠိုၚ် ဟီုရ။
ဟိုတ်နူထြာမ် ကံက်ဂလိုၚ်ပ္တိုန်အခေါန်တုဲ ပ္ဍဲအမေရိကာန် ၚုဟ်ဗၞိက်ဂမၠိုၚ် သၠုၚ်တိုန်ကၠုၚ်မာန်တုဲ ကတိပါၚ်ထြာမ်စန်ဒက်လဝ်မာဲ ခရိတ်အိုတ်ဂြောဝ်ဂတာဂမၠိုၚ် မ္ဒးယအ်စှ်ေဏောၚ်ဂှ်လေဝ် လီုလာ်အာမာန်ရ။
Ref: Reuters