ဝါယှေန်တာန်၊ မာတ် ၇
ကြဴနူကလေၚ်ပလန်ကၠုၚ်တဲ ကုပရေၚ်သမ္မတထြာမ် မကံက်ဂလိုၚ်ပ္တိုန်လဝ်အခေါန် လ္တူဗၞိက်ကြုက်တံဂှ်တုဲ နကဵုကြုက် ပေါဲပၞာန်သာ်လဵုမွဲဟွံဟီု ဂွံဗ္တိုက်ကဵုအမေရိကာန်ဂှ် ဒှ်ဒၟံၚ်ဒတုဲရောၚ် ကဵုလဝ်သတိရ။
ကြဴနူသမ္မတထြာမ် ဂလိုၚ်ပ္တိုန်အကံက်အခေါန် လ္တူကပေါတ်ဗၞိက်ကြုက်တံတုဲဂှ် ဍုၚ်ပရေၚ်ပိုန်ဒြပ်ဇၞော်ဂၠးတိ ၜါဍုၚ်ဝွံ ဂွံဒှ်ပေါဲပၞာန်ပရေၚ်သွံရာန်ဗၞိက်ဂှ် သာတုဲကြပ်ကၠုၚ်ဒၟံၚ်ရ။
နူကဵုကြုက် လလောၚ်တြးကၠုၚ် ဗွဲမပြဟ် ဒဒှ်ရကံက်အာအခေါန်ဖလှာ လ္တူဗၞိက်ပ္တိတ်ပရေၚ်တဵုလွဳအမေရိကာန်တံ နူ ၁၀ တၟံကၠံ စဵုကဵု ၁၅ တၟံကၠံဂှ်ဏောၚ် မဒှ်ရ။
ယဝ်အမေရိကာန် နွံပၟိက်ကဵုပေါဲပၞာန်မ္ဂး ပေါဲပၞာန်အကံက်အခေါန်ကဵုဒှ်၊ ပေါဲပၞာန်ပရေၚ်သွံရာန်ဗၞိက်ကဵုဒှ်၊ ပေါဲပၞာန်ဂကူလဵုဒှ်ဒှ် သွက်သ္ဂောံဗ္တိုက်အာဒဵုစိုပ်ကၞောတ်ဂှ် ဒှ်ဒၟံၚ်ဒတုဲရရောၚ် ရုၚ်ကလုတ်ကြုက် ချူထ္မံက်ထ္ၜးလဝ် ပ္ဍဲမဳဒဳယာပရေၚ်မၞိဟ် X ရ။
ဂွံတိုန်စိုပ်ကောံဓရီုကၠတ်ထဝ်ညးဍုၚ်ကွာန်ကြုက် အခိၚ်က္ဍိုပ်သ္ကိုပ်ဂမၠိုၚ် ကောံဒၟံၚ်ပ္ဍဲဗေကျေန်ဂှ် ဂလာန်သာ်ဏံ မံက်တိတ်ကၠုၚ်တုဲ ကြဴနူထြာမ် ဒှ်သမ္မတတုဲဂှ် ဒှ်ကၠုၚ်ဂလာန်ဗေကျေန် ဟီုပ္တိတ်ကၠုၚ် အရေဝ်ဇၞော်ဇၞော်မွဲလေဝ် မဒှ်ရ။
သ္ကိုပ်ဝန်ဇၞော်ကြုက် လဳကဳကျာန်ဂှ်တှ်ေ လ္တူဂၠးတိဏံ အပ္ဍဲပွိုၚ်ကၠံသၞာံ အပြံၚ်အလှာဲဟွံကေၚ်ညာတ်လဝ်တံဂှ် က္တဵုဒှ်ဒၟံၚ် နကဵုအသိၚ်မမြက်ဇက်ဂှ်တုဲ သၞာံဏံ သၠုၚ်ပ္တိုန်ရပ်စပ်အာ ခရိတ်အရပ်စပ်ကာစဵုဒၞါကြုက် စဵုကဵု ၇ ဒဿမ ၂ တၟံကၠံဏောၚ်ဂှ် ပ္ဍဲဂိတုမာတ် ၅ တေံ ဟီုလဝ်ရ။
ကြုက်ဂှ်တှ်ေ ဟွံတုပ်ကဵုအမေရိကာန် ဍေံပ္တိတ်ဒၟံၚ်ဇြဟတ် သ္ဂောံဖန်ဗဒှ်ရုပ်ရဴဍုၚ်ညးတံ နဒဒှ်ဍုၚ်ၜိုဟ်သြိုဟ်ညိၚ်ဝတ်တုဲ အန္တရာယ်ပေါဲပၞာန်သွံရာန်ဗၞိက်တံ က္တဵုဒှ်မာန်ကီုလေဝ် ပရေၚ်ပိုန်ဒြပ်ဍုၚ်ညးတံ ဒဒှ်ရတောတက်မာန်ဂှ် ညးဍုၚ်ကွာန်ဂမၠိုၚ် ဂွံပတှ်ေစှ်ေကၠုၚ်စိုတ်ဂှ် က္ဍိုပ်သ္ကိုပ်ဂမၠိုၚ် ပ္တိတ်ဒၟံၚ်ဇြဟတ်ရ။
ပရေၚ်ဂဥုဲၜူမာဲ ဖာန်တနာၚ် မလုပ်စိုပ်ကၠုၚ်ဒၟံၚ်အမေရိကာန်တံဂှ် နူကဵုကြုက် ဟိုတ်နူဟွံတာဒၞါ ကေတ်ကၠုၚ်လဝ်အရေဝ် ဗွဲမရုပ်ဂပ်တုဲ မ္ဒးကံက်ဂလိုၚ်ပ္တိုန်လဝ်အခေါန် လ္တူကြုက်ရ။
ၜိုန်ရဂၠါဲဒၟံၚ်သၞ၊ ကရေပ်ဓရတ်ကၠုၚ်ဒၟံၚ်ကြုက် သာ်ဏံကီုလေဝ် ဒဒှ်ရညးတံ ဖေက်ဒၟံၚ်ဟွံသေၚ်တုဲ နဲကဲတံဏံ ဒှ်ကလောန်ဟွံသေၚ်ပုဟ်ဂှ်လေဝ် သ္ကိုပ်ဝန်ဇၞော် လဳကဳကျာန် ဟီုရ။
ကြုက်ဂှ်တှ်ေ ၜိုန်သ္ဂးလဝ် ဂွံဝေၚ်ပေါဲပၞာန် ကုအမေရိကာန် ဒှ်ဒၟံၚ်ဒတုဲဏောၚ်ကီုလေဝ် ပ္ဍဲကဵုဍုၚ်ကြုက်ဂှ်တှ်ေ ညးကလောန်ကၟိတ်ဟွံမွဲတံ ဂၠိုၚ်တိုန်ကၠုၚ်ဒၟံၚ်တုဲ ပြဒ္ဒညာတိသ္ၚိကၠအ်တံဂှ်လေဝ် ဒးဂဗဒၟံၚ်တုဲ ပရေၚ်ရပ်စပ်စသုၚ်တံဂှ်လေဝ် အောန်စှ်ေဒၟံၚ်ဂှ်ရ တၚ်သၟာန် ဒဒှ်ရမိက်ဂွံဝေၚ်ပေါဲပၞာန်ဍာံဍာံဟာဂှ် မံက်တိတ်ဒၟံၚ်ရ။
Ref: BBC