ၜၚ်ကံက်၊ မာတ် ၂၇
အပ္ဍဲကောံဓရီု ကၠောန်ဗဒှ်လဝ် ပ္ဍဲဂိတုမာတ် ၂၅ အခိၚ်နူဂယးဂှ် ဂလာန်ဓဝ်ပတှ်ေဟွံမွဲ လ္တူသ္ကိုပ်ဝန်ဇၞော် ဗဴဓံၚ်ဓာန် ယှေန်နာဝါထရာ နူကဵုလ္ပာ်ဒစဵုဒစးတံ မပၠောပ်ပ္တိုန်နၚ်ဂှ် ကၠတ်ထဝ်သေံ တးပါဲလဝ်ရ။
ကောံဓရီုဏံ စလဝ်အခိၚ်နူဂယး ၜိုတ် ၁၀ နာဍဳဂှ် အမာတ်ကၠတ်ထဝ်သေံ ၄၇၈ တၠ တိုန်စိုပ်လဝ်တုဲ ဥက္ကဌကၠတ်ထဝ်သၟဝ် ဝါန်မူဟာမာတ် နဝ်မာတာ လလောၚ်တြးလဝ် သွဟ်မမာဲပါဲလဝ်ဂှ်ရ။
ဂလာန်ဓဝ်ပတှ်ေဟွံမွဲ လ္တူသ္ကိုပ်ဝန်ဇၞော်ဂှ် အမာတ်ကၠတ်ထဝ် ၁၆၂ တၠ ထံက်လဝ်ဂလာန်တုဲ ၃၁၉ တၠ ဒစဵုဒစးလဝ်ရ။
မာဲမံၚ်အကြာ နွံလဝ် ၇ မတုဲ ဥက္ကဌကၠတ်ထဝ်သၟဝ် ဝါန်ဂှ်တှ်ေ ဒဒှ်ရတးပါဲကၠေံ ဂလာန်လ္ပာ်ညးဒစဵုဒစးတံ မပၠောပ်ပ္တိုန်နၚ်ဂှ် လလောၚ်တြးလဝ်ရ။
ဂလာန်ဓဝ်ပတှ်ေဟွံမွဲ လ္တူသ္ကိုပ်ဝန်ဇၞော်ဂှ် ပ္ဍဲဂိတုမာတ် ၂၄ ကဵု ၂၅ ဂှ် သဳကၠဳလဝ်တုဲ ပါ်မာဲသ္ဂုတ်သွာတ်လဝ်ရ။
ဗဴဓံၚ်ဓာန် မဒှ်ကောန်ဝုတ် သ္ကိုပ်ဝန်ဇၞော်တြေံ တက်ဇြေန် သၟာပရေၚ်ဍုၚ်ကွာန်ဝှ်ကြံၚ်ဂှ်ဝွံ ဗဟုသုတ၊ လညာတ်ကြံၚ်ဍုဟ် ကေုာံ ဆန္ဒပရေၚ်ဍုၚ်ကွာန် အရာမနွံပၟိက် သွက်ကဆံၚ်ဒၞါဲသ္ကိုပ်ဝန်ဇၞော်ဂှ် ပ္ဍဲညးဟွံမွဲရောၚ် ညးဒစဵုဒစးဂမၠိုၚ် စောဲစပ်လဝ်ရ။
ဂကောံအလဵုအသဳ သ္ကိုပ်ဝန်ဇၞော် ဗဴဓံၚ်ဓာန် သ္ကိုပ်သ္ကဂှ်ဝွံ ပြဒ္ဒညာအဓိက မဒှ်ပြဒ္ဒညာၚုဟ်ပၟတ်က္ဍၚ်ဒၟံၚ်ဂှ်ကီု၊ ၚုဟ်ဗၞိက် ကမၠောန်ပရေၚ်လွဳတိရစ္ဆာန်တံ အောန်စှ်ေကၠုၚ်မံၚ်တံဂှ် ဟွံသောၚ်ကလးကဵုမွဲသာ် အစဳဇန်ပရအ်သြန်လှုဲဂှ်တှ်ေ ဂွံဗၚုဟ်က္တဵု ပရေၚ်ပိုန်ဒြပ်ဂှ် စိုပ်တရဴမာန်ဟွံသေၚ်ပုဟ်ဂှ် ကဵုလဝ်သတိကီုလေဝ် ထ္မံက်ကၠုၚ်ရုပ်ရဴ ရေၚ်တၠုၚ်လဝ်ရောၚ် အမာတ်ကၠတ်ထဝ်ဒစဵုဒစးဂမၠိုၚ် ဟီုကၠုၚ်လဝ်ရ။
သ္ကိုပ်ဝန်ဇၞော်ဝွံ အခိၚ်ဆဵုဂဗကဵု အ္စာပရိုၚ်ဂမၠိုၚ်၊ ညးသၟာန်အေန်တာဗျူတံဂှ် ကဵုလဝ်သွဟ်မဟွံဆေၚ်စပ်၊ ကဵုလဝ်သွဟ်ဗၠေတ်တ်တံဏောၚ်ဂှ်လေဝ် အမာတ်ကၠတ်ထဝ်လ္ပာ်ဒစဵုဒစးဂမၠိုၚ် စောဲစပ်လဝ်ရ။
စပ်ကဵုဂကောံအလဵုအသဳပံၚ်ကောံသေံ ဗဴဓံၚ်ဓာန်အာက္ဍိုပ်ဂှ်တုဲ အပါညး တက်ဇြေန် အုပ်ဓလီုလဝ်ဏောၚ်ဂှ်လေဝ် ညးဒစဵုဒစးဂမၠိုၚ် စောဲစပ်ဟီုကၠုၚ်လဝ်ရ။
အခိၚ်ဒးဒုၚ်ဖျေံစၟဝ်လဝ်ဒဏ်ထံၚ်ဂှ် တက်ဇြေန် ထ္ၜးဟိုတ်ကဵု ဒှ်ဒၟံၚ်ယဲမက္ဍၚ်ဒၟံၚ်တုဲ ဟွံမံၚ်ပ္ဍဲထံၚ်မွဲသာ် ကိစ္စမံၚ်လဝ်ပ္ဍဲရုၚ်ဂဥုဲမွဲဓဝ်ဂှ်လေဝ် ပ္တိတ်လဝ်သၟာန်ကီုရ။
စပ်ကဵုပရေၚ်ဂြောဝ်ဂတာသ္ကိုပ်ဝန်ဇၞော် ပိုၚ်ပြဳလဝ်တိတံဂှ်လေဝ် လ္ပာ်ညးဒစဵုဒစးတံ ပ္တိတ်လဝ်သၟာန်တုဲ စပ်ကဵုကိစ္စကဵုလဝ်အခေါၚ်ပံက် ကမၠောန်ကာသဳနဝ်တံဂှ်တုဲလေဝ် ပ္တိုန်လဝ်ဒုဟ်ရ။
Ref: Bangkokpost