မာၚ်တဝ်၊ အံက်တဝ်ဗာ (၁)
ပ္ဍဲသ္ကုတ်သၟဝ်ကျာ ပွိုၚ်ဍုၚ်မာၚ်တဝ်၊ တွဵုရးရခေၚ်ဂှ် ဟိုတ်နူကံၚ်ဇြဳပၞာန် ဗ္တိုက်ကဵုက္ၜၚ်ကျာတုဲ ညးပါဲဒဴဘဲပၞာန် ထောံလသာဌာန်ဒၟံၚ်တုဲ မဂြိပ်ဒဴပါဲဒလေတ်ကၠုၚ် လ္တူဍုၚ်မာၚ်တဝ်တံဝွံ မ္ၚးနူတၚ်နွံပၟိက်သ္ဇိုၚ် ပရေၚ်စသုၚ်မံၚ်စံၚ် ဗိုက်လ္တက်တံဂှ် စနူကဵုဂဥုဲဇဗတံ ဒှ်တမ် နွံပၟိက်ဒၟံၚ် ကာမံက်တိုန်ရဂှ် ဂွံတီကေတ် နူညးပါဲဒဴဘဲပၞာန်တံရ။
ဟိုတ်နူဗ္တိုက်ကဵု က္ၜၚ်ကျာတုဲ ပ္ဍဲဇြပ်သ္ဘၚ်ဓဝ် လဒေါဝ်ဍုၚ်မာၚ်တဝ်ဂှ် ညးပါဲဒဴဘဲပၞာန်တံ ဂၠိုၚ်ကၠုၚ်တုဲ စနူကဵုအခက်အခုဲဂဥုဲဇဗတံကီု၊ မ္ၚးနူတၚ်နွံပၟိက်ပရေၚ်စသုၚ်မံၚ်စံၚ် ဗိုက်လ္တက်သ္ဇိုၚ်တံဂှ် သီုကဵုသ္ၚိဍာ်တံလေဝ် ၜါမဓဝ်ဟေၚ် မၞုံဒၟံၚ်ဂှ်ရ ဒှ်ဒၟံၚ်အခက်အခုဲအိုတ်ရ။
ညးပါဲဒဴဘဲပၞာန်မွဲတၠဂှ် အခါလၟုဟ် မၞိဟ်ဂၠိုၚ်ကၠုၚ်တုဲ သ္ၚိ (၂) မဓဝ်မၞုံဂှ်ရ အခက်အခုဲနွံဒၟံၚ်တုဲ စနူကဵုယာတ်ကၞဴ၊ ဂဥုဲဇဗ ကေုာံ ကပေါတ်အရပ်စပ်မၞိဟ်ဗြဴလၟေၚ်ဂိတုတံ ဒှ်တမ် နွံပၟိက်ဒၟံၚ်ကဵု အရီုဗၚ်တံရဂှ် ဟီုရ။
သ္အာၚ်နူဂှ်ပၠန် ညးပါဲဒဴဘဲပၞာန်တံဝွံ ဒၟါနူရာန်ရပ်စပ် ဍာ်သုၚ်ဍာ်လွပ်တံ ဟွံမာန်ဂှ်ရ ဒးကၟံက်သုၚ်ဒၟံၚ်ဍာ် နူကဵုဍာ်ပလိုၚ် မၞုံပ္ဍဲကွာန်စဳပျး ကွာ်နူ ဗ္ဒိုပ်ပါဲဒဴဘဲပၞာန်ဂှ်မ္ဂး ၜိုတ် (၁၅) မိနေတ်မၞုံဂှ်လဝ် ဂွံတီကေတ်ရ။
အခိၚ်လၟုဟ်ဂှ် ဒၟါနူဒှ်အခိၚ်ရာသဳဥတုပြံၚ်လှာဲ နူဗြဲ ကၠောံမုဟ်ကျာဂှ်ရ ညးပါဲဒဴဘဲပၞာန်တံဝွံ ဒးဒုၚ်စသိုၚ်ဒၟံၚ် ဝေဒနာမတွံဂး ဇကုဂမ္တဴ ဗက်ကဵုရာသဳတံ ကေုာံ ဒးချာံ၊ ခ္ဍက်တံတုဲ ဒးပရအ်ရပ်စပ်ဒၟံၚ် ဂဥုဲဇဗရေၚ်သ္ကအ်အိုတ်ရ။
လၟိဟ်မၞိဟ် မဂြိပ်ဒဴကၠုၚ် သွက်ဂွံပါဲဒဴဘဲပၞာန် လ္တူဍုၚ်မာၚ်တဝ် နူကွာန် (၂၀) ကွာန် သ္ကုတ်သၟဝ်ကျာမာၚ်တဝ်တံဂှ် မၞုံဒၟံၚ် ဗၞတ် (၁၀၀၀) တုဲ ကောန်ၚာ်သၟတ် ၜိုတ် (၃၀၀) ဝွံလေဝ် ဒးဆောံလေၚ်ဒၟံၚ် အခေါၚ်ဗ္တောန်ပညာတံရ။
စနူကဵုဂိတုအဝ်ဂါတ် လက္ကရဴဏံတုဲ ဒပ်ပၞာန်ရခေၚ် (AA) တံ ပွမသီဂိုၚ်ကၠုၚ် ဗ္ဒိုပ်ဒပ်မၚ်ပယျဵု ကံၚ်ဇြဳပၞာန်တံဂှ် မၞုံကၠုၚ်ရ။
ဒပ်ကံၚ်ဇြဳပၞာန် သွက်ဂွံကလေၚ်ဂွံဗ္ဒိုပ်တံဂှ်တုဲ ဗ္တိုက်ကၠုၚ် နကဵုက္ၜၚ်ကျာပၞာန် က္ၜၚ်ကျာသၞေၚ်ဝဲတံ၊ က္ၜၚ်ကျာဂျက်တံ သ္ကာတ်တ်မြဟ်ဟ်တံကီု၊ ဂြာတ်ကၠုၚ်ဗမ် ဗ္ဒါဲကွာန်တံနွံဂှ်ရ ညးဒေသ နူကွာန် (၂၀) ကွာန် သ္ကုတ်သၟဝ်ကျာမာၚ်တဝ်တံဝွံ ထောံလသာသ္ၚိဌာန်တုဲ ဒးဂြိပ်ဒဴပါဲဒလေတ်ကၠုၚ် လ္တူဍုၚ်မာၚ်တဝ်တံကီုရ။
ကွာန်ဂမၠိုၚ် ထောံလသာဌာန်ဒၟံၚ်တုဲ ဂြိပ်ဒဴကၠုၚ်တံဂှ် ဒှ်ကွာန်ဖာဝတ်ချံၚ်၊ အံၚ်သာယျာ၊ အံၚ်မ္ၚဵု၊ ဂျူၚ်ချံၚ်၊ နတ္တာတံၚ်၊ မၚ်္ဂလာညောအ်၊ တံၚ်ပျဵု၊ အံၚ်တပျေ၊ ခမံၚ်သုက်၊ လံၚ်ဒုမ်၊ ယာန်အံၚ်ပျေန်၊ သာယာကုန်၊ မေန်ကျဳယဲ၊ (အထက်ပြူးမ) ၊ တမာန်တာ၊ မေန်ခမံၚ် ကေုာံ မဳတိုက်တံရ။
ပရိုၚ်−သြၚ်လောန်တိုၚ်(မ်)