အိုဝ်တာဝါ၊ မာတ် ၂၉
ပရေၚ်ဆက်ဆောံ အကြာအမေရိကာန်ကဵုကနေဒါ မဒုၚ်သ္ဇိုၚ်ကဵု ပရေၚ်ပံၚ်တောဲပရေၚ်ပၞာန်၊ သ္ဂောံပတေၚ်ဂြတ် ပရေၚ်ဂီုကၠီု၊ ပရေၚ်ပံၚ်တောဲပရေၚ်ပိုန်ဒြပ် အကြာၜါဍုၚ် ဂွံဇြိုဟ်နက်တံဂှ် တုဲဒှ်အာယျဂှ် သ္ကိုပ်ဝန်ဇၞော်ကနေဒါ မက်ကာနေ ဟီုကၠုၚ်ရ။
ကြဴနူကောံဓရီုဂကောံအလဵုအသဳတုဲ အခိၚ်ဆဵုဂဗကဵု အ္စာပရိုၚ် ပ္ဍဲဍုၚ်အိုဝ်တာဝါဂှ် သ္ကိုပ်ဝန်ဇၞော် ကာနေဂှ်တှ်ေ အခိၚ်ဒးဆေၚ်ဒၟံၚ်မုက်ကဵု အကံက်အခေါန် နူသမ္မတအမေရိကာန် ဒဝ်နေဝ်ထြာမ်ဂှ် နကဵုကောန်ဍုၚ်ကနေဒါဂမၠိုၚ် ဒးကလေၚ်ထ္မံက်ရုပ်ရဴ ပရေၚ်ပိုန်ဒြပ်ညးတံ နတဲစှ်ေစှ်ေဏောၚ်ဂှ် ဟီုကၠုၚ်ရ။
နကဵုကနေဒါ သွက်ဂွံသ္ပအာ ပရေၚ်ခၠေဝ်ပလန်မၞုံကဵုပရေၚ်ဇီုကပိုက်ဇၞော်ဇၞော် လ္တူအမေရိကာန်တံဂှ် ကလေၚ်အာတဲ နကဵုအခေါန်ဖလှာတံဏောၚ်ဂှ် သ္ကိုပ်ဝန်ဇၞော် ဟီုရ။
ကံက်အာအခေါန် ၂၅ တၟံကၠံ လ္တူကွဳစက် ကေုာံ ကပေါတ်ကွဳစက် မပၠောပ်ပ္တိုန်နၚ် ဍုၚ်အမေရိကာန်တံဂှ်ဏောၚ်တုဲ ဣဏံဝွံ ဒဒှ်ရဒှ်အာထာဝရဂှ် သမ္မတထြာမ် ဟီုကၠုၚ်လဝ် ပ္ဍဲဂိတုမာတ် ၂၆ တေံရ။
က္ဍိုပ်သ္ကိုပ်ဗော်လေတ်ဗရဴ သ္ကိုပ်ဝန်ဇၞော် ကာနဂှ်ေတှ်ေ တၚ်တုပ်စိုတ်မူလ စပ်ကဵုဗၞိက်ပ္တိတ်ယာန်ကွဳစက် အကြာကနေဒါ−အမေရိကာန် မထ္ပက်လဝ်စၟတ်တဲ ပ္ဍဲသၞာံ ၁၉၆၅ ဂှ် မွဲအာယုက်ညးတှ်ေ ဒှ်တၚ်တုပ်စိုတ် ပၟိက်ဇၞော်အိုတ်မွဲရောၚ် ဟီုရ။
တၚ်တုပ်စိုတ်ဏံဝွံ တုဲဒှ်အာ ၜိုတ်ကံက်အခေါန်ဖလှာတံရဏောၚ်ဂှ် သ္ကိုပ်ဝန်ဇၞော် ကာနေ ဟီုကၠုၚ်လဝ် နကဵုဘာသာပြၚ်သေတ်ရ။
နကဵုကနေဒါ ဒဒှ်ရနွံပၟိက်ဒၟံၚ် သွက်ဂွံဒက်ပ္တန်ပရေၚ်ပိုန်ဒြပ် အလဵုကောန်ဍုၚ်ညးတံ ထိၚ်ဒက်ဂွံမွဲဂှ်ကီု၊ ကုညးမကၠောန်ကလောန်မွဲစွံ တၞဟ်ဟ်တံဂှ်လေဝ် နွံပၟိက်ဒးကလေၚ်ချပ် ပရေၚ်ဆက်ဆောံစပ်ကဵုပရေၚ်ပိုန်ဒြပ်ညးတံဂှ်ရောၚ် သ္ကိုပ်ဝန်ဇၞော်ကနေဒါ ဟီုရ။
ကံက်ကၠုၚ်အခေါန် လ္တူဖကောဝ်ဒါန် ကေုာံ ပသဲက္ဍာၚ်တံ ၂၅ တၟံကၠံဂှ်ကီု၊ လ္တူဗၞိက်ပၠောပ်ကနေဒါတံဂှ် အမေရိကာန် သရောပ်ကၠေံဖအိုတ်တုဲ ဒဒှ်ရစၞောန်ပျးဏာအခေါန်ဖလှာ ၂၆ တၟံကၠံဂှ် လလောၚ်တြးကၠုၚ်လဝ်တုဲရ။
ကနေဒါဂှ်လေဝ် ကလေၚ်ပၠန်တဲတုဲ ဒဒှ်ရကံက်ဂလိုၚ်ပ္တိုန်အာ အကံက်အခေါန် လ္တူကပေါတ်ဗၞိက်အမေရိကာန်ဂှ်ဏောၚ်ဂှ် လလောၚ်တြးလဝ်ရ။
အပ္ဍဲပေါဲပၞာန်ပရေၚ်သွံရာန်ဗၞိက်ဂှ် သွက်ဂွံတာဒၞါ အမေရိကာန်တုဲ ကနေဒါ ကေုာံ အဳယူ လ္ပပံၚ်တောဲညိဂှ် သမ္မတထြာမ် ကဵုလဝ်သတိ ပ္ဍဲဂိတုမာတ် ၂၇ တေံရ။
ယဝ်ရ အဳယူ ကေုာံ ကနေဒါ ပံၚ်တောဲတုဲ ယဝ်ကၠောန်ကၠုၚ် ပရေၚ်ပိုန်ဒြပ်အမေရိကာန် ညံၚ်ဂွံဇီုကပိုက်မ္ဂး ဒးဆေၚ်အာမုက် ကုအကံက်အခေါန်ဂၠိုၚ်နူဏံ တၟာဂလိုၚ်မာန်ဏောၚ်ဂှ် ထြာမ် ဘပဠလဝ်ရ။
ပြဝအမေရိကာန် ကံက်ဂလိုၚ်ပ္တိုန် အကံက်အခေါန်တံဂှ်ဝွံ ဒှ်ပွဖံက်သစ္စ လ္တူမဟာမိတ်ဍုက်ကေဝ်အိုတ်တံဏောၚ်ဂှ် သ္ကိုပ်ဝန်ဇၞော် ကာနေ ဟီုလဝ်ရ။
Ref: BBC