ဝါသဝ်၊ မာတ် ၂၈
ယဝ်ဗ္တိုက်ဍုၚ်ပဝ်လာန် ဟွံသေၚ်မ္ဂး ယဝ်ဗ္တိုက်ဍုၚ်မဟာမိတ် မွဲမွဲဍုၚ်မ္ဂး ဒဒှ်ရကလေၚ်ခၠေဝ်အာနကဵုဇြဟတ်ပေၚ်ၚ်ဂှ်ကီု၊ ဒဒှ်ရစဵုဒၞါအာ ဒေသဂကောံနေတဝ် ဗွဲဒိုဟ်ဗၟံက်ဂှ်ဏောၚ်ဂှ် ညးအုပ်ကာဂကောံနေတဝ် မက်ရူတဳ ကဵုသတိ ဟီုကၠုၚ်လဝ် ပ္ဍဲဂိတုမာတ် ၂၆ တေံရ။
ညးအုပ်ကာ မက်ရူတဳဂှ်တှ်ေ ဒဒှ်မညးတံခၠေဝ်ပလန်အာဂှ်တှ်ေ က္တဵုဗဒှ်ကဵုပရေၚ်လီုလာ်တံ ပရေံပရေံဏောၚ်တုဲ ဣဏံဝွံ ဒဒှ်ရဟီုကၠုၚ် ကုရဲမၞုံပၟိက်ကဵုညးတံ ကေုာံ သမ္မတရုယှာ ဗလာဒဳမာပူတေန် ဂွံဒှ်ဗ္တိုက်ညးသ္ကအ် ဂွံဒှ်အာသောၚ်ၚ်ကၠးကၠးဏောၚ်ဂှ် ဟီုလဝ်ရ။
ပ္ဍဲယူကရုၚ် ယဝ်ဂွံပေါဲအံၚ်ဇၞးတုဲမ္ဂး ရုယှာ စမ်ကၠုၚ်ပရေၚ်ဓဝ်ညဳသာ ဂကောံနေတဝ်တံမာန်ဏောၚ် ပရေၚ်ဒှ်ဓဝိၚ်သာ်ဏံ မံက်တိတ်ကၠုၚ်ဒၟံၚ် ပ္ဍဲဍုၚ်ပဝ်လာန်ကဵု ဍုၚ်ဗဝ်တေတ်တံရ။
အခိၚ်ဆဵုဂဗကဵု သ္ကိုပ်ဝန်ဇၞော်ပဝ်လာန် ဒဝ်နေဝ်တာသ် ပ္ဍဲဝါသဝ်ဂှ် ညးအုပ်ကာဂကောံနေတဝ် ကဵုကတိဟီုကၠုၚ်လဝ် ဒဒှ်ရစဵုဒၞါအာ ဍုၚ်မလုပ်ဂကောံနေတဝ် ဍုၚ်မဟာမိတ်တံဂှ်ရ။
ပဝ်လာန် ရန်လဝ်သ္ဂောံရပ်စပ်အာသြန်ကၟိန်ဍုၚ် GDP ၅ တၟံကၠံ သွက်ပရေၚ်စဵုဒၞါဂှ်ဝွံ ပ္ဍဲဂကောံနေတဝ်ဂှ် ဒှ်ဍုၚ်နူကဵုဗွဲဒိုဟ်ဗၟံက် ဍုၚ်ဇြဟတ်လွဟ်ခိုဟ်အိုတ်မွဲရ။
သ္ကိုပ်ဝန်ဇၞော် ဒဝ်နေဝ်တာသ်ဂှ်တှ်ေ ဂွံပရေၚ်ၜိုဟ်လလမ် ပ္ဍဲယူကရုၚ်တုဲမှဟေၚ် ညးတံ ဂီုကၠီုဏောၚ် ဒဒှ်ရဂွံဒုၚ်စသိုၚ်ဂှ် ဟီုရ။
ပ္ဍဲလက်ထက်သမ္မတဒဝ်နေဝ်ထြာမ်ဏံ အခိၚ်လစွံစိုတ်အမေရိကာန် စပ်ကဵုပေါဲပၞာန်ယူကရုၚ်−ရုယှာ မပြံၚ်လှာဲကၠုၚ်ဒၟံၚ်ဂှ် ပရေၚ်ဒှ်ဓဝိၚ် ရုယှာ ဗ္တိုက်ကၠုၚ်ယူရောပ်မာန်ဂှ်လေဝ် ဂၠိုၚ်ကၠုၚ်ဒၟံၚ်ရ။
ပရေၚ်သဳကၠဳ သ္ဂောံဒေါအ်ပန်ပှော် အကြာယူကရုၚ်ကဵု ရုယှာတံ နွံဒၟံၚ်တုဲ ပ္ဍဲၜဳဗ္စံက်ဂှ် တုပ်လဝ်စိုတ် သ္ဂောံဒေါအ်ပန်ပှော်ကီုလေဝ် ယဝ်ရုယှာ ရုပ်သီကၠေံ ပရေၚ်ကၟာတ်လဒဵုကေတ်လဝ်အရေဝ် လဝ်လ္တူညးတံဂှ်မှဟေၚ် ထ္မံက်ကၠုၚ်ရုပ်ရဴ သွဟ်ပေါဲသဳကၠဳတံမာန်ဏောၚ်ဂှ် ဟီုရ။
Ref: Dpa