မဝ်သကိုဝ်၊ မာတ် ၃၀
သမ္မတအမေရိကာန် ဒဝ်နေဝ်ထြာမ် အာက္ဍိုပ်တုဲ ဂွံဂွံတၚ်တုပ်စိုတ်ပရေၚ်ဒေါအ်ပန်ပှော် အခိၚ်ကရေပ်ဓရတ်ကၠုၚ်မံၚ်ဂှ် သမ္မတရုယှာ ဗလာဒဳမာပူတေန် အာတ်မိက်ကၠုၚ် သွက်သ္ဂောံပ္တိုန်အလဵုအသဳပြံၚ်လှာဲလွေဟ် ပ္ဍဲယူကရုၚ်ဂှ်တုဲ ဒပ်ပၞာန်ရုယှာ ပသောၚ်ဖအိုတ်အာ ကောန်ပၞာန်ယူကရုၚ်တံဏောၚ်ဂှ် ပ္ဍဲဂိတုမာတ် ၂၈ တေံ ဟီုကြီုကၠုၚ်ရ။
အခိၚ်ပေါဲပၞာန် လအ်ကၠုၚ်ပိသၞာံ သီုၜါလ္ပာ် မၞိဟ်ဂၠိုၚ်ကဵုလ္ၚီ ဒးပြဟ်လလုဲအာဂှ် ကြဴနူထြာမ် ကလေၚ်စိုပ်ကၠုၚ်သ္ၚိဗု မွဲဝါပၠန်ဂှ် ဟီုကၠုၚ် ဒဒှ်ရဒေါအ်ဇူအာ အရီုဗၚ်မကဵုဒၟံၚ်ယူကရုၚ်ဂှ်ဏောၚ်တုဲ ဓဝ်ပတှ်ေလ္တူပူတေန်ဂှ်လေဝ် ဇြဟတ်ခိုဟ်ကၠုၚ်ရ။
သမ္မတပူတေန် ထပ်အာတ်မိက်ကၠုၚ် သ္ဂောံပလှ်ဖျေံ ကုသမ္မတယူကရုၚ် ဗိုဝ်လိုဝ်ဒဳမာ ဇြဳလာန်သကဳဂှ်ဝွံ ညံၚ်အလဵုအသဳ နွံပၟိက်ကဵုလ္ပာ်ရုယှာ ပ္ဍဲကိပ် ဂွံမံက်ကၠုၚ်ဂှ် ထ္မံက်ထ္ၜးဒၟံၚ် ဆန္ဒညးရ။
တၚ်ပူတေန် အာတ်မိက်ကၠုၚ် သ္ဂောံပ္တိုန်အလဵုအသဳ သၟဝ်ပၠတရဴကုလသမဂ္ဂဂှ် သမ္မတဇြဳလာန်သကဳ တးပါဲလဝ်တုဲ ဣဏံဝွံ ဒှ်ပွပ္တိတ်ဒၟံၚ်ဇြဟတ် ကၠောန်ဒၟံၚ် ညံၚ်တၚ်တုပ်စိုတ်ပရေၚ်ၜိုဟ်လလမ် ဂွံလဇုဲလဇဏောၚ်ဂှ် ဟီုတဴရ။
ကုလသမဂ္ဂ ကောပ်ကာဲအာက္ဍိုပ်တုဲ ပ္ဍဲယူကရုၚ် ညံၚ်အလဵုအသဳပြံၚ်လှာဲလွေဟ်မွဲ ဂွံမံက်ဂတဝ်ကၠုၚ်ဂှ် ဒဒှ်ရရုယှာ မိက်ဂွံသဳကၠဳတက်ကျာ ကုအမေရိကာန်၊ သမဂ္ဂယူရောပ်၊ မဝ်သကိုဝ် ကေုာံ မဟာမိတ်ဂမၠိုၚ်ဂှ်ဏောၚ်ဂှ် ပူတေန် ဟီုလဝ်ရ။
သၞာံ ၂၀၂၂ အခိၚ်ဗ္တိုက်ၜက်ၜေတ်ယူကရုၚ်ဂှ် ရုယှာ ဟီုကၠုၚ်လဝ် ပေါဲပၞာန်ဏံ ဟွံလအ်တုဲဒှ်အာဏောၚ်ကီုလေဝ် လ္ပာ်ယူကရုၚ် ဒုၚ်တဝ်စၞေဟ်ကၠုၚ် ဗွဲမသ္ကာတ်မြဟ်၊ ဍုၚ်ရးပလိုတ်တံလေဝ် ကဵုကၠုၚ်အရီုဗၚ်လွဟ်လက်နက်တံတုဲ ဒပ်ရုယှာဂမၠိုၚ် ၜိုတ်ထေၚ်လဝ်ဂှ် ဟွံစိုပ်တရဴ ဒှ်အာလဝ်ရ။
သွက်ဂွံပလှ်ဖျေံ ဇြဳလာန်သကဳဂှ် ပူတေန် ဖ္တိုက်ဖ္အောဝ်လဝ် သ္ကိုပ်ဗိုလ်ပၞာန်ယူကရုၚ်တံရ။
အာယုက်ဇြဳလာန်သကဳ ကေတ်လဝ်တာလျိုၚ်ဂှ်ဝွံ အိုတ်အာ ပ္ဍဲသၞာံ ၂၀၂၄ ဂိတုမေတေံတုဲ စပ်ကဵုပရေၚ်ညး မလုပ်ကဵုဗဗွဲဓဝ်တံဂှ်တုဲလေဝ် ပူတေန် ပ္တိတ်လဝ်သၟာန်ရ။
Ref: AFP