ဝါယှေန်တာန်၊ ဨပရဴ ၁
စပ်ကဵုကိုန်စဳမာန်နျူကလဳယျာ တဳဟဳရာန်တုဲ ယဝ်ရဟွံကေတ်တၚ်တုပ်စိုတ် ကုဝါယှေန်တာန်မ္ဂး ထောံမခတိုဟ်ဗ္တိုက်အာဏောၚ်တုဲ စၞောန်ပျးအာ အခေါန်ဖလှာတံဏောၚ်ဂှ် သမ္မတအမေရိကာန် ဒဝ်နေဝ်ထြာမ် ဘပဠကၠုၚ် အဳရာန် ပ္ဍဲဂိတုမာတ် ၃၀ တေံရ။
သၞာဲဒဴအမေရိကာန် ကေုာံ အဳရာန်တံ သဳကၠဳလဝ်ရောၚ် NBC News ထ္မံက်ထ္ၜးလဝ်ကီုလေဝ် ထ္မံက်ထ္ၜးလဝ် သောဲသောဲဗြောဲဗြောဲဂှ် ဟွံမွဲရ။
အဳရာန်ဂှ်တှ်ေ ပ္ညဳပ္ညပ်ကဵုအာအမေရိကာန် တိုက်ရိုက်ဟွံသေၚ်ပုဟ်ဂှ် ကြဴနူဟီုကၠုၚ် ပ္ဍဲသတ္တာဟတုဲကၠုၚ်တေံတုဲ ထြာမ် ဟီုကၠုၚ်လဝ် သာ်ဏံ အလန်ပထမကၠာအိုတ်ရ။
နကဵုဍေံတံ ယဝ်ဟွံကေတ်တၚ်တုပ်စိုတ်ပုဟ်မ္ဂး ထောံအာမခတိုဟ်အာဏောၚ် ထြာမ် ဟီုလဝ် ပ္ဍဲအေန်တာဗျူ မဆက်စၠောံလဝ် နကဵုဖုၚ်မွဲရ။
ဗီုကေတ်ကၠုၚ်အရေဝ် လ္တူအဳရာန် လောန်ကၠုၚ်ပန်သၞာံတေံဂှ် ညးတံကၠောန်သ္ပအာပၠန်ဏောၚ် ထြာမ် ဟီုဗပေၚ်လဝ်ရ။
လိက်သမ္မတထြာမ် ဖ္တိုက်ဖ္အောဝ်လဝ် ဂွံဂွံလိက်တၚ်တုပ်စိုတ်နျူကလဳယျာတၟိမွဲဂှ် နူဍုၚ်အိုဝ်မာန်မွဲကဆံၚ် ပလံၚ်ဗစိုပ်လဝ် ဇရေၚ်အဳရာန်ရ။
ဂလာန်ပ္တိုန် ပ္ညဳပ္ညပ်အာ ကုအမေရိကာန်တိုက်ရိုက်ဂှ် ညးတံ တးပါဲဏာကီုလေဝ် ပရေၚ်ပ္ညဳပ္ညပ်လုပ်တိုက်ရိုက်ဟွံသေၚ်တံဂှ် ညးတံ ပံက်လဝ်ဂၠံၚ်ဖိုဟ်ရောၚ် သမ္မတအဳရာန် မာသံက် ပဳဇက်ခဳယာန် ကေုာံ က္ဍိုပ်သ္ကိုပ်အဳရာန် အာယာတိုဝ်လာ အလဳခါမေနဳတံ ဟီုလဝ်ရ။
ထြာမ်ဝွံ အာယုက်သမ္မတညး အလန်ကၠာတေံဂှ် နုက်ပ္တိတ်လဝ်အမေရိကာန် နူကဵုတၚ်တုပ်စိုတ်နျူကလဳယျာ ၂၀၁၅ မချုက်လဝ်အကြာအဳရာန်ကဵု ဍုၚ်ဇြဟတ်ဇၞော်တံဂှ်တုဲ လလောၚ်တြးလဝ် ကေတ်အာတၚ်တုပ်စိုတ်ခိုဟ်နူဏံဂှ်ဏောၚ် မဒှ်ရ။
ထြာမ်ဂှ်တှ်ေ ပရေၚ်ကၟာတ်လဒဵုကေတ်အရေဝ် လ္တူအဳရာန်ဂှ်လေဝ် ကလေၚ်သ္ပလဝ်တုဲ ကြဴနူဂှ်တုဲ အဳရာန် ကၠောန်ကၠုၚ်ပရေၚ်သ္အးဇ္ၚးယူရေနဳယာန် ဂၠိုၚ်နူကဵုပမာဏ မတာဒၞါလဝ်တံဂှ်ရ။
အဳရာန်ဝွံ ပ္တိတ်ဒၟံၚ်ဇြဟတ် သ္ဂောံကၠောန်ပ္တိတ်လွဟ်နျူကလဳယျာဏောၚ် ဍုၚ်ပလိုတ်ဂမၠိုၚ် ဒှ်ဒၟံၚ်သံသယကီုလေဝ် တဳဟဳရာန်ဂှ်တှ်ေ ကိုန်စဳမာန်နျူကလဳယျာညးတံဝွံ ဒှ်သွက်ပရေၚ်ၜိုဟ်လလမ်ရောၚ် ဟီုကၠုၚ်လဝ်ရ။
Ref: Reuters