ဘာပန်၊ ဨပရဴ ၄
ကံၚ်ဇြဳပၞာန် ဟိုတ်နူလလောၚ်တြးလဝ် ဒေါအ်ပန်ပှော်ဗွဲယာယဳကီုလေဝ် ပ္ဍဲတိဍာ်ခရိုၚ်ဘာပန် ဗော်သွးကောန်ဂကူကရေၚ် KNU ဂှ် ဟိုတ်နူထောံကၠုၚ်မခတိုဟ် နကဵုက္ၜၚ်ကျာတံဂှ်တုဲ ကောန်ၚာ် အာယုက်ဟွံပေၚ်သၞာံမွဲတၠ မပါလုပ် ကောန်ၚာ်သၟတ် ၜါတၠ ချိုတ်အာလဝ်ရောၚ် သ္ကိုပ်ဗိုလ်ဇၞော်သဝ်ကလာဒိုဝ် ညးမၞုံအခေါၚ်ဟီုဂး ဒပ်မဟာ ၅ KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂွံရီုဗၚ်ဟံၚ်ပြာ်၊ ဂွံရေၚ်တၠုၚ်ကမၠောန်ကလေၚ်ဖျေံဒၞါဲဝါဲ ပါလုပ်သီုကဵုပရေၚ်ဗ္စာရဏာမၞိဟ် လ္တူညးဍုၚ်ကွာန်ဒးလဝ်ဘဲတိချဳတံဂှ်တုဲ ကံၚ်ဇြဳပၞာန် လလောၚ်တြးကၠုၚ် ဒေါအ်ပန်ပှော် နူဂိတုဨပရဴ ၂ စဵုကဵု ဂိတုဨပရဴ ၂၂ ရ။
ၜိုန်ကံၚ်ဇြဳပၞာန် လလောၚ်တြးလဝ် နဒဒှ်အခိၚ်ကာလဒေါအ်ပန်ပှော် ဗွဲယာယဳကီုလေဝ် ပ္ဍဲဂိတုဨပရဴ ၂ ဂှ် ကၠုၚ်စိုပ်ထောံဏာလဝ်မခတိုဟ် ပ္ဍဲကဵုကွာန်နေကာ ဂကောံကွာန်(လေးဖိုးထ) တိဍာ်ဒပ်မဟာ ၅ ခရိုၚ်ဘာပန် KNU ရ။
ဟိုတ်နူထောံဏာလဝ်မခတိုဟ်ဂှ်တုဲ ကောန်ၚာ်ဂွံလဝ်ပိဂိတုမွဲတၠ၊ ကောန်ၚာ် ၁၂ သၞာံမွဲတၠ၊ လၟိဟ်အပံၚ် ၂ တၠ ဒးချိုတ်အာလဝ်တုဲ ကောန်ၚာ်သၟတ် အာယုက် ၁၀ သၞာံမွဲတၠ မပါလုပ် မၞိဟ်တြုံအာယုက် ၅၀ သၞာံမွဲတၠကဵု ညးဗြဴမွဲတၠ အပံၚ်ဖအိုတ် ၃ တၠ ဇီုကပိုက်ကလိဂွံလဝ်ဝပ်ရ။
ပေါဲဗ္တိုက်ၜါလ္ပာ်တံ ဟွံမွဲမွဲသာ် ပရေၚ်ဗ္တိုက်ထောံမခတိုဟ်ဏံဝွံ နကဵုတၚ်ရန်တၟံနွံနွံ ဗ္တိုက်ကၠုၚ်လဝ် ညးဍုၚ်ကွာန်ကောန်အရာပ်တံဏောၚ်ဂှ် သ္ကိုပ်ဗိုလ်ဇၞော် သဝ်ကလာဒိုဝ် ဟီုရ။
သ္အာၚ်နူဂှ်ပၠန် ပရေၚ်ကံၚ်ဇြဳပၞာန် ဒေါအ်ပန်ပှော်ဟီုဂှ်ဝွံ ဟိုတ်နူဒပ်တိုက် မချဳဒရာၚ်ပရေၚ်ပၞာန် ပ္ဍဲဗလးတိဏံသၟးရ ဒေါအ်ပန်ပှော်တုဲ က္ၜၚ်ကျာချဳဒရာၚ်မာန်တံဂှ်တှ်ေ ဟွံဒေါအ်ပန် ဂွံအဓိပ္ပာယ်ဏံဂှ် သ္ကိုပ်ဗိုလ်ဇၞော်သဝ်ကလာဒိုဝ် ညာတ်လဝ်သာ်ဏံရ။
ပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဂှ် ပ္ဍဲဂိတုမာတ်ကြပ်အိုတ်တုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဒပ် KNLA တံဂှ် ပေါဲဗ္တိုက်ပရေၚ်ပၞာန်ၜါလ္ပာ်တံ က္တဵုဒှ်လဝ်ဟွံဂၠိုၚ် ညိၚ်ဒၟံၚ်ကီုလေဝ် လ္ပာ်ဒပ်ကံၚ်ဇြဳပၞာန် ကၠုၚ်စိုပ်ပလံၚ်လဝ် ဇွောံမ မကမ်လွဟ်လက်နက် ပ္ဍဲဗ္ဒိုပ်မသှ်ေဒၟံၚ် ပ္ဍဲခရိုၚ်ဘာပန်ဂှ်လေဝ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG