မတ်မလီု၊ ဨပရဴ ၄
အခိၚ်ကာလလၟုဟ် ဟိုတ်နူလညာတ်ပရေၚ်ဍုၚ်ကွာန် ဒှ်ဒၟံၚ်ၜါလွးတုဲ ညးစၞးနူသွာၚ်ဇဳလေဝ် ပါလုပ်ဟွံမာန်ဂှ်ရ ဇြဟတ်ပၠန်ဂတးမန်ဂမၠိုၚ် ဒစဵုဒစးလဝ်ကီုလေဝ် သွက်ဂွံထ္မံက်ရုပ်ရဴ ကမၠောန်ပရေၚ်ဂကူမန်ဂှ် ဆက်ကၠောန်ဗဒှ်ဒၟံၚ် ကောံဓရီုပရေၚ်ဂကူမန် လ္တူဍုၚ်မတ်မလီုရ။
နာဲအံၚ်မ္ၚဵု ကမ္မတဳကၠောန်ဗဒှ်ကောံဓရီု သီုကဵုဒှ်ကမ္မတဳကေၚ်ကာဗဟဵု ဗော်ဍုၚ်မန်တၟိဂှ်တှ်ေ ဟီုကၠုၚ်လဝ် သွက်ဂွံထ္မံက်ရုပ်ရဴ တၚ်သ္ဂုတ်သွာတ် ၃ သာ် မဖျေံစၟတ်လဝ် နူကဵုကောံဓရီုပရေၚ်ဂကူမန် မကၠောန်ဗဒှ်လဝ် ပ္ဍဲဗ္ဒိုပ်ညဳသာတေံဂှ်တုဲ မ္ဒးကော်ကၠုၚ် ကောံဓရီုပရေၚ်ဂကူမန်လၟုဟ် မဒှ်ရ။
နူကောံဓရီုပရေၚ်ဂကူမန် သၞာံ ၂၀၂၂ မကၠောန်ဗဒှ်လဝ် ပ္ဍဲဂိတုမေ ပွိုၚ်ပိတ္ၚဲ ပ္ဍဲဗ္ဒိုပ်ညဳသာ ဒေသကၞောတ်ၜဳရေဝ်ဂှ် ဂွံလဝ်တၚ်သ္ဂုတ်သွာတ် ၇ တၚ်တုဲ ပၞောဝ်ကဵုတၚ်သ္ဂုတ်သွာတ်တံဏံဂမၠိုၚ် သွက်ဂွံထ္မံက်ရုပ်ရဴလွာဲဂှ် ပိတၚ်ဂှ် ကောံဓရီုပရေၚ်ဂကူမန် ၂၀၂၅ စကၠောန်ဗဒှ်ဒၟံၚ် ပ္ဍဲဂိတုဨပရဴ ၂ ဏံ ရန်လဝ်နွံရောၚ် သ္ဂးရ။
ပ္ဍဲကဵုဏံ သွက်ဂွံချူခၞံ သၞောဝ်သ္ဇိုၚ်ဒက်ပ္တန်ဍုၚ်မန်၊ သွက်ဂွံထ္မံက်ရုပ်ရဴ ပရေၚ်ချဳဒရာၚ်ဂကူမန်၊ သွက်ဂွံဒက်ပ္တန် ဂကောံပံၚ်ကောံပ္ညဳပ္ညပ်ကောန်ဂကူမန် ကေုာံ သွက်ဂွံသ္ၚဳဂၠိပ် သ္ဇိုၚ်မူဖေဝ်ဒရာ သ္ဂောံဒက်ပ္တန်ဍုၚ်မန် မကိတ်ညဳကဵု အကာဲအရာပရေၚ်ဍုၚ်ကွာန်မန်နာနာ မဒှ်ရ။
နာဲဟံသာ ဥက္ကဌဗဟဵု ဗော်ဍုၚ်မန်တၟိဂှ်တှ်ေ ကောံဓရီုပရေၚ်ဂကူမန်ဝွံ ဒှ်ဒၞါဲပ္ညဳပ္ညပ် လညာတ်လစွံစိုတ် အကြာကောန်ဂကူမန်တံဏောၚ် သာ်ဝွံ ဟီုကၠုၚ်လဝ် ပ္ဍဲဂလာန်ပံက်အသေအဟာန်ကောံဓရီုဂှ်ရ။
ပ္ဍဲတ္ၚဲပထမဂှ် ညးစၞး၊ ညးလ္ၚတ် နူဗွိုၚ်သၚ်၊ ဗွိုၚ်ဗော်ဍုၚ်မန်တၟိ၊ ဗွိုၚ်ဗော်ညဳသၟဟ်မန်၊ ဗွိုၚ်ရး ကေုာံ ပွိုၚ်ဍုၚ်၊ ဗွိုၚ်ဂကောံဇြဟတ် ဘိက်ထေက်၊ ဗွိုၚ်ပူဂဵု ဘိက်ထေက်၊ ဗွိုၚ်ဂကောံမှာဇန် အပံၚ် (၇) ဗွိုၚ် ပၞောဝ်မဘိက်လဝ်ဗၞတ် (၂၅၅) တၠဂှ် တိုန်စိုပ်ကၠုၚ် ဗၞတ် (၂၄၆) တၠ နွံရောၚ် ဗော်ဍုၚ်မန်တၟိဗဟဵု အာက္ဍိုပ်ကၠောန်ဗဒှ်လဝ် ကောံဓရီုဂှ် လလောၚ်ပ္တိတ်လဝ်ရ။
ရန်ကဵုသ္ဂောံသ္ၚဳဂၠိပ်သ္ပဒတန် သ္ဇိုၚ်မူ၊ မူဝါဒ စပ်ကဵုပရေၚ်ဂကူတံဂှ်တုဲ နူဗော်ဍုၚ်မန်တၟိဗဟဵု သ္ကိုပ်သ္ကတုဲ ကၠောန်ဗဒှ်အာ ကောံဓရီုပရေၚ်ဂကူမန် နူဂိတုဨပရဴ ၂ စဵုကဵုဂိတုဨပရဴ ၅ ဏောၚ် မဒှ်ရ။
ဂကောံဇြဟတ်ပၠန်ဂတးမန်တံဂှ်တှ်ေ သွက်ဂွံသ္ၚဳဂၠိပ်သ္ပဒတန် မူဝါဒဂမၠိုၚ်ဂှ် အကာဲအရာလၟုဟ်ဝွံ ကၠောန်ဟွံထေက်တုဲ ပွမသ္ဂုတ်သွာတ်ကၠောန်ဒၟံၚ် နကဵုလညာတ်မွဲလ္ပာ်ဓဝ်ဂှ်ဝွံ ပရေၚ်ညဳသၟဟ်ဂကူ သာတုဲလီုလာ်ကၠုၚ်မာန်ဏောၚ် လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
Photo – CJ