မတ်မလီု၊ ဨပရဴ ၄
လ္ပာ်ကံၚ်ဇြဳပၞာန် လလောၚ်တြးလဝ် ဒဒှ်ရဒေါအ်ပန်ပှော် ပွိုၚ် ၂၁ တ္ၚဲကီုလေဝ် ပ္ဍဲတွဵုရးဍုၚ်မန်ဂှ် ထံၚ်ကၠုၚ်ဒၟံၚ်ပရိုၚ် နကဵုပၞာန်ကျာ ဆက်နွံဒၟံၚ်ရောၚ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။
ကံၚ်ဇြဳပၞာန်ဝွံ ရန်ကဵုသ္ဂောံကၠောန်ကမၠောန်ရီုဗၚ်ဟံၚ်ပြာ် ကေုာံ ကမၠောန်ကလေၚ်ဖျေံဒၞါဲဝါဲ အလုံဍုၚ်မွဲတုဲ လလောၚ်တြးလဝ် ဒေါအ်အာပန်ပှော် ပွိုၚ်ပိသတ္တာဟ နူဂိတုဨပရဴ ၂ စဵုကဵုဂိတုဨပရဴ ၂၂ ဂှ်ဏောၚ်ဂှ် လလောၚ်တြးလဝ်ရ။
ၜိုန်လလောၚ်တြးလဝ် ဒေါအ်ပန်ပှော်ကီုလေဝ် ပ္ဍဲကဵုပွိုၚ်ဍုၚ် နွံပ္ဍဲခရိုၚ်သဓီု တွဵုရးဍုၚ်မန် မပ္တံကဵုပွိုၚ်ဍုၚ်သဓီု၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်ကျာ်ထဝ်တံဂှ် လၟေၚ်ဒဒှ်တ္ၚဲ ထံၚ်ဒၟံၚ်ပရိုၚ် နကဵုက္ၜၚ်ကျာတံ နွံဒၟံၚ်ရောၚ် ညးမၞုံအခေါၚ်ဟီုဂး ခရိုၚ်သဓီု KNU ပဒိုဝ်သဝ်အေနာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူဘဲဒဏ်တိချဳတုဲ ပ္ဍဲခရိုၚ်သဓီု ဗော်သွးကောန်ဂကူကရေၚ် KNU ဂှ် ဒေါအ်ဇူအာ ပရေၚ်ပန်ပှော်ကီုလေဝ် လ္ပာ်ကံၚ်ဇြဳပၞာန် ယဝ်ထ္ပက်ကၠုၚ်ပၞာန်မ္ဂး ကလေၚ်တဝ်စၞေဟ်ဗ္တိုက်အာဏောၚ်ဂှ် သ္ဂးရ။
လအာတုပ်သာ်ဂှ်ကီု ပ္ဍဲတွဵုရးဍုၚ်မန် ပ္ဍဲပွိုၚ်ဍုၚ် ဒၞါဲချဳဒရာၚ်ပၠန်ဂတးဇြဟတ်ခိုဟ် မပ္တံကဵုပွိုၚ်ဍုၚ်ရေဝ်၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်ဇြပ်ဗုတံဂှ်လေဝ် လ္ပာ်ကံၚ်ဇြဳပၞာန် ဆက်ထံၚ်မံၚ်ပရိုၚ် နူကဵုပၞာန်ကျာရောၚ် ဂွံတီကေတ် အတိုၚ်ဂလာန် ဂကောံဒပ်ပၠန်ဂတး ဖျေံသ္ဇိုၚ်ဒေသတံရ။
ၜိုန်ရလလောၚ်တြးလဝ် နဒဒှ်ကာလဒေါအ်ပန်ပှော် ဗွဲယာယဳကီုလေဝ် ယဝ်ရကၠောန်ကၠုၚ်ပြဝ ဒုၚ်တဲဟွံမာန်တံဂှ်မ္ဂး ကေတ်ဒုဟ် ကလေၚ်ခၠေဝ်ပလန်အာဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ကံၚ်ဇြဳပၞာန်ရ။
သွက်ဂွံရေၚ်တၠုၚ် ကမၠောန်ပရေၚ်ဟံၚ်ပြာ် ဗွဲမစိုပ်တရဴမာန်ဂှ် ထ္ပက်အာပၞာန်ဟွံသေၚ်တုဲ အပ္ဍဲဂိတုဨပရဴ ပွိုၚ်မွဲဂိတု ဒဒှ်ရဒေါအ်အာပန်ပှော်ဂှ် ဂကောံမဟာမိတ်ကောဒေံ MNDAA, TNLA, AA တံ လလောၚ်ပ္တိတ်လဝ် ပ္ဍဲဂိတုဨပရဴ ၁ တေံရ။
အလဵုအသဳညဳသၟဟ်ဂကူ NUG ဂှ်လေဝ် ပ္ဍဲဒေသတိချဳဒၟံၚ်တံဂှ် ဒေါအ်အာပန်ပှော် ပွိုၚ်ၜါသတ္တာဟဏောၚ် လလောၚ်တြးလဝ်ကီုရ။
အတိုၚ်တၚ်နၚ် ဂကောံသုတေသနဗၠးၜး ဂကောံသုတေသနညာန်လေန်တေတ်ဂှ်မ္ဂး ကြဴနူတိချဳအာ ဇၞော်ကဵုဇြဟတ်တုဲ နူဂိတုမာတ် ၂၈ စဵုကဵု ဂိတုမာတ် ၃၁ ဂှ် ဒပ်ကံၚ်ဇြဳပၞာန် ဟိုတ်နူပန်ပှော်ကၠုၚ်ကဵုလွဟ်ဇၞော် ကေုာံ ပရေၚ်ဗ္တိုက်ပၞာန်ကျာတံဂှ်တုဲ ကောန်အရာပ်ပန်တၠ ချိုတ်တုဲ ၁၂ တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−AFP