ဗရာတ်သေဲ၊ ဨပရဴ ၄
အခိၚ်သမဂ္ဂယူရောပ် (အဳယူ) ဟီုကၠုၚ် ဗွဲမညဳသာ ဒဒှ်ရခၠေဝ်ပလန်အာ ကုအစဳဇန်သမ္မတအမေရိကာန် ဒဝ်နေဝ်ထြာမ် မလလောၚ်တြးကၠုၚ်အခေါန်ဖလှာတံဂှ် ဍုၚ်ကြုက်ဂှ်တှ်ေ ဖ္တိုက်ဖ္အောဝ်လဝ်အမေရိကာန် သွက်ဂွံရုပ်သီကၠေံ အခေါန်ဖလှာတံဂှ်တုဲ ယဝ်ဟွံရုပ်သီမ္ဂး ခၠေဝ်ပလန်အာဏောၚ်ဂှ် ဟီုကြီုလဝ်ရ။
တၚ်လလောၚ်တြး သမ္မတထြာမ် ကံက်ကၠုၚ်အခေါန် ၁၀ တၟံကၠံ လ္တူဗၞိက်မပၠောပ်ပ္တိုန်နၚ် ပ္ဍဲဍုၚ်အမေရိကာန်တံဂှ်ဝွံ ပ္ဍဲဂိတုဨပရဴ ၅ တေံ လမျီုလုပ်ကၠုၚ်ဏောၚ်တုဲ ညးဓလိုက်တမ်ရိုဟ်အလုံဂၠးမွဲတံ မၚ်ရံၚ်ဒၟံၚ် သီုကဵုဓဝိၚ်အိုတ်ရ။
အခိၚ်ပရေၚ်ဒှ်ဓဝိၚ် စပ်ကဵုပေါဲပၞာန်သွံရာန်ဗၞိက်တံ သၠုၚ်တိုန်ဒၟံၚ်ဂှ် ပ္ဍဲဂိတုဨပရဴ ၃ တေံ အခိၚ်ပံက်လဝ်ဗွဝ်ဖျာသထံက်ယှေဝ်ယျာအာယှဂှ် ၚုဟ်စှ်ေအာလဝ်ဂှ် ဂွံဆဵုကေတ်ရ။
အကံက်အခေါန်ထြာမ်ဏံဂှ် နကဵုညးတံ ဒဒှ်ရခၠေဝ်ကၠုၚ် ဗွဲမညဳသာဏောၚ် ဇၞော်သ္ကိုပ်ကဝ်မယှေန်ယူရောပ် ဗောန်ဒါလေယာ ဟီုလဝ် ပ္ဍဲဂိတုဨပရဴ ၂ တေံရ။
ဟိုတ်နူအကံက်အခေါန်အမေရိကာန်တုဲ ပရေၚ်ပိုန်ဒြပ်အလုံဍုၚ်ဂၠးမွဲကီု ကၟိန်ဍုၚ် မဒှ်အန္တရာယ်လောဲ မဟွံဒုၚ်ဒွံလုက်တံ ဇီုကပိုက်ဒးအာဏောၚ်ဂှ် ဇၞော်သ္ကိုပ်ဗောန်ဒါလေယျာ ကဵုလဝ်သတိရ။
ဟိုတ်နူမူဝါဒပရေၚ်သွံရာန်ဗၞိက် ထြာမ်ဂှ်တုဲ ဍုၚ်ကြုက် မဒးဇီုကပိုက်ဂၠိုၚ်အိုတ်ဂှ်တှ်ေ ဖျေံစၟတ်အာ အစဳဇန်သ္ဂောံပလန်တဲတံဏောၚ်တုဲ အမေရိကာန်ဝွံ စၞောန်ပျးအခေါန်ဖလှာတုဲ ကရေပ်ဓရတ်ဒၟံၚ်ရောၚ် ဟီုလဝ်ရ။
ပပ္တံနူဂိတုဨပရဴ ၉ ဏံတုဲ ဒဒှ်ရစၞောန်ပျးအာ အကံက်အခေါန်လ္တူကၟိန်ဍုၚ်လ္ၚဵုတံ နဒဒှ်အခေါန် မဒှ်သၠုၚ်အိုတ်ဂှ်ဏောၚ်ဂှ် ထြာမ် ကဵုလဝ်သတိရ။
ထြာမ်ဂှ်တှ်ေ လ္တူကွဳစက် ကၠုၚ်နူဍုၚ်သ္အာၚ်တံသီုဖအိုတ်ဂှ်လေဝ် ဒဒှ်ရကံက်အာအခေါန် ၂၅ တၟံကၠံဏောၚ်ဂှ် လလောၚ်တြးလဝ်ရ။
ဟိုတ်နူထြာမ် စၞောန်ပျးကၠုၚ်အကံက်အခေါန်တံဂှ်တုဲ အာဇီုကပိုက်ဒး လ္တူညးမ္ဒးရပ်စပ်စသုၚ် ပ္ဍဲအမေရိကာန်တံဏောၚ်တုဲ အန္တရာယ်ပရေၚ်ပိုန်ဒြပ်ဂၠးတိ ဆုတ်ယုတ်အာမာန်ဏောၚ်ဂှ်လေဝ် တၠပညာပရေၚ်ပိုန်ဒြပ်ဂမၠိုၚ် ကဵုလဝ်သတိရ။
Ref: BBC